Z učastka vyhnali naziralnika, jaki spytaŭ u Łukašenki, navošta ŭ Biełarusi vybary
Paviedamlajecca, što pazbavili akredytacyi naziralnika kampanii «Pravaabaroncy za svabodnyja vybary» Kiryła Harošku na ŭčastku №506 Staravilenskaj vybarčaj akruhi № 105. Heta toj samy naziralnik, jaki spytaŭ u Łukašenki, navošta ŭ Biełarusi vybary.
Pierad tym jak Alaksandar Łukašenka atrymaŭ biuleteń na vybarčym učastku № 506, jaho spyniŭ naziralnik Kiryła Haroška, piša «Radyjo Svaboda». Naziralnik spytaŭ u Łukašenki, navošta ŭ Biełarusi vybary.
Jak paviedamiŭ Kirył Haroška kampanii, jon byŭ vydaleny za toje, što jon niby naviazvaŭ svoj punkt hledžańnia inšym naziralnikam. Jaho vydalili z učastka ŭ 19:10, akurat pierad padlikam hałasoŭ na ŭčastku.
«Taksama zadavaŭ niekarektnyja pytańni vybarščykam, chadziŭ pa budynku, jaki nie maje adnosinaŭ da ŭčastku dla hałasavańnia, pieraśledujučy člena kamisija Huniča, za što nieadnarazova byŭ papiaredžany staršynioj učastkovaj kamisii ab niedapuščeńni ŭ dalejšym padobnych situacyj i pra toje, što svaimi pavodzinami Haroška parušaje vybarčaje zakanadaŭstva i moža być pazbaŭleny akredytacyi», — havorycca ŭ rašeńni kamisii pra pazbaŭleńnie akredytacyi naziralnika.
Jon budzie abskardžvać rašeńnie UVK.
«U mianie było adno pytańnie da Łukašenki. Ja zhadaŭ, što ŭ raźvitych demakratyjach vybary — heta instrument źmieny ŭłady, a jakuju funkcyju vykonvajuć vybary ŭ Biełarusi, pačynajučy z 2000 hodu?»
Jon kaža: «Pasłuchaj, vybary — heta nie abaviazkova źmiena ŭłady». I pryvioŭ prykład Rasiei, pryvioŭ prykład Štataŭ, što Tramp zachoča zastacca na druhi termin. A pa-druhoje, jon kaža, što ŭ Biełarusi vybary — heta nie źmiena ŭłady, a vybar kirunku. I hety vybar robim my.
Ja ŭdakładniŭ: kali vy kažacie, što hety vybar robim my, to što vy majecie na ŭvazie — narod, hramadzianie, ci my — heta ŭłada? Jon kaža, što pierš za ŭsio heta hramadzianie, ale ŭłada tut hraje klučavuju rolu», — raspavioŭ naziralnik
Kamientary