Minadukacyi: U čytačoŭ «NN» moža skłaścisia pamyłkovaje ŭražańnie, što ministr Karpienka padtrymlivaje niefarmalnyja suviazi ź ideołaham Ivanovym
Ministr adukacyi Ihar Karpienka nie padtrymlivaje niefarmalnyja suviazi z hramadzianinam Andrejem Ivanovym, jaki pravodziŭ sieminary dla biełaruskich ideołahaŭ.
List z adpaviednym źmiestam ad imia viedamstva byŭ dasłany ŭ Redakcyju «Našaj Nivy». Pryvodzim jaho ŭ pierakładzie na biełaruskuju movu ŭ niaznačnym skarocie.
«U materyjale nn.by «Z 1991 hoda kraina akupavanaja. U internet trapiła šakujučaje VIDEA sieminara dla biełaruskich ideołahaŭ» była raźmieščana fatahrafija ministra adukacyi Ihara Karpienki, zroblenaja padčas asabistaha pryjomu hramadzian.
Na pryjom 1 listapada 2017 hoda zapisalisia čatyry čałavieki: Andrej Kuźmič, Arkadź Rozbaš, Dźmitryj Čaburkanaŭ, Andrej Ivanoŭ. Padčas pryjomu ministru adukacyi byli zadadzieny pytańni, źviazanyja z ukaranieńniem zdaroŭjeźbierahalnych mietodyk V.Bazarnaha ŭ Biełarusi na dziaržaŭnym uzroŭni i ŭklučeńnie ich u prahramu. Paśla razmovy jany paprasili zrabić sumiesnaje fota. Da materyjału «Našaj Nivy», u jakim zhadvajucca, cytata: «masony», «nadyudziejski predyktar», «spaleńnie viosak», «suśvietny paradak», «vašynhtonski kansensus», «himn demanizmu» dy inšaje fotazdymak Ihara Karpienka nijakaha dačynieńnia nie maje.
Taksama pad fota ź Iharam Karpienkam (u realnaści praz dva abzacy paśla ilustracyi — Red.) raźmieščana rytaryčnaje pytańnie: «Jakija lekcyi moža čytać biełaruskim čynoŭnikam prychilnik DNR?» U čytača, mabyć, pavinna skłaścisia iłžyvaje ŭražańnie, što hramadzianie z fatahrafii čytali niejkija lekcyi ministru adukacyi, padtrymlivajuć ź im niefarmalnyja suviazi i inšaje.
Na našu dumku, aŭtar naŭmysna ŭvodzić čytača ŭ zman, tym samym sprabujučy dyskredytavać słužbovuju asobu abo nanieści škodu nacyjanalnym intaresam Biełarusi.
Vidavočna, apublikavanaja fatahrafija była ŭziataja «Našaj Nivaj» z sacyjalnaj sietki biez ŭkazańni krynicy i aŭtara fota. Ni na jakich aficyjnych sajtach jana nie raźmiaščałasia, nie pradastaŭlałasia pres-słužbaj Ministerstva adukacyi i nijak nie źviazanaja z čytańniem niejkich «lekcyj», jakim pryśviečany artykuł», — paviedamlajecca ŭ niefarmalnym liście biez vychodnaha numaru.
Naprykancy składalniki zvarota prosiać prybrać z artykuła lubyja zhadki pra Ihara Karpienku, a taksama prybrać z sajta «Našaj Nivy» apublikavany fotazdymak.
List byŭ adpraŭleny z elektronnaj pošty [email protected] i padpisany «Ministerstva adukacyi». Hetaj elektronnaj skryniaj karystajecca viedamstva, u pryvatnaści, na jaje prymalisia zaŭvahi da Kodeksa ab adukacyi.
Fotazdymak, apublikavany ŭ artykule, mieŭ ilustracyjny charaktar, jon fiksavaŭ toj fakt, što hramadzianin Andrej Ivanoŭ prymaŭ udzieł u sustrečy z udziełam ministra Ihara Karpienki. «Naša Niva» nie mieła na mecie dyskredytacyju słužbovaj asoby abo naniasieńnie škody nacyjanalnym intaresam Biełarusi.
Kamientary