«Chacieŭ pakazać, što heta — fars». Hrodzienski muzyka Ihar Bancar pryjšoŭ u sud u ružovym, jaho zabraŭ AMAP
15 vieraśnia ŭ Hrodzienskim abłasnym sudzie musiŭ adbycca razhlad kasacyjnaj skarhi pa prysudzie hramadskamu aktyvistu i muzyku Iharu Bancaru. U sud jon źjaviŭsia ŭ ružovym i z ružovym ściaham. Na pasiadžeńnie Bancara nie puścili, a z hanka suda muzyku zabraŭ AMAP, piša Hrodna.life.
«Ja vyrašyŭ pakazać, što tyja sudy, na jakich ja byŭ raniej, — fars», — tak aktyvist patłumačyŭ svoj vyhlad i pierformans na hanku abłasnoha suda.
Usiu sudovuju sistemu Biełarusi i papiarednija zatrymańni jon taksama ličyć farsam.
Namieśnik staršyni suda nie puściŭ Bancara na pasiadžeńnie, bo toj źjaviŭsia ŭ «nienaležnym vyhladzie» — u šortach. Tady aktyvist vyjšaŭ na hanak, uklučyŭ muzyku z kałonki i pačaŭ machać ružovym ściaham.
Praź piać chvilin pryjechała spačatku achova, potym — bus z tanavanym škłom. «Bus abjechaŭ pa kalcy, staŭ kala kramy, ź jaho vyjšaŭ AMAP i pačali krucić», — raskazaŭ Hrodna.life śviedka zdareńnia Andrej Mialeška. Zatrymlivali muzyku siamiora supracoŭnikaŭ AMAP, ale biez asablivaj žorstkaści.
Ihara Bancara pavieźli ŭ RAUS na Dubko. Tam ź im praviali prafiłaktyčnuju hutarku ab niedapuščalnaści takich pavodzinaŭ, vyklikali bryhadu miedykaŭ ź Psichijatryi-narkałohii dla ahladu i adpuścili.
U abłasnym sudzie musili razhladać kasacyjnuju skarhu na rašeńnie suda Leninskaha rajona ad 24 žniŭnia. Iharu Bancaru prysudzili 10 sutak pa artykule 23.34. č. 1 KaAP (Udzieł u niesankcyjanavanym masavym mierapryjemstvie). Jon byŭ siarod piaci zatrymanych 22 žniŭnia kala hrodzienskaha bara «Karyca». Heta ŭžo druhoje abskardžańnie prysudu Ihara Bancara ŭ abłasnym sudzie za miesiac.
Ciapier čytajuć
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona
Kamientary