«Vyjšaŭ z akna 10 paviercha pjany i ŭ adnych škarpetkach» — padrabiaznaści śmierci amierykanskaha vajskoŭca ŭ Minsku

U minułym miesiacy ź dziasiataha paviercha minskaj haścinicy «Jubilejnaja» zvaliŭsia amierykaniec Kajł Tejfeł (Tafel).

Pavialičyć

Pryjechaŭ na čempijanat razam ź ciotkami

Z 14 pa 25 červienia ŭ Minsku prachodziŭ čempijanat śvietu pa kłasičnym paŭerliftynhu. U im uziali ŭdzieł pradstaŭniki 52 krain, u tym liku i amierykancy.

Amierykanskaja zbornaja była raśsielenaja pa čatyroch hatelach: «Biełaruś», «Chiłtan», «Płanieta», «Jubilejnaja».

67-hadovaja Denis Tomas, vieteran-spartoviec, adna z trenieraŭ kamandy, pryjechała zahadzia. Jana žyła ŭ «Jubilejnaj». Razam ź joj pryjechaŭ plamieńnik — 36-hadovy vajskoviec Kajł Tejfeł i jaje siastra, druhaja ciotka Kajła.

Kajł Tejfeł členam spartovaj delehacyi nie byŭ. Pradstaŭniki biełaruskaj fiederacyi paŭerliftynhu kažuć pra jaho: «Byŭ tam małady chłopiec, fanat, pryjechaŭ padtrymać zbornuju».

Major Nachvardyi Tejfeł razam ź dźviuma ciotkami zasialiŭsia ŭ numar na 10 paviersie. U adnym pakoi žyŭ jon, druhi zajmali žančyny.

Pavialičyć

Kajł ź ciotkami zasialilisia ŭ hatel 12 červienia. Unačy taho ž dnia ŭ «Jubilejnaj» zdaryłasia trahiedyja. Kajła Tejfeła znajšli miortvym kala hatela.

Načnyja pryhody amierykanca

Adzin z tych, chto byŭ tam nočču, raspavioŭ «Našaj Nivie» padrabiaznaści.

«Byli surjoznyja raźbiralnictvy: pryjechali milicyjanty, pryjechali arhanizatary čempijanatu ź Biełaruskaj fiederacyi paŭerliftynhu. Amierykaniec ža!

Kazali, što amierykaniec byŭ u kazino, pryčym mocna napadpitku. Napiŭsia tak, što achoŭniki jaho vyvieli — pryčym navat pad ruki adviali ŭ numar, jon užo kiepska chadziŭ. Ale praź niejki čas hety amierykaniec adčyniŭ akno ŭ svaim numary i vyjšaŭ na vuzki parapiet zvonku budynka. Jon špacyravaŭ pa im na ŭzroŭni dziasiataha paviercha ŭ adnych škarpetkach. Ci chacieŭ kudyści pieraleźci, ci što — nieviadoma. Nu i voś…»

Heta ž paćvierdziŭ i načalnik słužby achovy haścinicy «Jubilejnaj» Leanid Hvozdź: «Tak, chutčej za ŭsio, jon tam chadziŭ u škarpetkach. Kamier zvonku budynka niama, ale my bačyli ślady».

Pa słovach baćki Tejfeła, Kajł u tuju noč paviedamiŭ ciotkam, što achoŭniki «prahnuć kryvi», tamu Kajł spužaŭsia i zabarykadziravaŭ dźviery znutry.

Hetuju viersiju achova hatela vyklučaje.

«Kanfliktu z achoŭnikami nie było anijakaha. Tak, jaho adviali ŭ numar. Ale ŭsio było cicha i spakojna. U hetym ža numary ŭ susiednim pakoi byli svajački mužčyny, dyk kali jon vyjšaŭ u akno, to jany navat nie pračnulisia, — kaža Hvozdź. — Kali my zajšli da ich u numar, žančyny ździvilisia: «A što jon, nie śpić? Jon ža spaŭ».

I paśla ŭ jaho ciotak nie było anijakich pretenzij ni da administracyi hatela, ni da achovy.

Dy i milicyja raźbirałasia, zabirała videa z załaŭ hatela, tut byli pradstaŭniki konsulstva, usio rabiłasia ŭ ich prysutnaści. Niemahčyma było b štości schavać ci pryŭkrasić».

Baćka ž Kajła ź biełaruskimi ŭładami nie kantaktavaŭ. Jon paviedamiŭ amierykanskim žurnalistam, što «nie zadavaŭ pytańniaŭ i nie spadziajecca na adkazy, bo heta ŭsio adno nie viernie jaho syna».

(U artykule była praŭka paśla publikacyi: udakładniena napisańnie proźvišča kirylicaj.)

• 0
• 0
• 0
• 0
• 0
• 0
• 0
• 0