Za bojku z mužčynam u majcy «DNR» minčuku prysudzili paŭtara hoda vypraŭlenčych pracaŭ

Letam aktyvist biełaruskich prarasijskich ruchaŭ Siarhiej Łanavienka raskazaŭ, što jaho źbili la handlovaha centra «Moma» za majku z vyjavaj hierba i ściaha «DNR».

Pavialičyć

«Jedzie mašyna, čyrvony «Nisan». Mnie adtul pakazvajuć «fak», ja adkazaŭ tym ža. Z mašyny pačułasia: «Chadzi siudy». Nu, ja i padyšoŭ. Pytajusia žartam: «Vy što, banderaŭcy?» Jany kažuć, što, maŭlaŭ, tak. Słova za słova — pačałasia bojka. Atrymlivaju ŭdar ad adnaho ŭ levuju skułu. U mianie ŭdar pastaŭleny, bić nielha. Prymianiaju pryjom, kidaju adnaho na ziamlu. Tady nie ŭtrymaŭ druhoha, ad jakoha atrymaŭ nahoj u tvar», — raskazvaŭ «NN» Łanavienka.

U vyniku sprava atrymała praciah. U pačatku listapada sudom Zavodskaha rajona Minska byŭ vyniesieny prysud pa artykule 149 č.1 «Naŭmysnaje naniasieńnie mienš ciažkich cialesnych paškodžańniaŭ, jakija nie źjaŭlajucca niebiaśpiečnymi dla žyćcia».

Na łavie padsudnych apynuŭsia Jaŭhien Dźmitryjeŭ. Mienavita jon pryjšoŭ na dapamohu svajmu siabru, jaki zaviazaŭsia z Łanavienkam.

Pavialičyć

«Toj chłopčyk u majcy «DNR» aburyŭsia praz ukrainskuju stužku ŭ mašynie majho siabry. Łanavienka pieršym šturchanuŭ siabra, paśla pačali bicca. Majho siabra pakłali tvaram u bieton. Tady ja pryjšoŭ jamu na dapamahu. Kryŭdna, što ŭ našaj krainie złačyncami stanoviacca ludzi, jakija prosta sprabujuć dapamahčy», — raskazvaje Dźmitryjeŭ.

U vyniku Jaŭhien Dźmitryjeŭ byŭ asudžany da 1,5 hoda vypraŭlenčych pracaŭ. «Heta značyć, budu chadzić na zvyčajnuju pracu, ale 25% zarobku adličvać na karyść dziaržavy», — raskazvaje jon.

Pisać skarhu na prysud Jaŭhien nie źbirajecca: «Ščyra kažučy, u mianie niama na heta ni času, ni hrošaj, u mianie małoje dzicia».

Na sudzie abvinavačany zmoh pamirycca z paciarpiełym. Łanavienka nie mieŭ nijakich pretenzij, ale prakuror usio adno zapatrabavaŭ taki prysud. Sudździa całkam zadavoliŭ jaho.

Admietna, što druhi ŭdzielnik incydentu Alaksandr Buzo prachodziŭ pa spravie ŭ jakaści śviedki. I Buzo, i Łanavienka na sudzie skazali, što źjaŭlajucca etničnymi ŭkraincami. Dźmitryjeŭ — biełarus.

U sacyjalnych sietkach šmat zdymkaŭ, dzie Łanavienka fotkajecca z rasijskim ściaham. «Ja liču na siońnia heta simvałam spraviadlivaści ŭ śviecie», — kazaŭ jon. Ni da jakich partyj ci arhanizacyj Łanavienka siabie nie adnosić, choć letaś udzielničaŭ u akcyi na płoščy Niezaležnaści ŭ padtrymku sajuza Biełarusi i Rasii.

• 0
• 0
• 0
• 0
• 0
• 0
• 1
• 0