Navukoŭcy ŭpieršyniu zafiksavali aranžavuju akułu-niańku FOTA
Hety vypadak nie tolki staŭ pieršym zadakumientavanym prykładam ksantyzmu dla hetaha vidu, ale i ździviŭ daśledčykaŭ biełymi vačyma žyvioły, što pakazvaje na mahčymuju kambinacyju adrazu dźviuch redkich hienietyčnych anamalij, jakija robiać hetuju asobinu jašče bolš vyklučnaj źjavaj u pryrodzie.
Akijan poŭny samych dziŭnych i časam navat nievierahodnych istot. Adnak kali my dumajem pra akuł, va ŭjaŭleńni zvyčajna ŭźnikaje vobraz strymanaha šeraha drapiežnika, jaki raźličvaje na vostryja zuby i chutkaść. Ale adna akuła vyrašyła pajści inšym šlacham.
Jak piša IFL Science, upieršyniu ŭ historyi la bierahoŭ Kosta-Ryki była zaŭvažana akuła-niańka (Ginglymostoma cirratum) jarka-aranžavaha koleru.
Hetuju niezvyčajnuju asobinu ŭbačyli ŭ minułym hodzie padčas spartyŭnaj rybałki niepadalok ad Nacyjanalnaha parku Tartuhiera. Fatahrafii chutka raźlacielisia pa sacyjalnych sietkach, a niadaŭna navukoŭcy apublikavali daśledavańnie hetaj znachodki. Zhodna ź im, akułu złavili na hłybini 37 mietraŭ, a paśla vymiareńniaŭ adpuścili. Jaje daŭžynia składała kala dvuch mietraŭ, a skura mieła nasyčany žoŭta-aranžavy koler.
Taki niezvyčajny koler tłumačyccy hienietyčnym parušeńniem pihmientacyi, jakoje viadomaje jak ksantyzm. Jano pryvodzić da zališniaj vypracoŭki žoŭtych i aranžavych pihmientaŭ.
Paviedamlajecca, što heta pieršy zadakumientavany vypadak ksantyzmu ŭ akuł-nianiek i ŭvohule pieršy zafiksavany vypadak siarod lubych vidaŭ chrastkovych ryb u Karybskim mory.
Ale i heta nie ŭsio. U akuły byli biełyja vočy «biez bačnaj radužnaj abałonki», u toj čas jak zvyčajna jany čornyja. Daśledčyki miarkujuć, što heta moža być redki vypadak albina-ksantyzmu — spałučeńnia adrazu dźviuch pihmientnych anamalij.
Zvyčajna takaja jarkaja afarboŭka ličycca niebiaśpiečnaj dla vyžyvańnia, bo robić žyviołu lohkaj mišeńniu dla drapiežnikaŭ. Adnak akuła-niańka sama źjaŭlajecca drapiežnikam siaredniaha ŭzroŭniu, jaki charčujecca drobnaj rybaj, maluskami i rakapadobnymi. Toj fakt, što hetaja asobina dasiahnuła darosłaha pamieru, śviedčyć pra toje, što jaje niezvyčajnaja pihmientacyja, chutčej za ŭsio, nie paŭpłyvała na jaje vyžyvańnie.
Choć asnoŭnaj pryčynaj ksantyzmu ličycca hienietyka, navukoŭcy nie vyklučajuć i inšyja faktary.
«Na pihmientacyju mohuć upłyvać blizkarodnasnaje skryžavańnie, stres, pavyšanaja tempieratura vady i harmanalnyja zboi», — tłumačać aŭtary daśledavańnia.
Ciapier čytajuć
Pamiatajecie ŭkrainku, jakuju rasijanie pryviazali da słupa? Tyja, chto jaje katavaŭ, za hady vajny amal usie zahinuli. A voś što robić ciapier jana2424
Kamientary