Tłumačym, čamu nastupnyja tydni ŭ śviecie praciahniecca rost śmierciaŭ ad karanavirusa
Kryvaja śmierciaŭ paŭtaraje kryvuju vyjaŭlenych nośbitaŭ z zatrymkaj na 10—15 dzion. Minułyja tydni ličba zaražeńniaŭ rezka rasła. Heta aznačaje, što pakul usio budzie kiepska.
Pandemija karanavirusa nie ścichaje, čakańni aptymistaŭ nie spraŭdzilisia.
Čatyry dni nazad ad Covid-19 u śviecie pamierła 973 čałavieki, try dni tamu — 1080, pazaŭčora — 1356, učora — užo 1626. Za dva dni kolkaść śmierciaŭ vyrasła na 51%, za try — na 67%. Niaŭžo ŭ takim tempie i dalej budzie pavialičvacca?
Za hetaj matematykaj stajać žyvyja ludzi — jakija zadychajucca i sychodziać.
Na žal, nastupnyja dva tydni — prahnoz zmročny. A dalej zaležyć ad dvuch faktaraŭ. Ci daduć efiekt drakonaŭskija karancinnyja abmiežavańni ŭ Zachodniaj Jeŭropie i ci pałychnie pandemija ŭ krainach Treciaha śvietu i Uschodniaj Jeŭropy, kudy jana ŭžo davoli hłyboka pranikła.
Kali paraŭnać hrafiki rehistracyi kolkaści vypadkaŭ infikavańnia i śmiarotnaści ŭ časie pieršaha ŭsplosku karanavirusa, jaki adbyŭsia ŭ Kitai, bačna, što druhi hrafik u cełym paŭtaraje pieršy — z pramiežkam prykładna 10—15 dzion.
Varta nahadać, što ŭ 80% vypadkaŭ ludzi pieranosiać karanavirus zusim lohka, časam navat bieśsimptomna, ale ŭ takim niby całkam zdarovym stanie jany zdolnyja zaražać inšych ludziej — mnohija nie mohuć u takoje pavieryć, heta niazvykła.
Prykładna ŭ 14% vypadkaŭ ciačeńnie chvaroby, naadvarot, ciažkaje. Jana pierachodzić u pnieŭmaniju z dychavicaj.
Što da pracentu śmiarotnaści, to jon zaležyć ad taho, ci ŭličvajucca bieśsimptomnyja vypadki. U Paŭdniovaj Karei, dzie vyjaŭleńnie infikavanych ludziej vielmi starannaje, prob ludzi zdajuć šmat, a miedycyna vysokaraźvitaja, śmiarotnaść składaje na siońnia kala 1,1% ad ahulnaj kolkaści vyjaŭlenych nośbitaŭ. U toj ža čas u Kitai jana pieravysiła 4%, a ŭ krainach, dzie chvala zaražeńniaŭ takaja vysokaja, što miedycyna vymušanaja kancentravacca tolki na ciažkich vypadkach, a teściravać — tolki ludziej z vyraznymi simptomami, jon zaškalvaje. Naprykład, u Italii na siońnia pamierli 9% vyjaŭlenych chvorych. Pryčym u epicentry epidemii, na poŭnačy, hetaja dola jašče vyšejšaja.
Čym bolšaja chvala epidemii, tym horšaja vyžyvalnaść pacyjentaŭ. Heta vyrazna prademanstravali navat takija raźvityja krainy, jak Italija i Ispanija (hrafiki tut), z adukavanym nasielnictvam i niebłahoj miedycynaj.
Kali praanalizujem dynamiku vyjaŭleńnia pacyjentaŭ z karanavirusam dva tydni, tydzień nazad, my ź vialikaj imaviernaściu sprahnazujem kolkaść fatalnych vypadkaŭ u nastupnyja dni.
Tryvohu vyklikaje situacyja ŭ takich krainach, jak Indanezija (užo 48 śmiarotnych vypadkaŭ pry ŭsiaho 514 vyjaŭlenych nośbitaŭ), na Filipinach (25 śmierciaŭ z 380), u Iraku (20 z 223). Kolkaść śmiarotnych vypadkaŭ tam takaja, što nie moža być dvuch tłumačeńniaŭ — tam hulaje šmat «niaŭličanych» nośbitaŭ karanavirusa.
Spadziavańni, što virus budzie zabivać suchata i haračynia, zdajecca, pakul nie spraŭdžvajucca.
Takaja kolkaść śmiarotnych vypadkaŭ budzie zmušać usio novyja krainy zakryvać miežy i ŭvodzić karancin, kab ratavać žyćci. U krainach, dzie budzie adbyvacca abvalny rost, jak u Italii, ułady buduć vymušanyja abmiažoŭvać ekanamičnuju aktyŭnaść da minimumu, u ich prosta nie zastajecca inšaha vyjścia. Heta, u svaju čarhu, budzie parušać łancužki suśvietnaha tavaraabmienu ź niepradkazalnymi nastupstvami.
Usio bolš šancaŭ, što suśvietnaja ekanamičnaja depresija ŭ vyniku pandemii moža stać adnoj z najhoršych u historyi.
Ništo pakul nie pakazvaje, što epidemija ŭ jeŭrapiejskich krainach dasiahnuła piku.
Naadvarot, narastaje kolkaść vyjaŭlenych vypadkaŭ u takich krainach, jak Turcyja (947 vyjaŭlenych nośbitaŭ, 21 śmiarotny vypadak), Rasija (367 nośbitaŭ). Tryvožnaja situacyja skłałasia ŭ Niderłandach (179 pamierłych, hrafiki tut) i Brytanii (244 pamierłych) — dźviuch krainach, dzie epidemičnyja škoły spačatku pierakanali ŭłady krainy trymacca teoryi farmiravańnia «kalektyŭnaha imunitetu» i nie ŭvodzić strohich karancinnych mier. Brytanija ŭžo adrakłasia raniejšaj stratehii.
Vymušana spynilisia i mnohija małyja krainy — ad Šviejcaryi da Čechii. A krainy, jakija pakul adnosna mała zaražanyja, ad Litvy i Ukrainy da Ruandy i Arhienciny, uvodziać masavyja abmiežavańni, kab italjanski i ispanski scenar choć u ich nie paŭtaryŭsia. Jany previentyŭna spynili zaniatki ŭ škołach i VNU, začynili zabaŭlalnyja ŭstanovy, spynili spartovyja i masavyja mierapryjemstvy, zakryli miežy. Takija zachady dajuć efiekt, pakazvaje prykład Niamieččyny (hrafiki tut).
Abmiežavańni na pierasiačeńnie hranic i masiravanaja kampanija «Zastavajciesia doma», jakuju pravodziać krainy-susiedki Biełarusi, stała adnosnym ščytom i dla našaj krainy. Patoki padarožnikaŭ, prynamsi, pamienšali.
Choć prahnozy na nastupnyja tydni zmročnyja, zastajecca nadzieja, što strohi karancin, uviedzieny ŭžo ŭ bolšaści dziaržaŭ, strymaje ličbu achviar karanavirusa ŭ miežach tysiač za dzień i nie daść joj dasiahnuć bolšych paradkaŭ.
Kamientary