16 kastryčnika — prezientacyi novych knih Hanny Sieviaryniec, Natałki Babinaj i Dźmitryja Strocava
Imprezy fiestyvalu intelektualnaj knihi PRADMOVA — u minskim Pałacy mastactvaŭ (Kazłova, 3). U piatnicu haściej fiestyvalu čakaje nasyčany dzień.
12.20: prezientacyja knih Natalli Alejnikavaj
Prezientacyja knih paezii, afaryzmaŭ i žyvapisu «Ažyćciaŭlajusia taboju…» i «Myśli vsłuch…» Natalli Alejnikavaj. Knihi vyjšli ŭ sieryi «Minskija maładyja hałasy».
Pačatak u 12.20, zała 1.
15.45: Dźmitryj Strocaŭ prezientuje zbornik paezii «Tuda i obratno»
Chrosny baćka mnohich maładych ruskamoŭnych biełaruskich aŭtaraŭ, Dźmitryj — jarki pierfomier, hustoŭny tvorca i, biezumoŭna, značnaja i znakavaja fihura sučasnaha litaraturnaha pracesu. Jon vydaŭ dzieviać ułasnych knih paezii, ciapier u Kijevie rychtujecca da vychadu dziasiataja — na čatyroch movach, dzie pad adnoj vokładkaj buduć sabranyja teksty pra Biełaruś i Ukrainu.
Pačatak u 15.45, zała 2. Kolkaść miescaŭ abmiežavanaja, nieabchodnaja papiaredniaja rehistracyja.
15.00: Dziarnovič i Chareŭski prezientujuć zbornik, pryśviečany Krevu
U zborniku navukovych artykułaŭ «Kreva: historyja, archieałohija, kulturnaja spadčyna» źmieščanyja materyjały, što tyčacca prablem bałta-słavianskich kantaktaŭ, historyi Kreŭskaha zamka i miastečka ŭ pieryjad poźniaha Siaredniaviečča i rańniaha Novaha času, padziej Pieršaj suśvietnaj vajny ŭ Krevie, historyi miastečka ŭ mižvajenny pieryjad; asobna pradstaŭleny materyjały, źviazanyja z kniaziem Daŭmontam.
Vydańnie raźličana na navukoŭcaŭ i krajaznaŭcaŭ. U prezientacyi biaruć udzieł historyk Aleh Dziarnovič i mastactvaznaŭca Siarhiej Chareŭski.
15.30: prezientacyja ramana Natałki Babinaj «Bodaj, budka»
Raman «Badaj, Budka» napisany z ułaścivym Natalli Babinaj, biełaruskaj i ŭkrainskaj piśmieńnicy i žurnalistcy, razmacham. Hałoŭnaja hierainia ramana, jakaja žyvie na Bieraściejščynie, vałodaje mistyčnaj zdolnaściu «pravalvacca ŭ nory ŭ časie», to-bok traplać pry peŭnych umovach u inšyja časy. Heta zdolnaść dapamahła joj znajści skarb, dziakujučy jakomu jana i nabyła Budku — žyllo pablizu čyhunki. Z toj pary pačynajucca tajamničyja i žudasnyja padziei…
18.00: Hanna Sieviaryniec prezientuje «Try Aniehiny»
U biełaruskaj litaratury kananičnym pierakładam znakamitaha ramana ŭ vieršach Alaksandra Puškina «Jevhienij Oniehin» ličycca pierastvareńnie, vykananaje paetam Arkadziem Kulašovym. Adnak daśledčyca Hanna Sieviaryniec u archivie represavanaha paeta Alesia Dudara vyjaviła pierakład «Aniehina», zrobleny na dziesiacihodździe raniej za kulašoŭski. Hety rukapis 80 hadoŭ ličyŭsia zhublenym, a praca Dudara — stračanaj dla historyi biełaruskaha paetyčnaha pierakładu.
U knizie «Try Aniehiny» — aryhinał Puškina i dva pierakłady — Kulašova i Dudara padajucca paralelna. Tak čytač moža nazirać za chodam dumak pierakładčykaŭ, a daśledčyk — analizavać pryniatyja imi rašeńni.
Padčas sustrečy daśledčyca, piśmieńnica, vykładčyca Hanna Sieviaryniec raspaviadzie pra pošuki ŭ archivach Dudara i padzielicca płanami pa dalejšym vyvučeńni nieviadomaj archiŭnaj spadčyny biełaruskich tvorcaŭ.
Kamientary