U Makieja spytali, jak biełaruskaj dypłamatyi ŭdajecca naładzić kantakt i z Kijevam, i z Maskvoj
Kiraŭnictva Biełarusi zaŭsiody zychodzić ź nieabchodnaści ščyraści ŭ adnosinach ź luboj dziaržavaj. Pra heta ministr zamiežnych spraŭ Biełarusi Uładzimir Makiej zajaviŭ u intervju prahramie «Kontury» na telekanale ANT, piša BiełTA
Uspaminajučy ab niadaŭniaj sustrečy prezidentaŭ Biełarusi i Ukrainy ŭ Žytomiry, u ministra pacikavilisia, u čym sakret taho, što ŭ biełaruskaj dypłamatyi zaŭsiody atrymlivajecca znachodzić kantakt jak z roznymi ukrainskimi lidarami, tak i zachoŭvać dobryja adnosiny z Maskvoj va ŭmovach viadomaj kryzisnaj situacyi.
«Heta zasłuha nie tolki i nie stolki biełaruskaj dypłamatyi. Treba hladzieć hłybiej. Havorka idzie pra toje, što kiraŭnictva Biełarusi zaŭsiody zychodzić ź nieabchodnaści najaŭnaści ščyraści ŭ adnosinach ź luboj dziaržavaj. Kali ty zacikaŭleny ŭ supracoŭnictvie z toj ci inšaj krainaj, to pavinien rabić heta ščyra. Mienavita heta źjaŭlajecca asnovaj taho, što ŭ nas prysutničajuć dobryja adnosiny z usimi kiraŭnikami toj ža braterskaj Ukrainy», — adznačyŭ Uładzimir Makiej.
Jon padkreśliŭ, što pieršaja asabistaja sustreča Alaksandra Łukašenki i Uładzimira Zialenskaha była vielmi ciopłaj, absalutna adkrytaj i ščyraj. «Ščyry abmien mierkavańniami dazvoliŭ ustalavać narmalny kantakt. Dobryja adnosiny pamiž kiraŭnikami taksama vielmi važnyja dla dalejšaha naładžvańnia našych kantaktaŭ pa ŭsich napramkach», — zajaviŭ ministr.
Kiraŭnik biełaruskaha źniešniepalityčnaha viedamstva ličyć, što kali b usie baki ščyra žadali spynieńnia kanfliktu va Ukrainie, to tam by ŭžo daŭno nastupili mir i spakoj.
Uładzimir Makiej taksama prakamientavaŭ razmovy vakoł temy palapšeńnia adnosin Biełarusi z Zachadam.
«Nichto nikudy nie razvaročvajecca. My chočam mieć dobryja, narmalnyja, zbałansavanyja adnosiny z usimi krainami. Heta ŭ našych intaresach, bo naša ekanomika maje adkryty charaktar», — skazaŭ jon.
Ministr paraiŭ supakoicca ŭsim, chto adčuvaje peŭnuju reŭnaść ci padazronaść z nahody taho, što ŭ Biełarusi namieciłasia niekatoraje palapšeńnie stasunkaŭ z Zachadam.
«Heta narmalna. Zachad źjaŭlajecca dla nas druhim pa značnaści handlova-ekanamičnym partnioram. Heta absalutna ŭ intaresach Biełarusi mieć narmalnyja adnosiny ź Jeŭrasajuzam i inšymi zachodnimi krainami. Ad hetaha, možna skazać, zaležyć i los našaj krainy»,— dadaŭ Uładzimir Makiej.
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie63
Kamientary