Aŭtar nadmahilnaha pomnika Anatolu Kapskamu patłumačyŭ, čamu jon zrobleny ŭ vyhladzie «Barysaŭ-Areny»
Na hadavinu z dnia śmierci zasnavalnika futbolnaha kłuba BATE Anatola Kapskaha, u vioscy Dziamidaŭka, dzie jon pachavany, adbyłosia ŭračystaje adkryćcio pomnika.
«Naša Niva» pahutaryła sa skulptaram, aŭtaram pomnika, Mikałajem Kapšajem pra toje, čamu pomnik zrobleny ŭ vyhladzie «Barysaŭ-Areny».
«Heta była kankretnaja zamova jaho svajakoŭ, što pomnik pavinien nahadvać «Barysaŭ-Arenu». Dy heta i zrazumieła. Stadyjon — heta jaho dzicia, heta mara Anatola Anatoleviča», — raskazvaje skulptar.
Kapšaju spatrebiłasia čatyry miesiacy, kab zrabić pomnik.
«Sam pomnik ad pačatku da kanca prydumaŭ ja. Ja byŭ asabista znajomy z Kapskim i viedaŭ, što heta čałaviek ścipły, nikoli nie hnaŭsia za modaj, nie lubiŭ publičnaści. I jašče Anatol vielmi nie lubiŭ jarkija, čyrvonyja kolery», — kaža Mikałaj Kapšaj.
Lejtmatyvam pomnika, kaniečnie, staŭ futboł. Nie tolki abrysy pomnika nahadvajuć «Barysaŭ-Arenu», ale i niekatoryja elemienty taksama adsyłajuć da futbolnaj temy. Vazy, naprykład, vykananyja ŭ formie kubkaŭ, jość elemienty, jakija paŭtarajuć futbolny miač.
«Vy viedajecie, što Anatol Anatolevič pachavany pobač sa svaim baćkam? Dyk voś, pomnik baćku Kapski zamaŭlaŭ sam. Tamu majoj zadačaj jak skulptara było zrabić tak, kab hetyja dva pomniki harmaniravali. Darečy, jany vykananyja z adnaho i taho ž kamieniu», — dadaŭ skulptar.
Mikałaj Kapšaj pryznaŭsia, što ŭžo naviedaŭ mahiłu Kapskaha. I svajoj pracaj zastaŭsia zadavolenym.
«Spadziajusia, što Anatolu Anatoleviču taksama spadabałasia», — dadaŭ skulptar.
Kamientary