U Litvie pakul niama vidavočnaha lidara na źmienu Hrybaŭskajcie
Dala Hrybaŭskajcie nie zmoža bałatavacca na nastupnych prezidenckich vybarach u Litvie: kanstytucyja abmiažoŭvaje kolkaść terminaŭ.
Choć vybary adbuducca tolki praz paŭtara hoda, sacyjołahi ŭžo praviali pieršyja apytańni papularnaści patencyjnych kandydataŭ. Vidavočnaha lidara pakul niama.
Jak pakazała apytańnie, praviedzienaje kampanijaj Spinter tyrimai, najbolšuju papularnaść majuć premjer-ministr krainy Saŭlus Skviarnialis, mer Kaŭnasa Visvałdas Macijašajcis i ekanamist Hitanas Naŭsieda.
Akramia taho, u śpis trapili dypłamat, były ambasadar Jeŭrasajuza ŭ Rasii Vihaŭdas Ušackas, staršynia Litoŭskaha sajuza sialan i zialonych pradprymalnik Ramunas Karbaŭskis i deputatka Inhryda Šymanicie.
Skviarnialis z Sajuza sialan i zialonych papularny siarod biadniejšych słajoŭ nasielnictva. Naŭsiedu addajuć pieravahu bahaciejšyja i žychary vialikich haradoŭ. Macijašajcis zdabyŭ papularnaść, bo zdoleŭ ažyvić haspadarku i palepšyć infrastrukturu Koŭna — druhoha pa pamiery horada krainy.
U Litvie prezident maje mienšyja paŭnamoctvy, čym u Francyi ci Rasii, ale bolšyja, čym u parłamienckich respublikach typu Hiermanii ci Łatvii. U pryvatnaści, prezident vyznačaje zamiežnuju palityku krainy.
Kamientary