Maskoŭski abłasny sud prysudziŭ da pažyćciovaha źniavoleńnia čatyroch členaŭ «bandy HTA», jašče adzin atrymaŭ 20 hadoŭ strohaha režymu, piša rbc.ru.
Usie jany pryznanyja vinavatymi ŭ zabojstvie 17 čałaviek na padmaskoŭnaj trasie.
Raniej na łavie padsudnych byli dzieviać čałaviek, ale čaćviora zahinuli ŭ vyniku pierastrełki ŭ sudzie ŭ žniŭni minułaha hoda.
Praces ciahnuŭsia kala dvuch hadoŭ.
Členy bandy, jak pryznaŭ sud, u 2012—2014 hadach ździejśnili 14 napadaŭ na aŭtamabilistaŭ na trasie M-4 «Don» u Maskoŭskaj vobłaści. Złačyncy spyniali aŭtamabili z dapamohaj raskładzienych na darozie šypoŭ, rasstrelvali pasažyraŭ i rabavali ich. Usiaho byli zabityja 17 čałaviek, jašče siamiora paciarpiełych ad napadaŭ vyžyli.
Nazva «banda HTA» zamacavałasia za hrupoŭkaj pa anałohii z kampjutarnaj hulnioj Grand Theft Auto (GTA), hieroj jakoj rabuje i zabivaje kiroŭcaŭ.
Złačyncaŭ zatrymali ŭ listapadzie 2014, pry hetym mierkavany lidar bandy byŭ zabity. Bandu vyjavili na zaharadnym učastku supracoŭnika Hienprakuratury RF. Toj paźniej daŭ śledstvu pakazańni, što zdavaŭ adnamu z bandytaŭ u arendu haspadarčuju pabudovu, nie viedajučy, čym toj zajmajecca.
Abvinavačvańnie pryjšło da vysnovy, što bandyty mieli vyklučna karyślivy matyŭ — jany zhaniali aŭtamabili zabitych, vykradali hrošy i kaštoŭnaści; ahulny košt skradzienaha skłaŭ nie mienš za 17 młn rub.
Hrošy byli patrebnyja členam bandy, kab zładzić uzbrojeny pieravarot va Uźbiekistanie, — heta, jak pisała «Novaja hazieta», vynikała z vyvučanych sudom materyjałaŭ śledstva.
Pa mienšaj miery adnaho z členaŭ bandy va Uźbiekistanie pieraśledavali za ekstremizm, jon navučaŭsia ŭ Pakistanie ŭ śpiecyjalizavanym łahiery ŭ hrupie isłamskaha džychadu, jak vynikała ź jaho pakazańniaŭ. Padčas trenirovak bandyty stralali pa mišeniach z fatahrafijaj prezidenta Isłama Karymava, pisała «Novaja hazieta».
Na dumku bajevikoŭ, prezident «davioŭ krainu da halečy».
Advakaty abvinavačanych nastojvali, što ich padabaronnyja ździajśniali napady nie pa svajoj voli — lidar bandy prymušaŭ ich da złačynstvaŭ, pahražajučy zabojstvam.
1 žniŭnia minułaha hoda členy bandy zładzili pierastrełku ź siłavikami prosta ŭ budynku suda, kudy ich dastavili na čarhovaje pasiadžeńnie.
Nasupierak instrukcyi piaciarych abvinavačanych supravadžali ŭ sud ŭsiaho dvoje kanvairaŭ, adna ź jakich — žančyna; u zału pasiadžeńniaŭ ich vieźli na lifcie.
Bandyty napali na palicejskich i zavałodali ich zbrojaj. Kanvairy zmahli vyklikać padmacavańnie. Kali lift prybyŭ na treci pavierch suda, supracoŭniki Rashvardyi adkryli ahoń pa ŭzbrojenych abvinavačanych. Troje zahinuli na miescy. Jašče dvoje byli špitalizavanyja, adzin ź ich pamior u balnicy.
Ciapier čytajuć
Jak skłaŭsia los Jany Pačyckaj — dziaŭčyny, jakuju zatrymlivali razam z Kanavałavym i Kavalovym pa spravie ab terakcie ŭ mietro7
Kamientary