U Baranavičach milicyjant z tabielnaj zbroi zastreliŭ sabaku
Uviečary 3 studzienia ŭ adnym z pryvatnych dvaroŭ na vulicy Dziekabrystaŭ u Baranavičach ničyjny sabaka pačaŭ kidacca na haspadara doma. Mužčyna vyklikaŭ milicyju — supracoŭnikam milicyi daviałosia zastrelić ahresiŭnaha sabaku, kab nie dapuścić trahiedyi, piša «Naš kraj».
Ničyjny sabaka źjaviŭsia ŭ pryvatnym siektary za niekalki dzion da taho, što adbyłosia.
— Spačatku my bačyli hetaha sabaku kala bramki našych susiedziaŭ. U ich varoty i bramka začyniajucca na zamok, dvor abniesieny vielmi vysokim parkanam, tak što trapić unutr sabaka nie moh. Tak i pralažaŭ niekalki dzion pobač, — raspaviała Natalla, haspadynia doma, u jakim adbyŭsia incydent. — Prykładna ŭ abied 2 studzienia my z mužam ubačyli hetaha sabaku ŭ našym dvary. Praz bramku jon ŭvajści nie moh — chutčej za ŭsio, pieraskočyŭ praz parkan.
Pa słovach Natalli, spačatku sabaka pavodziŭ siabie bolš-mienš spakojna, choć i pačynaŭ rykać i vyskalać zuby kožny raz, kali da jaho chtości sprabavaŭ padyści. Muž Natalli niekalki razoŭ sprabavaŭ vyvieści žyviolinu z dvara, ale nie zdoleŭ: sabaka nie padpuskaŭ da siabie ni na krok.
Natalla taksama kaža, što telefanavała na śpiecaŭtabazu, prasiła pryjechać i zabrać sabaku, ale joj adkazali, što słužba pracuje ŭ peŭnyja dni, a siońnia ŭ jaje vychadny.
— Mnie skazali: kali raptam sabaka pačnie pavodzić siabie vielmi ahresiŭna i budzie kidacca na ludziej, telefanavać u milicyju, — raspaviadaje Natalla.
Uviečary 3 studzienia haspadary doma naohuł nie mahli vyjści ŭ dvor. Jak tolki adčynialisia ŭvachodnyja dźviery, sabaka tut ža padbiahaŭ i pačynaŭ hučna brachać, skalić zuby, rykać i kidacca ŭ bok ludziej.
— Mužu ničoha nie zastavałasia, akramia jak patelefanavać u milicyju. Supracoŭniki milicyi zastrelili sabaku, — raspaviadaje Natalla. — Heta byŭ vymušany zachad: kali b nie realnaja niebiaśpieka, kali b my nie bajalisia za svajo žyćcio, to sami b pastaralisia vypravadzić žyviolinu z dvara. My z mužam lubim žyvioł: u nas u dvary žyvuć čatyry katy, dvuch ź jakich my padabrali na vulicy i pakinuli ŭ siabie. Ja dahetul nie mahu pryjści ŭ siabie paśla taho, što zdaryłasia.
Byłoha supracoŭnika kontrraźviedki KDB aryštavali za zdradu dziaržavie9
Kamientary