Ułady i arhanizatary śviatkavańnia stahodździa BNR pavinny znajści «załatuju siaredzinu», jakaja zadavolić usich, i pravieści mierapryjemstva cyvilizavana. Takoje mierkavańnie ŭ razmovie ź Jeŭraradyjo vykazaŭ ministr unutranych spraŭ Ihar Šunievič.
«I ŭłady, i arhanizatary hetaha mierapryjemstva pavinny znajści ahulnuju movu i zrabić tak, kab heta było prymalna dla abodvuch bakoŭ. Čym bolš mirna, spakojna, cyvilizavana i, zrazumieła, z vykanańniem usich histaryčnych patrabavańniaŭ, tym dla milicyi budzie lepš. Tamu ja vitaju žadańnie ŭładaŭ i arhanizataraŭ znajści załatuju siaredzinu i pravieści ŭsio cyvilizavana: biez abvastreńnia, uzajemnych paprokaŭ. Usio ž, heta historyja, i da jaje treba stavicca z pavahaj», — kaža Šunievič.
Pa słovach Šunieviča, asabista jon za toje, kab śviatkavańnie było ŭ farmacie mitynhu i kancerta. Bo šeście, kaža ministr, bolš składanaje mierapryjemstva «ŭ płanie arhanizacyi».
U svaju čarhu staršynia praŭładnaha Sajuza piśmieńnikaŭ Mikałaj Čarhiniec, skazaŭ, što ŭ historyi Biełarusi była takaja staronka, jak Biełaruskaja Narodnaja Respublika, i zabyvacca pra jaje nie treba. Naadvarot, padziei 1918 hoda nieabchodna praŭdziva adlustravać u mastackaj litaratury.
«Mnie zaŭsiody było cikava toje, što było ŭ historyi majoj Biełarusi. I, viadoma, heta tyčycca Biełaruskaj Narodnaj Respubliki. Ja nie moh pryniać tych lidaraŭ respubliki, jakija źviarnulisia da Hiermanii, kab, hruba kažučy, chutčej prynieśli svabodu ŭ Biełaruś. Hiermanija - ahresar. Ale ž u historyi heta było, i niama čaho heta abychodzić. Ja za toje, kab nie sychodzili ad historyi. Varta pra ŭsio raskazvać. Što było dobraha - adznačyć. Dobraje navat varta ŭziać na ŭzbrajeńnie, ničoha strašnaha ŭ hetym niama».
Staršynia Sajuza piśmieńnikaŭ uchiliŭsia ad adkazu na pytańnie Jeŭraradyjo, ci nie pryjšoŭ čas śviatkavać Dzień Voli 25 sakavika na dziaržaŭnym uzroŭni. Pa słovach Čarhinca, hetaje pytańnie varta adrasavać tym ludziam, jakija zajmajucca kiravańniem dziaržavaj. A jon u jakaści staršyni piśmieńnickaha sajuza padtrymaje ideju stvareńnia litaraturnych tvoraŭ pra BNR i źviazanyja z tym časam padziei
Ciapier čytajuć
Ministr kultury vyciahnuŭ u efir čarhovaha Astapa Bendara. I heta stała apošniaj kroplaj: suprać hetaha fiermiera-chvalka vystupiła siamja17
Kamientary