Jon budavaŭ Nacyjanalnuju biblijateku i Pałac Niezaležnaści. Ministr architektury z Sucharava vieryć, što praz dvaccać hadoŭ Minsk budzie jak Praha
«Naša Niva» praciahvaje znajomić vas z novymi čynoŭnikami, jakija atrymali svaje partfieli 18 žniŭnia. Na čarzie — ministr architektury i budaŭnictva Dźmitryj Mikulonak. Jon źmianiŭ na hetaj pasadzie Anatola Čornaha, taho samaha, jaki pazbaviŭsia svajoj pasady praź nieadramantavany dach na Aršanskim instrumientalnym zavodzie.
Dźmitryju Mikulonku 45 hadoŭ. Jon minčuk. Uzhadvaje, što baćki zdymali žyllo ŭ rajonie sučasnaha parka «Civali» la stancyi mietro «Spartyŭnaja». «Na toj čas heta była adna ź viosak la stalicy, jakaja paźniej uvajšła ŭ miežy Minska», — kazaŭ jon u intervju ahienctvu «Minsk-naviny».
Mikulonak skončyŭ u 1996 hodzie Biełaruskuju dziaržaŭnuju politechničnuju akademiju (ciapier — BNTU), paśla čaho adrazu pajšoŭ pracavać inžynieram pa budaŭnictvie ŭ «Minskžyłbud» (paźniej pierajmienavany ŭ MAPID). Skažam adrazu, što Dźmitryj Mikulonak bolš budaŭnik, čym architektar, u čym pryznajecca sam.
«Ja časta spračajusia z architektarami. U dojlidaŭ i budaŭnikoŭ časam uźnikajuć narmalnyja pracoŭnyja sprečki, jakija zaŭsiody buduć — jany navat patrebnyja, kab znajści załatuju siaredzinu pamiž palotam fantazii i praktyčnaj dziejnaściu. Napeŭna, z hetych sprečak i supiarečlivych mierkavańniaŭ i naradžajecca kančatkovy ŭježny dla ŭsich varyjant. Architektary pa-asablivamu ŭsio bačać. A naša zadača ich krychu pryziamlić», — pryznavaŭsia Mikulonak.
U 2004 hodzie, paśla vaśmi hadoŭ pracy na MAPIDzie, Mikulonak pierajšoŭ va ŭpraŭleńnie pa budaŭnictvu Minharvykankama, dzie adkazvaŭ za budaŭnictva Nacyjanalnaj biblijateki. Potym na rachunku Dźmitryja Mikulonka buduć i inšyja znakavyja budynki stalicy.
Naprykład, «Minsk-Arena». Za jaje ŭźviadzieńnie Mikulonak atrymaŭ miedal «Za pracoŭnyja zasłuhi». Budavaŭ Pałac Niezaležnaści, «Čyžoŭku-Arenu», Muziej Vialikaj Ajčynnaj vajny i inšyja abjekty.
Apošnija siem hadoŭ Dźmitryj Mikulonak byŭ hienieralnym dyrektaram Upraŭleńnia kapitalnaha budaŭnictva Minharvykankama. Z hetaj pasady jon i pryjšoŭ u ministerstva.
Kaža pra siabie, što kiraŭnik dastatkova strohi, padnačalenych uvieś čas trymaje ŭ tonusie. Z apošnich płanaŭ budučaha ministra: budaŭnictva dvuch novych mikrarajonaŭ Minska, a taksama ŭźviadzieńnie palikliniki i dziciačych sadkoŭ.
«Mnie padabajecca, jak źmianiŭsia za apošni čas naš histaryčny centr. Spadziajusia, hadoŭ praz 20 jaho ŭsie buduć usprymać jak staruju Ryhu abo Prahu», — kazaŭ budučy ministr.
Žonka ministra Natalla skončyła Minskaje miedvučylišča. Jana pracuje staršaj miedsiastroj apieracyjnaha błoka RNPC transpłantacyi orhanaŭ i tkanak. «Heta majo žyćcio, i ŭ inšym miescy ja siabie nie baču», — kazała jana ŭ intervju telekanału STV. U miedycynu Natalla pryjšła ŭ 18-hadovym uzroście.
U pary dvoje dziaciej. Starejšy syn Arciom užo student, jon pa šlachu baćki pastupiŭ u BNTU, a dačka Hanna jašče školnica. Žyvie siamja ŭ minskim mikrarajonie Sucharava.
«Usio pavinna być pryhoža, ale prahmatyčna. Nieabchodna, kab pabudavanyja budynki mieli nie tolki pryvabny źniešni vyhlad, ale i byli funkcyjanalna prydatnyja dla ekspłuatacyi na praciahu ŭsiaho pieryjadu», — takoje daručeńnie ministr davaŭ svaim padnačalenym na cyrymonii pradstaŭleńnia na pasadzie.
Kamientary