Čaračeń, Sparyš, Śmilevič… Pabudavać karjeru ŭ apazicyjnych partyjach i ruchach možna za niekalki miesiacaŭ
Niedachop ludziej i srodkaŭ padšturchoŭvajuć da taho, što novyja ludzi vielmi imkliva budujuć karjery i prasoŭvajucca pa ijerarchičnych leśvicach u apazicyjnych partyjach.
33-hadovy Siarhiej Čaračeń, vidać pa ŭsim, źmienić la styrna Biełaruskaj sacyjał-demakratyčnaj hramady Stanisłava Šuškieviča. Heta biznesoviec, jaki raniej źjaŭlaŭsia siabram aficyjnaj kamunistyčnaj partyi. Naprykancy 2017 hoda Čaračeń staŭ siabram BSDH, a ŭžo sioleta maje ŭznačalić arhanizacyju. Šuškievič kiravaŭ partyjaj ad 1998 hoda.
Były palitviazień i biznesoviec Siarhiej Skrabiec taksama amal imhnienna staŭ u BSDH kiraŭnikom minskaj filii, a taksama ŭznačaliŭ vybarčy štab partyi.
Možna ŭspomnić, što heta nie pieršy vypadak, kali ŭ sacyjał-demakratyčnych partyjach čałaviek zvonku tak chutka padymajecca na samuju viaršyniu. U 2005 hodzie były rektar BDU Alaksandr Kazulin tolki ŭstupiŭ ŭ BSDP i adrazu staŭ kiraŭnikom.
Tady ŭ Kazulina byŭ finansavy patencyjał, jamu dla ŭdziełu ŭ prezidenckich vybarach patrebna była palityčnaja siła, jakuju jon znajšoŭ u vyhladzie sacyjał-demakrataŭ. Faktyčna havorka viałasia pra kuplu partyi. «Partyja dvojčy nie pradajecca», — kazaŭ paźniej były śpikier Viarchoŭnaha Savieta Miečysłaŭ Hryb.
Nie stała tut vyklučeńniem i niezarehistravanaja Sacyjał-demakratyčnaja partyja Mikałaja Statkieviča. Hienieralnym sakratarom partyi staŭ 31-hadovy Siarhiej Sparyš, jaki da hetaha prabyŭ u struktury ŭsiaho paru miesiacaŭ. Sparyš zapomniŭsia svaimi rezkimi vykazvańniami ab prychilnikach praviadzieńnia kancertu na Dzień Voli.
Paŭhoda pabyła ŭ «Moładzi BNF» Hanna Śmilevič pierad tym, jak uznačalić arhanizacyju. Adnak tam byŭ sapraŭdy vialiki konkurs. I za Śmilevič hałasavali delehaty, a nie abirali na biezalternatyŭnaj asnovie.
Były kiraŭnik Partyi zialonych Lolik Uškin (Aleh Novikaŭ) kaža, što ŭ 2007 hodzie staŭ staršynioj, bo partyja šukała aktyŭnaha čałavieka ŭ Minsku. Heta było adzinym patrabavańniem. Sam Uškin ustupiŭ u Partyju zialonych u 2003 hodzie.
«Heta była miortvaja rehijanalnaja partyja, jakaja dla taho, kab ažyvić jaje, šukała čałavieka ŭ Minsku. Znajšoŭsia ja», — kaža Uškin. Zialonymi jon pakiravaŭ da 2015 hoda.
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie10
Kamientary