Abnavili śpisy prafiesij, jakija dajuć prava na daterminovuju piensiju. Jany značna skaracilisia
U Biełarusi abnavili śpisy prafiesij, jakija dajuć prava na daterminovuju prafiesijnuju piensiju za pracu ŭ škodnych i niebiaśpiečnych umovach. Novyja praviły pačnuć dziejničać z 1 lipienia 2026 hoda, paviedamlaje pres-słužba Ministerstva pracy.
Havorka idzie pra dva śpisy. Pieršy ŭklučaje najbolš niebiaśpiečnyja vidy rabot — naprykład, padziemnyja abo z asabliva ciažkimi ŭmovami. Druhi — pracy sa škodnymi, ale mienš niebiaśpiečnymi ŭmovami. Raniej vykarystoŭvalisia śpisy, zaćvierdžanyja jašče ŭ 2005 hodzie.
U novych śpisach prybrali prafiesii, jakija ŭžo nie vykarystoŭvajucca abo nie paćvierdzili škodnaść pavodle pravierak umoŭ pracy. Taksama častku śpiecyjalnaściaŭ (15 pazicyj) pieranieśli ź pieršaha śpisu ŭ druhi, bo jany akazalisia mienš niebiaśpiečnymi, čym ličyłasia raniej.
Jašče źmianili strukturu śpisaŭ: niekatoryja raździeły skasavali, a prafiesii raźmierkavali bolš dakładna pa vidach vytvorčaści. Akramia taho, nazvy prafiesij i ŭmoŭ pracy pryviali ŭ adpaviednaść z sučasnymi daviednikami i ŭdakładnili farmuloŭki, kab paźbiehnuć roznačytańniaŭ.
Usiaho takim čynam sa śpisaŭ było vyklučana bolš za 800 prafiesij i pasad, jakija ŭłady paličyli ŭžo nieaktualnymi.
Dla rabotnikaŭ heta značyć, što ŭžo praviedzienaja atestacyja pracoŭnych miescaŭ zastajecca dziejnaj da zakančeńnia svajho terminu i prachodzić jaje nanova nie treba. Kali prafiesija zastałasia ŭ abnoŭlenych śpisach, prava na daterminovuju piensiju zachoŭvajecca.
Kamientary