Da 2050 hoda ŭ vioscy na Miesiacy zmohuć žyć 1000 čałaviek
U najbližejšaje dziesiacihodździe MKS adpravicca na zasłužany adpačynak, a nastupnym prajektam supracoŭnictva krain u śfiery kosmasu moža stać mižnarodnaje sielišča na Miesiacy. Zdabyča vady ź miascovaha lodu, 3D-druk damoŭ i instrumientaŭ, vyroščvańnie raślin u miesiacovaj hlebie — heta nie navukovaja fantastyka, a całkam ździajśnialny płan, upeŭnienyja ŭ Jeŭrapiejskim kaśmičnym ahienctvie (ESA).
Na Jeŭrapiejskim kanhresie płanietołahaŭ u Ryzie pradstaŭnik ESA Biernard Foinh raspavioŭ, što pieršyja pasialency mohuć prybyć na Miesiac da 2030 hoda — imi stanuć 6—10 navukoŭcaŭ i inžynieraŭ. Da 2040 hoda lik kałanistaŭ pieravalić za sotniu čałaviek, a u 2050-m ich budzie ŭžo tysiača. Da hetaha momantu možna čakać źjaŭleńnia pieršych siemjaŭ na spadarožniku, a dalej — naradžeńnia dziaciej. Zaraz dastaŭka svajakoŭ u «Miesiacovuju viosku» abyšłasia b pa mienšaj miery ŭ 100 miljonaŭ jeŭra za čałavieka, ale ŭ najbližejšyja 20 hadoŭ košt kvitka moža źmienšycca ŭ razy.
Na spadarožniku možna zdabyvać bazalt i vykarystoŭvać zdabytyja z parody materyjały dla 3D-druku kaśmičnych aparataŭ, zapusk jakich z pavierchni Miesiaca abydziecca ŭ 40 razoŭ tańniej, čym ź Ziamli. Vadu možna zdabyvać ź lodu na miesiacovych kancavośsiach, a pry jaje rasščapleńni na vadarod i kisłarod atrymlivajecca syravina dla rakietnaha paliva.
U dadatak da ŭsiaho navukoŭcy adznačajuć najaŭnaść izatopa hieliju-3 — patencyjnaje krynicy čystaj i biaśpiečnaj jadziernaj enierhii.
Žyćcio na Miesiacy budzie niaprostym, papiaredžvaje fizik Chryścijanie Chiejnikie ź Jeŭrapiejskaha kaśmičnaha ahienctva. Jana praviała ceły hod u 11-mietrovym kupale ź inšymi navukoŭcami, imitujučy žyćcio na Marsie, i dakładna viedaje, pra što havoryć.
Znachodziačysia ŭnutry žyłoha modula ci zvonku ŭ skafandry, čałaviek nie moža pa-sapraŭdnamu adčuć płanietu. Jamu niama kudy dziecca ad svaich kalehaŭ, a zamiest zialonych łužkoŭ za aknom zaŭsiody buduć šeryja kamiani i nieba, niepadobnaje na ziamnoje.
Navukoŭcy taksama paskardzilisia na adsutnaść cikavaści da prajektu miesiacovaj kałonii z boku palitykaŭ, choć navukovy śviet i kamiercyjnyja arhanizacyi daŭno padtrymlivajuć hetuju ideju.
U 2018 hodzie kampanija SpaceX pačnie turystyčnyja paloty da Miesiaca, ale karabiel Dragon 2 tolki abminie spadarožnik i viernie pasažyraŭ na Ziamlu. Miž tym NASA płanuje pabudavać novuju kaśmičnuju stancyju na arbicie Miesiaca.
Ciapier čytajuć
17‑hadovy chłopiec žyvie ŭ padvale. Jon zaharnuŭsia ŭ čyrvona-zialony ściah, kab Łukašenka źviarnuŭ na jaho ŭvahu5
Kamientary