Pad Vałožynam maršrutka ŭrezałasia ŭ bietonnyja błoki: 2 čałavieki zahinuli, 14 u balnicy
18 kastryčnika kala 19:30 na trasie M6 kala Vałožyna zdaryłasia avaryja: maršrutka «Minsk — Hrodna» zajechała ŭ bietonnuju aharodžu, jakaja ŭ budučyni budzie padzialać sustrečnyja patoki, piša Autogrodno.by.
Udar byŭ takoj siły, što mator mikraaŭtobusa apynuŭsia ŭ sałonie.
Jak paviedamiła aficyjny pradstaŭnik USK pa Minskaj vobłaści Taćciana Biełanoh, na miescy zdareńnia zahinuła 66-hadovaja pasažyrka maršrutki, paśla ŭ balnicy pamior 71-hadovy mužčyna. Pa papiarednich dadzienych, jašče 14 čałaviek z traŭmami roznaj stupieni ciažkaści špitalizavany.
— Svaimi nahami z maršrutki vyjšli tolki 3 čałavieki, u tym liku i kiroŭca, — piša na svajoj staroncy ŭ Facebook Valer Miniec i dadaje, što na tym učastku dziejničała abmiežavańnie ŭ 50 km/h.
Taksama jość infarmacyja, što ŭ čaćvier na hetym učastku trasy źmianili arhanizacyju darožnaha ruchu.
Inšy kiroŭca, Aleh, jaki prajazdžaŭ hetaje miesca minułaj nočču, paviedamiŭ: «Tam pierad abjezdami ŭ bolšaści miescaŭ nie stajać śviatłoadbivalniki i davodziłasia ŭklučać dalokaje śviatło, kab patrapić kudy treba».
U hrupie AŭtaHrodna pra nastupstvy avaryi raspavioŭ Jaŭhien: «Žančyna zahinuła. Tak. Muža pavieźli ŭ lakarniu, byŭ u prytomnaści. Chłopca vykinuła praz łabavoje. Dziaŭčynka hadoŭ siami ŭ vielmi drennym stanie. Ja navat nie mahu tut napisać, što ź joj stała. Dziaŭčynka 6 kłasa z mamaj jechała. Taksama ŭ drennym stanie, jany viartalisia ź lačeńnia z Baraŭlanaŭ. Kiroŭca kazaŭ, što aślapiła «sustrečka». Ale toj, chto jechaŭ za im, skazaŭ, što nichto nikoha nie ślapiŭ. Pryčynu skažuć śledčyja».
Kamientary