Kijeŭ vajuje — Minsk marakuje

Raniej, kali Maskva ŭvachodziła ŭ klinč z Kijevam, ŭ biełaruskaj miedyjnaj prastory daminavali prarasijskija traktoŭki. Maŭlaŭ, znoŭ z tych aranžavych uvieś ahoń haryć. Ciapierašniaja ž rasijska-ukrainskaja hazavaja vajna aśviatlajecca bolej zbałansavana.

Admietna, što vieličeznaje intervju z pasłom Ukrainy ŭ Biełarusi Iharam Lichovym daŭ blizki da biełaruskich uład Interfaks-Zachad. U zahałovak vyniesiena krasamoŭnaja cytata: «Hazavy šantaž nie moža mieć pierśpiektyŭ u XXI stahodździ».

U liku inšaha pasoł anansuje vizit Alaksandra Łukašenki na Ukrainu. Dakładniej, havorka idzie navat pra dva vizity — spačatku pracoŭny, a potym i aficyjny.

Trochi raniej toj samy Interfaks-Zachad raspaŭsiudziŭ žorstkija ŭ dačynieńni da Kramla vykazvańni Siarhieja Musijenki, kiraŭnika analityčnaha centra EcooM, što taksama maje reputacyju praŭradavaj struktury.

Analityk zaklikaŭ zrabić vysnovy z kanfliktu miž Maskvoj i Kijevam, bo «my sutykniemsia z takim samym žorstkim presinham». U pryvatnaści, na jaho dumku, varta aktyvizavać prajekt tranzitu ŭkrainskaj elektraenierhii cieraz našu krainu ŭ rehijon Bałtyi.

Źviarnicie ŭvahu na voś hetaje reziume ahienctva: «Kiraŭnik JesooM miarkuje, što realizacyja prajekta z Ukrainaj i Litvoj mahła b stymulavać supracu Jeŭrapiejskaha sajuza ź Biełaruśsiu jak z nadziejnym i pradkazalnym partnioram».

Takim čynam, ataka «Hazproma» na Ukrainu nie tolki ŭstryvožyła biełaruskaje načalstva (što całkam naturalna), ale i vidavočna nadała jamu achvoty naładžvać stasunki jak z Kijevam, tak i ź ES.

Što tyčycca sustrečy Łukašenki ź Juščankam, to tut usie ahladalniki ŭžo bajacca suročyć… Jana niekalki razoŭ anansavałasia jašče letaś, ale kožny raz niešta nie sklejvałasia.

Kamień sutyknieńnia — pytańnie ab staroj (uźnikłaj jašče na pačatku 90-ch, padčas haspadarčaha biedłamu ŭ źviazku z raspadam SSSR) zapazyčanaści ŭkrainskich pradpryjemstvaŭ biełaruskim. Kijeŭ nie zachacieŭ pryznavać doŭh dziaržaŭnym. Uźnikli roznahałośsi i nakont sumy. Praz heta Minsk užo dziesiać hadoŭ (!) nie ratyfikuje pahadnieńnie ab dziaržaŭnaj miažy z Ukrainaj.

Zrešty, nie budziem pierakazvać uvieś hety doŭhi zabłytany siužet. Adrazu reziume. Jak miarkuje minski palityčny ahladalnik Raman Jakaŭleŭski, baki, badaj, daśpieli narešcie da raźviazki hetaha pytańnia, bo abstaviny padciskajuć.

Ukrainie treba ŭrehulavać pamiežnyja niuansy ŭ źviazku z kursam na intehracyju ŭ Jeŭropu. Biełaruś moža atrymać zavisły doŭh kali nie hrašyma, to, naprykład, elektraenierhijaj, miarkuje ahladalnik.

Zvyšzadača ž bakoŭ — znajści dadatkovyja punkty apory ŭ supraćstajańni rasijskamu hazavamu dyktatu. U pryvatnaści — namacać varyjanty bolej ŭzhodnienaj tranzitnaj palityki.

«Nie varta, kaniečnie, dumać, što zaŭtra Minsk i Kijeŭ utvorać niejki enierhietyčny aljans suprać Kramla», — kaža Jakaŭleŭski. Razam z tym, miarkuje jon, biełaruskaje kiraŭnictva vidavočna navažyłasia «stać bolej samastojnym rehijanalnym aktaram». U pryvatnaści, i cieraz prajekt enierhamasta miž Ukrainaj dy Bałtyjaj.

Letaś Juščanka zaprašaŭ biełaruskaha kiraŭnika na forum, pryśviečany 75-m uhodkam Haładamoru, ale tak i nie dačakaŭsia. Nie vyklučana, što Minsk nie zachacieŭ dražnić Maskvu. Zaraz ža impieratyvy ekanamičnaha vyžyvańnia dadajuć biełaruskamu načalstvu rašučaści. Tym bolej što ad Maskvy lhotaŭ na pierśpiektyvu čakać nie vypadaje ŭ lubym razie. Pucin tolki što zajaviŭ: i ź Biełaruśsiu niepaźbiežna piarojdziem na rynkavyja ceny hazu!

A voś vam i chod Jeŭropy. Śviežaja navina: jeŭrakamisar pa enierhietycy Pijebałhs prapanavaŭ ministru zamiežnych spraŭ Litvy Ušackasu «zasiarodzicca na pabudovie ŭłasnaj novaj atamnaj elektrastancyi, jakaja mahła b taksama vyrašyć i enierhietyčnyja patreby Biełarusi».

Takim čynam, ES raspačynaje kontrhulniu. I Biełaruś pry razumnaj, hnutkaj palitycy mahła b zajmieć realnyja enierhietyčnyja (i nie tolki) dyvidendy ad zbližeńnia ź Jeŭropaj.

• 0
• 0
• 0
• 0
• 0
• 0
• 0
• 0