Na scenie Kupałaŭskaha vystupajuć eks-KVZšniki, jakija ŭ pieśniach vyśmiejvajuć Łatušku, Cichanoŭskuju i pratesty
Siońnia na scenie Kupałaŭskaha teatra vystupaje ansambl «Hałasy ZMiesta», jakija vykonvajuć źjedlivyja pieśni pra pratesty, dvarovyja čaty, pra Paŭła Łatušku, Śviatłanu Cichanoŭskuju, Maryju Kaleśnikavu i palityčnuju situacyju ŭ Biełarusi, piša TUT.BY.
Zahadzia kancert kalektyvu «Hałasy ZMiesta» praktyčna nidzie nie anansavaŭsia. Siońnia dniom pres-sakratar Kupałaŭskaha teatra ŭ razmovie z TUT.BY pryznaŭsia, što ŭpieršyniu čuje pra hety vystup. Tym nie mienš a 19.00 kancert humarystaŭ pačaŭsia na scenie hałoŭnaha biełaruskaha teatra. Ci pradavalisia na jaho kvitki, daviedacca nie ŭdałosia.
U kalektyŭ «Hałasy ZMiesta» ŭvachodziać byłyja KVZšniki z Baranavič. Na sajcie prajekta paviedamlajecca, što hrupa isnuje ŭžo daŭno, ale nazvu «Hałasy ZMiesta» atrymała tolki viasnoj 2020 hoda. Muzyki tłumačać svaju kancepcyju:
— Płanavałasia śpiavać pieśni na złobu dnia i vykazvać pohlad na padziei, jakija adbyvajucca ŭ krainie, tak by mović z hłybinki, pravincyi. Naturalna, vybary i cyrk, jaki pačaŭsia paśla ich, tolki padściobnuli nas, i pieśni stali składacca praktyčna sami.
YouTube-kanał źjaviŭsia ŭ kalektyvu dva miesiacy tamu, i ciapier na im amal 14 tysiač padpisčykaŭ. Za hety čas muzyki paśpieli vypuścić kala 20 rolikaŭ. U svajoj tvorčaści jany vyśmiejvajuć Telegram-kanały i dvarovyja čaty, zabastoŭki, pratesty studentaŭ i apazicyjanieraŭ. Prajekt niekamiercyjny, zapeŭnivajuć udzielniki i pieryjadyčna prosiać padpisantaŭ padtrymać ich finansava.
Adnoj ź pieršych piesień prajekta «Hałasy ZMiesta» stała kampazicyja «Kto tut v hieroi?», u iraničnym klučy pryśviečanaja Paŭłu Łatušku. Słovy da jaje, jak i da bolšaści inšych piesień, napisaŭ vakalist Dźmitryj Butakoŭ.
U asobnych pieśniach humarysty zhadvajuć Śviatłanu Cichanoŭskuju i inšych členaŭ Kaardynacyjnaj rady. A jašče artysty prapanujuć svaje kaviery na hałoŭnyja pratesnyja kampazicyi — «Mury», «Pieramien», «Kupalinku».
Uvohule, karjera artystaŭ raźvivajecca imkliva. Tolki niadaŭna jany pačali zajmacca tvorčaściu i źjavilisia na telekanale Sajuznaj dziaržavy «BiełRos TB» — i voś užo siońnia jany na scenie Kupałaŭskaha teatra. Paśla masavych zvalnieńniaŭ kupałaŭcaŭ, nahadajem, na joj užo paśpieli vystupić ansambl «Charoški» i arkiestr Finbierha.
Ciapier čytajuć
«Łukašenka mnie skazaŭ: «Chočaš — možaš adkazać nam, udaryć pa Mazyry, pa zavodzie» — Zialenski29
«Łukašenka mnie skazaŭ: «Chočaš — možaš adkazać nam, udaryć pa Mazyry, pa zavodzie» — Zialenski
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2525
Kamientary