Siłaviki zatrymali mužčynu z Navahradka, jaki nazyvaŭ siabie «starakatalickim ksiandzom» i vioŭ epatažny instahram
«Zatrymali za toje, što zaraziŭ kahości ŚNIDam», — paviedamiła nam adna krynica.
Dźmitryj Bondar pryciahnuŭ da siabie ŭvahu paśla taho, jak daŭ ščyraje intervju ŭ pačatku hoda sajtu kyky.org. U im mužčyna nazyvaŭ siabie to ksiandzom starakatalickaj carkvy, to jepiskapam śvietu.
Jon słužyŭ u siabie doma ŭ Navahrudku, u pamiaškańni, jakoje jon nazyvaŭ «starakatalickaj kaplicaj Śviatoha Marcina». Pa ŭsioj krainie jość niekalki dziasiatkaŭ prychadžan starakatalickaj carkvy. Hetaja carkva ŭtvaryłasia ŭ kancy 1870-ch, kali častka duchavienstva nie pryznała dahmat ab biespamyłkovaści Papy i biezzahannym začaćci Panny Maryi. Supołka ŭ Biełarusi ŭtvaryłasia ŭ 2005 hodzie, a ŭ śviatary byŭ vyśviečany Dźmitryj Bondar. Ad 2013 hoda parafija ŭvachodzić u jurysdykcyju Starakatalickaj carkvy ŭ Polščy.
Dźmitryj Bondar vyłučaŭsia svaim jarkim instahramam. Naprykład, jon vystaŭlaŭ paŭaholenyja zdymki ź indyjskich plažaŭ, zdymaŭsia raździety pierad ałtarom, na śpinie ŭ jaho tatuiroŭka ŭ vyhladzie aniolskich kryłaŭ, fotkaŭsia z tranśviestytami i na fonie darahich aŭtamabilaŭ. Pry hetym amal na kožnym zdymku jon byŭ u katalickaj sutanie.
«Erotyka kranaje dušu, a parnahrafija — člen», — pisaŭ jon na svajoj staroncy.
Sajt katolik.life adreahavaŭ zajavaj, što nijakaha dačynieńnia da katalickaj carkvy Dźmitryj Bondar nie maje. A ksiondz Viačasłaŭ Barok iranična zaŭvažyŭ: «Mahčyma, na jaho tak paŭpłyvaŭ BRSM».
Bondar 10 hadoŭ addaŭ hetaj arhanizacyi, pracavaŭ u Navahrudskaj haradskoj arhanizacyi, jašče ŭznačalvaŭ miascovuju kinavideasietku.
Ad troch nie źviazanych pamiž saboj krynic nam stała viadoma, što Dźmitryj Bondar byŭ zatrymany ŭ siaredzinie kastryčnika.
«Sprava znachodzicca ŭ vytvorčaści ŭ Hrodzienskim abłasnym upraŭleńni Śledčaha kamiteta, my tut ničoha nie viedajem», — adkazvali nam u Navahradskim SK.
U samim Hrodnie ad niejkich kamientaroŭ admovilisia. Maŭlaŭ, sprava nie rezanansnaja. A šukać niešta pra fizičnych asobaŭ u ich niama času.
«Zatrymali za toje, što zaraziŭ kahości ŚNIDam», — paviedamiła nam adna krynica. «Šmat što kažuć: i što ŚNIDam zaraziŭ, i što zvarjacieŭ, i pra narkotyki», — pačuli my ad druhoj krynicy.
Kali havorka sapraŭdy pra śviadomaje zaražeńnie ŚNIDam, to havorka viadziecca pra artykuł 157 Kryminalnaha kodeksa. Pavodle hetaha artykuła, abvinavačanamu moža pahražać da siami hadoŭ źniavoleńnia.
Ułaśnik kompleksu «Litoŭka», dzie i znachodziłasia «rezidencyja biskupa śvietu», Siarhiej Koval admaŭlajecca kamientavać zatrymańnie: «Heta asabistaje. Nijakich kamientaroŭ nie budzie».
Pavodle niepaćvierdžanaj infarmacyi, u kompleksie Litoŭka siłaviki pravodzili pieratrus. Mahčyma, heta i stała adnoj z pryčyn zakryćcia siadziby dla naviedvańnia turystami.
Ciapier čytajuć
Biełaruski psichijatr: Palihraf z 100 chłusaŭ nie vyjavić dvuch. A siemiarych tych, chto kaža praŭdu, abvinavacić u chłuśni — i heta pa aptymistyčnych acenkach1212
Biełaruski psichijatr: Palihraf z 100 chłusaŭ nie vyjavić dvuch. A siemiarych tych, chto kaža praŭdu, abvinavacić u chłuśni — i heta pa aptymistyčnych acenkach12
Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia7777
Kamientary