Bieły dom nazvaŭ kryteryi, na padstavie jakich ułady ZŠA buduć dazvalać ujezd biežancam i vydavać vizy hramadzianam šaści krain ź pieravažna musulmanskim nasielnictvam, paviedamlaje VVS.
U pačatku hetaha tydnia Viarchoŭny sud ZŠA častkova admianiŭ błakavańnie mihracyjnaha ukaza Donalda Trampa, jaki praduhledžvaŭ 90-dzionnuju zabaronu na ŭjezd u ZŠA dla hramadzian šaści blizkaŭschodnich dziaržaŭ, nasielenych pieravažna musulmanami, a taksama 120-dzionnuju zabaronu na pryjom uciekačoŭ u ZŠA.
Kryteryi tyčacca hramadzian Irana, Livii, Siryi, Samali, Sudana i Jiemiena. Hałoŭnaje, na što ciapier buduć hladzieć mihracyjnyja čynoŭniki, — najaŭnaść blizkich svajakoŭ u ZŠA.
Jak vynikaje z zajavy Biełaha doma, u hetuju katehoryju ŭvachodziać baćki, muž i žonka, dzieci, ziaci i niaviestki, rodnyja braty i siostry.
Pry hetym babuli i dziaduli, dziadźki i ciotki, plamieńniki i plamieńnicy, unuki i svajaki z boku muža abo žonki blizkimi svajakami, pavodle aznačeńnia uładaŭ ZŠA, nie ličacca.
Dla atrymańnia vizy rodnasnyja suviazi pavinny być paćvierdžanyja dakumientami.
Pry hetym uviedzienaja Trampam časovaja zabarona na ŭjezd nie zakranie tych, chto vučyŭsia abo vučycca ŭ ZŠA ci maje tam biznes, u kaho jość dziejnaja viza abo hramadzianstva ZŠA.
Novyja praviły ŭstupiać u siłu ŭ čaćvier z 20:00 pa vašynhtonskim časie.
Kamientary