Guardian: Kiraŭnik Biełarusi karanavirus admaŭlaje, a ludzi źbirajuć srodki kraŭdfandynham
Papularnaje brytanskaje vydańnie The Guardian napisała materyjał pra situacyju z karanavirusam u Biełarusi: jak usprymaje hetuju pandemiju dziaržava i jak hramadzianskaja supolnaść sprabuje dapamahčy daktaram.
Žurnalist haziety zaŭvažaje, što Biełaruś pryciahnuła da siabie ŭvahu śvietu za «zapoźnienuju reakcyju, praciahvajučy pravodzić adziny ŭ Jeŭropie futbolny čempijanat, pakolki Alaksandr Łukašenka nazvaŭ hetuju pandemiju «psichozam».
«Sistema achovy zdaroŭja ŭ Biełarusi padtrymlivajecca vałanciorami i kraŭdfandynhavymi kampanijami, bo kraina zmahajecca z pandemijaj karanavirusa, jakuju prezident nie rašajecca pryznać», — miarkuje žurnalist.
Tym časam pravaabaronca i vałancior Andrej Stryžak staŭ suzasnavalnikam inicyjatyvy #bycovid19 dla kraŭdfandynhu, nabyćcia i dastaŭki abstalavańnia i achoŭnaha adzieńnia miedykam, adznačaje brytanskaja hazieta.
«Naša meta — pierakanacca, što hetaja sistema nie abvalicca, — skazaŭ jon. — U mnohich miescach, naprykład u Viciebsku, my bačym, što tut vielmi składanaja situacyja, krytyčnaja situacyja. Jość šmat chvorych, i šmat chto ź miedykaŭ chvoryja».
Stryžak razam z kamandaj ź dziasiatkaŭ dobraachvotnikaŭ i NDA sabrali značnuju sumu hrošaj dla kupli abstalavańnia i adzieńnia dla lekaraŭ.
«Samaja składanaja situacyja z reśpiratarami, — skazaŭ jon. — Kali vy pahladzicie na aficyjnyja ličby ŭrada, našy pastaŭki składajuć značnuju častku [ad ahulnaj kolkaści]».
Vałanciory imknucca padkreślić, što ich praca nosić apalityčny charaktar, adznačajučy, što Ministerstva achovy zdaroŭja ŭsio čaściej hatova vitać ich dapamohu.
«Dla nas sapraŭdy važna chutka ruchacca prosta ciapier, tamu što chvaroba raspaŭsiudžvajecca ŭ Biełarusi ź nievierahodnaj chutkaściu», — skazała Kaciaryna Siniuk, kiraŭnik niaŭradavaj arhanizacyi «Imiony», jakaja ŭdzielničaje ŭ kampanii #bycovid19.
Andrej Stryžak spadziajecca, što kryzis budzie praryvam dla ŭmacavańnia davieru da niaŭradavych arhanizacyj krainy.
«My budziem praciahvać pracavać, pakul nie ŭbačym, što ŭrad uziaŭ situacyju pad realny kantrol i ŭ miedycynskaha piersanału jość abstalavańnie, nieabchodnaje dla vykanańnia svajoj pracy biez strachu», — skazaŭ jon.
Ciapier čytajuć
Ministr kultury vyciahnuŭ u efir čarhovaha Astapa Bendara. I heta stała apošniaj kroplaj: suprać hetaha fiermiera-chvalka vystupiła siamja17
Kamientary