U Biełarusi mohuć uzmacnić adkaznaść za paŭtornyja parušeńni PDR. Pra heta siońnia ŭ Viciebsku paviedamiŭ žurnalistam načalnik upraŭleńnia Dziaržaŭtainśpiekcyi MUS Dźmitryj Karziuk, pieradaje BIEŁTA.
«Jość prapanova za niekalki adnatypnych parušeńniaŭ praviłaŭ darožnaha ruchu, ździejśnienych zapar, ustalavać bolš žorstkuju adkaznaść», — skazaŭ Dźmitryj Karziuk. Na jaho dumku, kolkaść parušeńniaŭ, jakuju ŭžo moža ličycca sistemaj, — try i bolš. «Hetaja prapanova znachodzicca na ŭzhadnieńni i, mahčyma, budzie pryniataja ŭ bližejšy čas», — dadaŭ jon.
Tema ŭzmacnieńnia žorstkaści pakarańnia była zakranutaja žurnalistami ŭ suviazi z vynikami niadaŭniaha manitorynhu pracy maršrutnych taksi Viciebskaj vobłaści. Jak paviedamlałasia, inśpiektary DAI 8 kastryčnika niehałosna ŭ jakaści pasažyraŭ prajechali ŭ maršrutkach pa Viciebsku, a taksama ŭ mikraaŭtobusach da Minska, Połacka i viarnulisia nazad u abłasny centr. Usiaho było pravierana kala 30 mašyn, vyjaŭlena 74 parušeńni PDR i pieravozki pasažyraŭ (mnohija ź jakich sieryjnyja).
Dźmitryj Karziuk adznačyŭ, što DAI praciahnie praktyku schavanych mietadaŭ pracy. «Kiroŭcy maršrutak zaŭsiody śpiašajucca, prosta laciać. Im treba pieravieźci jak maha bolš pasažyraŭ. I tamu maršrutki ŭ nas pad asablivym kantrolem», — zajaviŭ jon. Sakretnyja formy dapamahajuć vyjaŭlać parušeńni PDR roznymi ŭdzielnikami ruchu i prymianiajucca davoli časta. Usio bolš šyroka inśpiektary vykarystoŭvajuć videafiksacyju.
Ciapier čytajuć
Na poŭnačy Biełarusi isnavała vielizarnaje voziera — u 150 razoŭ bolšaje za Narač. Jano źnikła ŭ vyniku pryrodnaj katastrofy, ale ślady zaŭvažnyja i siońnia77
Kamientary