Supracoŭniku MNS, zvolnienamu paśla zatrymańnia ŭ dzień čerhaŭ da CVK, sabrali 7 tysiač rubloŭ

25-hadovaha aficera byłoha suviazista Respublikanskaha centra kiravańnia i reahavańnia na NS Piatra Šamšejeva zatrymali 15 lipienia. Jon viartaŭsia dadomu paśla taho, jak adstajaŭ čarhu da CVK. Chłopiec raspaviadaje, što na nastupny dzień kiraŭnictva prapanavała jamu zvolnicca pa pahadnieńni bakoŭ. Ciapier jon vučycca na prahramista, piša tut.by.

15 lipienia Piatro Šamšejeŭ stajaŭ u čarzie ŭ Centralnuju vybarčuju kamisiju sa skarhaj na rašeńnie admović u rehistracyi dvum pretendentam na prezidenckuju pasadu — Viktaru Babaryku i Valeryju Capkału. Kali CVK začyniŭsia, čarha raspałasia, Šamšejeŭ pajšoŭ u bok vakzała. Vulica Biersana, jakuju jamu treba było pierajści, kab trapić na vakzał, była pierakrytaja ŭnutranymi vojskami. 

— Na pytańnie «Jak pierajści?» nie było nijakaha adkazu. Ja padyšoŭ da daišnika, jon skazaŭ, što treba prajści praz płošču Miaśnikova. U hety čas ja havaryŭ z maci pa telefonie, zzadu padyšli dva supracoŭniki AMAP, biez tłumačeńnia pryčyn prosta ŭziali pad ruki i paviali ŭ aŭtazak. Mamie ja paśpieŭ skazać, što mianie ŭziali, kab jana paviedamiła pra heta na słužbu. U nas tak pryniata, — raspaviadaje Šamšejeŭ.

Kaža, što jaho i astatnich zatrymanych pryvieźli ŭ Maskoŭskaje RUUS, tam prabyŭ kala troch hadzin. Chłopca adpuścili biez dopytu, biez składańnia pratakołu, kali pryjšoŭ jaho kiraŭnik.

— Z maim kiraŭnikom my pajechali na pracu, mianie paprasili napisać rapart z tłumačeńniem, jak atrymałasia, što ja byŭ zatrymany. Ja napisaŭ, što prosta išoŭ dadomu — chacieŭ minimizavać nastupstvy.

Šamšejeŭ kaža, ranicaj nastupnaha dnia rapart razhladali ŭ Ministerstvie nadzvyčajnych situacyj. Paśla hetaha ŭ chłopca adbyłasia niepryjemnaja razmova z kiraŭnictvam, były supracoŭnik MNS kaža, što jaho pahražali zvolnić pa artykule.

— Mnie prostym tekstam skazali: «Z taboj nam raźvitvacca nie škada, na tvajo miesca pryjdzie inšy taki ž čałaviek». Ja tak padumaŭ, što mnie tut z takim kiraŭnictvam rabić niama čaho. Navat kali b zastaŭsia pracavać, razumieŭ, što mnie prosta nie daduć tut znachodzicca, nu i napisaŭ rapart ab zvalnieńni pa pahadnieńni bakoŭ. 

Šamšejeŭ tłumačyć: ź im za hod da hetaha byŭ zaklučany kantrakt na piać hadoŭ, tady jamu vydali 6800 rubloŭ u jakaści materyjalnaj dapamohi. Z-za zvalnieńnia da skančeńnia kantraktu sumu treba viarnuć. Akramia hetaha Šamšejeŭ pavinien zapłacić 209 rubloŭ za abmundziravańnie. Srodki treba pieraličyć da 17 žniŭnia, dla hetaha były lejtenant źviarnuŭsia na płatformu «Sumlennyja ludzi», dzie jamu sabrali ŭsiu sumu.

Suviazistam Šamšejeŭ prapracavaŭ u MNS šeść hadoŭ, byŭ lejtenantam unutranaj słužby, načalnikam adździaleńnia pa absłuhoŭvańni srodkaŭ suviazi adździeła suviazi i apaviaščeńnia. U studzieni 2020 atrymaŭ hramatu Ministerstva pa nadzvyčajnych situacyjach. Kaža, što narakańniaŭ ad načalstva nie atrymlivaŭ.

— Kalehi vykazvali słovy padtrymki. Usie byli ŭ šoku ad taho, što navat kali ty chočaš paskardzicca va ŭstanoŭlenym zakonam paradku, to tabie nielha heta zrabić, — kaža Šamšejeŭ.

Ciapier były aficer vyvučaje na anłajn-kursach prahramavańnie i šukaje pracu.

Zvolnienyja z MNS: pierasłaŭ dakumient u Telegram-kanał, pastaviŭ podpis za alternatyŭnych kandydataŭ, zrabiŭ rassyłku pietycyi

Pa dapamohu na płatformu «Sumlennyja ludzi» paśla zvalnieńnia źviarnulisia jašče jak minimum try čałavieki, jakija nazyvajuć siabie supracoŭnikami MNS.

Pavał. «Prymusili napisać rapart na zvalnieńnie pa ŭłasnym žadańni paśla taho, jak jon pierasłaŭ dakumient u Telegram-kanał, a tam jaho raźmiaścili, schavaŭšy nie ŭsiu infarmacyju», — skazana ŭ historyi na sajcie.

Uładzisłaŭ, paznačany jak były kapitan unutranaj słužby MNS. «Pryniaŭ rašeńnie pastavić try podpisy za alternatyŭnych kandydataŭ (Babaryku, Cichanaŭskuju i Capkału). Paśla taho jak podpisy byli pieradadzienyja ŭ CVK, Uładzisłavu paviedamili na pracy, što im cikaviacca supracoŭniki adździeła ŭłasnaj biaśpieki. Praz paru dzion Kiraŭnictva paprasiła jaho napisać rapart na zvalnieńnie pa ŭłasnym žadańni, adnak Uładzisłaŭ admoviŭsia, bo jamu zastavałasia 10 dzion da zakančeńnia kantraktu. Kiraŭnictva pryniało rašeńnie nie praciahvać ź im kantrakt, niahledziačy na toje, što za miesiac da hetych padziej jon atrymaŭ pasadu staršaha inśpiektara, a ŭsiaho za tydzień da hetaha — zvańnie kapitana MNS», — apisvajuć na sajcie historyju zvalnieńnia Uładzisłava.

Juryj Kamocki. Taki supracoŭnik sapraŭdy pracavaŭ u MNS, u 2018 hodzie atrymlivaŭ miedal ad ministra, padpałkoŭnik MNS Frunzienskaha rajona Minska. «18 červienia jon zrabiŭ rassyłku ŭ WhatsApp «Pietycyja za vyzvaleńnie Viktara Dźmitryjeviča», i ŭ rassyłcy akazałasia staršynia UVK Frunzienskaha rajona N47 hałoŭny ŭrač Hatoŭka Julija Valerjeŭna. 2 lipienia kiraŭnictva skasavała ź Juryjem kantrakt, jaki byŭ padpisany na try hady. Hatoŭka Ju. V. napisała zajavu ŭ milicyju pra toje, što Juryj nibyta akazvaŭ na jaje cisk. Joj admovili ŭ raspačynańni kryminalnaj spravy», — skazana pra situacyju z Kamockim.

Da hetaha byŭ zvolnieny z MNS major Dźmitryj Šafranski, jaki stajaŭ u čarzie ŭ kramu Symbal.by.

MNS: «Pajšli nasustrač i jaho prośbu zadavolili»

Zvalnieńnie Šamšejeva i troch inšych supracoŭnikaŭ MNS Tut.by paprasiŭ prakamientavać aficyjnaha pradstaŭnika MNS Vitala Navickaha.

— Čałaviek napisaŭ rapart ab zvalnieńni, jamu pajšli nasustrač i jaho prośbu zadavolili, — łakanična adkazaŭ jon.

• 0
• 0
• 0
• 0
• 0
• 0
• 0
• 0