Pieršaje kafe chutkaha charčavańnia sietki Döner-Kebab adkryjecca ŭ Hrodnie ŭ pačatku červienia. Hrodna.life pahutaryŭ z dyrektaram ustanovy Ivanam, jaki raspavioŭ, čamu vyrašyŭ adkryć u horadzie papularny niamiecki fast-fud.
Döner-Kebab adkryjecca ŭ handlovym centry OldCity, u tym miescy, dzie raniej znachodziŭsia «Burhiermastier». Asnoŭnymi stravami novaj ustanovy buduć dzioner (kiebab), durum (roł), pide, łachmadžun i inšyja.
Ustanova Ivana budzie mieć ułasnuju nazvu — «MC Doner». Užo padabrany piersanał, a taksama pryjechali dva tureckija kuchary ź Bierlina.
«Pa źbiehu abstavin, mnie ŭdałosia paznajomicca z adnym z uładalnikaŭ sietki Döner-Kebab u Bierlinie, — raspaviadaje Ivan. — Hety čałaviek padrabiazna raspavioŭ mnie pra svoj biznes, jon mianie zaprašaŭ u svaje ŭstanovy, kab ja sprabavaŭ, čym jon kormić ludziej. Jaho historyja mnie vielmi spadabałasia, a smak straŭ byŭ nieparaŭnalny ni ź jakimi burhierami, jakija robiać u nas u Biełarusi. Paraiŭšysia z hetym čałaviekam, było pryniataje rašeńnie pasprabavać adkryć Döner-Kebab i ŭ Hrodnie».
Ź miescam Ivan doŭha nie dumaŭ, bo jamu padviarnuŭsia dobry varyjant u papularnym handlovym centry. Chłopiec upeŭnieny, što stravy ŭ jaho kafe buduć karystacca popytam. Usim klijentam buduć prapanoŭvać biaspłatna haračuju harbatu i tureckija prysmaki.
«U Biełarusi ludzi sami pa sabie drenna staviacca da fastfudu, spasyłajučysia na toje, što ježa tam niezdarovaja. My ž budziem rabić usio sa śviežych inhredyjentaŭ i na vačach u klijentaŭ. Usio miasa, a heta jałavičyna, buduć nam pryvozić naŭprost ź miasakambinata. Budzie trochi paźniej kuryca i baranina. Taksama našaj unikalnaściu budzie toje, što my budziem sami rabić ciesta dla lapiošak i śpiecyjalnyja soŭsy, jakija raspracoŭvalisia ŭ Bierlinie».
Pa śpiecyjalnaj damoŭlenaści Ivan zaprasiŭ u Hrodna dvuch tureckich kucharaŭ ź Bierlina, kab jany navučali hrodziencaŭ hatavać sapraŭdnyja stravy sietki «Döner-Kebab». Kuchary buduć navučać hrodziencaŭ dva miesiacy, ale, mahčyma, adzin ź ich zastaniecca ŭ Hrodnie, kab u dalejšym sačyć za pracaj i raźvićciom kafe.
Standartny durum (roł vahoj 330 hram) budzie kaštavać kala 5-6 rubloŭ. Taki roł raŭnacenny abiedu dla darosłaha čałavieka. Płanujecca ŭ kafe i dziciačaje mieniu. Nie zabylisia i pra viehietaryjancaŭ.
Siłaviki śćviardžajuć, što zatrymali dvuch mužčyn za hałasavańnie na vybarach u KR. Ale ci možna hetamu vieryć?15
Kamientary