Jašče raz pa temie #pakietnada. Voś tolki što viarnuŭsia z «Rubloŭskaha». Vybirajučy sadavinu i aharodninu, pastaraŭsia zrabić usio, kab u kasiraŭ nie było nijakaj padstavy «pa zmoŭčańni» ŭkładać pradukty ŭ biaspłatny pakiet padčas zvažvańnia. Cybulinu ŭziaŭ tolki adnu i čystuju, hruški — dźvie, tamu ŭkładańnie hetaha ŭ pakiety było zusim niełahičnym. Ale nie. Kasirka, uziaŭšy cybulinu, imhnienna ŭkłała ŭ pakiet. Kažu: «Navošta? Tut zusim nie patrebny pakiet». Nul reakcyi, dakładniej, kasy złosny spahlad, u jakim pračytvałasia: «Idyjot, ci što?». Kažu hramčej i nastojliviej: «Navošta ŭkładvać u pakiet, nie treba pakieta». Kasirka sa złościu vymaje cybulinu, pakiet kamiačyć i špurlaje ŭbok, cybulinu kładzie na vahu i, kiŭnuŭšy na indykatar, kaža: «Nu i čto? Stolko žie zaviesiło». Mnie tady dajšło, nakolki idyjatyčny ŭ jaje vačach musiŭ być taki klijent, jak ja: nie choča brać pakiecik, bo baicca, što cybulina z pakiecikam budzie važyć na paru milihramaŭ bolš.
Niejki čas tamu była anałahičnaja situacyja, z toj tolki roźnicaj, što palemika adbyvałasia nie z kasirkaj, a ź inšym pakupnikom, što stajaŭ za mnoj u čarzie. Na maju zaŭvahu ŭ adras kasirki, što «pakiecik nie treba», pakupnik toj, jak daśviedčany haradžanin niedalokamu viaskoŭcu, paviedamlaje: «On biespłatnyj». Kažu: «No nie ekołohičnyj». Toj na dźvie siekundy skanfuziŭsia, ale chutka dajšoŭ da siabie i pradoŭžyŭ naśmiešliva: «I čto eto iźmienit?» Krychu paźniej kivaje na pakiet, pryniesieny mnoj z chaty i praciahvaje ŭ demaskatarskim duchu: «A vot čto eto vy kakoj-to nieekołohičnyj pakiet nositie». Kažu: «Kab dbać pra płanietu, fanatyzm nie patrebny, dastatkova dziejničać u miežach prostych mahčymaściaŭ».
Da čaho heta ja. Da taho, što ŭsio heta — drobiazi, ale jany vielmi napružvajuć. A mahli b nie napružvajuć. Dastatkova było b, kab zialonyja aktyvisty praviali paru razmovaŭ z kiraŭnictvam supiermarkietaŭ i rastłumačyli, što handlovyja centry ci kramy absalutna ničoha nie hublajuć, kali daduć instrukcyju kasiram nie naviazvać pakiety klijentam i taktoŭna stavicca da tych klijentaŭ, jakija admaŭlajucca ad biaspłatnych pakietaŭ.
A ciapier admysłovy pasus dla tych, chto maje napahatovie zakid u moj bok: «Dyk vaźmi i sam heta zrabi». Nie, ja nie budu hetaha rabić pa nastupnych pryčynach:
1) Dla takich razmoŭ pažadana adpaviednaja porcyja viedaŭ na temu ekałahičnych nastupstvaŭ biazdumnaha razdavańnia pakiecikaŭ. U mianie hetyja viedy paviarchoŭnyja, u zialonych aktyvistaŭ (jak miarkuju) — hłybokija.
2) Pažadana raspavieści pra dośvied inšych krain, u jakich supiermarkiety vyznačajucca ekałahičnaj uraźlivaściu. Aktyvisty heta zrobiać lepš za mianie.
3) Pažadana mieć dośvied takich razmovaŭ i śviadomaść, što adnadumcy-aktyvisty stajać za taboj. U zialonych aktyvistaŭ heta jość, u mianie — niama.
4) Dziasiatki tysiač hadoŭ nazad čałaviectva vynajšła cudoŭnuju reč: padzieł pracy. Hetaja vynachodka cudoŭna pracavała šmat viakoŭ i nie baču pryčyn, pa jakich treba ad jaje admaŭlacca. U mianie asnoŭnaja śfiera dziejnaści inšaja, i ŭ najbližejšaj budučyni nie maju namieru pierakvalifikoŭvacca ŭ ekałahičnaha aktyvista, anałahična jak nie maju namieru ŭstupać u arhanizacyju pa baraćbie sa ŚNIDam, choć heta taksama nadzvyčaj važna i aktualna.
Kamientary