Łukašenka moža jeździć i vučycca

Jak pieradajuć infarmacyjnyja ahienctvy, na sustrečy ŭ Luksemburhu ministry zamiežnych spravaŭ krainaŭ ES pahadzilisia prypynić na paŭhodu vizavyja abmiežavańni, nakładzienyja na Alaksandra Łukašenku i jahonych padnačalenych. Takim čynam jany spadziajucca paspryjać demakratyzacyi Biełarusi.

U śpisach nievyjaznych zastalisia piaciora čynoŭnikaŭ, jakija na dumku eŭrapiejcaŭ, mohuć być datyčnyja da źniknieńnia apanentaŭ ułady, a taksama falsyfikacyi vybaraŭ — staršynia CVK Lidzija Jarmošyna, ministar unutranych spravaŭ Uładzimier Navumaŭ, były kamandzir bryhady specnazu Dźmitry Paŭličenka, były kiraŭnik Rady biaśpieki Viktar Šejman, a taksama były ministar unutranych spravaŭ Jury Sivakoŭ.

U pieršapačatkovym śpisie nievyjaznych było 41 proźvišča. Aproč Łukašenki, dazvoł na ŭjezd u Eŭrasajuz atrymajuć namieśnica kiraŭnika Administracyi prezydenta Natalla Piatkievič, ministar adukacyi Alaksandar Radźkoŭ, ministar infarmacyi Uładzimier Rusakievič, ministar justycyi Viktar Hałavanaŭ, staršynia Biełteleradyjokampanii Alaksandr Zimoŭski, staršynia Kanstytucyjnaha sudu Piotar Mikłaševič, były kiraŭnik Administracyi prezydenta Hienadź Niavyhłas, były hałoŭny ideolah Aleh Pralaskoŭski, były staršynia KDB Ściapan Sucharenka.

Sankcyi suprać bolšaści ź ich byli ŭviedzienyja ŭ krasaviku 2006 hodu, adrazu pa prezydenckich vybarach.

Tym časam finansavyja sankcyi suprać A. Łukašenki i jahonych bližejšych čynoŭnikaŭ zastajucca ŭ sile. U 2006 hodzie Eŭraźviaz pastanaviŭ zamarozić rachunki i majomaść A. Łukašenki i niekalkich dziesiatkaŭ čynoŭnikaŭ ź jahonaha atačeńnia na terytoryi ŭsich krain ES.

«Biełaruski narod staić pierad histaryčnym vybaram: ruchacca ŭ kirunku demakratyi i niezaležnaści albo ŭ kirunku palityčnaj stahnacyi», — zaznačyła Benita Ferera-Valdner paśla sustrečy ź ministram zamiežnych spraŭ Biełarusi Siarhiejem Martynavym.

10 kastryčnika namieśnik ministra zamiežnych spravaŭ Biełarusi Valer Varaniecki zajaŭlaŭ žurnalistam pra toje, što kraina «čakaje źniaćcia ŭsich sankcyj na abmiežavańnie supracoŭnictva z ES», a taksama maje namier pačać pieramovy ab źnižeńni pamieru konsulskaha zboru za šenhienskija vizy dla biełarusaŭ.

U ramkach pasiadžeńnia ŭ Luksemburhu prachodziać pieramovy kiraŭnika biełaruskaha zamiežnapalityčnaha viedamstva Siarhieja Martynava z eŭrakamisaram pa zamiežnych suviaziach i palitycy dobrasusiedztva Benitaj Fereraj-Valdner, kiraŭnikom MZS Francyi Bernaram Kušneram i viarchoŭnym pradstaŭnikom ES pa zamiežnaj palitycy i biaśpiecy Chaŭjeram Salanam. Heta pieršyja za doŭhi čas sustrečy kiraŭnika MZS Biełarusi na takim vysokim uzroŭni.

Peŭnaja adliha ŭ adnosinach pačałasia ŭ žniŭni, kali Biełaruś vyzvaliła troch apošnich palitviaźniaŭ i ŭchiliłasia ad padtrymki Rasiei ŭ pryznańni niezaležnaści separatysckich hruzinskich rehijonaŭ Paŭdniovaj Asiecii i Abchazii.

Raniej paviedamlałasia, što niekatoryja dziaržavy chacieli pakinuć zabaronu na ŭjezd na terytoryju ES dla Łukašenki. U pryvatnaści, suprać taho, kab źniać sankcyi asabista z A. Łukašenki vystupali Halandyja, Švecyja i Partuhalija.

Dyplamaty ES spadziajucca, što admiena sankcyj paspryjaje demakratyzacyi Biełarusi. Što biełaruskija čynoŭniki, atrymaŭšy mahčymaść kantaktaŭ, stanuć nabiracca eŭrapiejskim ducham i eŭrapiejskimi žadańniami.

• 0
• 0
• 0
• 0
• 0
• 0
• 0
• 0