Sajuz palakaŭ źviarnuŭsia da Łukašenki pa abaronu polskich škoł u Biełarusi

Siabry Sajuzu palakaŭ Biełarusi nakiravali na adras Łukašenki kala 6 tysiač podpisaŭ u abaronu polskich škołaŭ u Horadni i Vaŭkavysku.

Pavodle siabra Sajuza palakaŭ Viesłava Kieŭlaka, dzieci jakoha navučajucca ŭ škole z polskaj movaj navučańnia ŭ Horadni, padstavaj dla napisańnia lista da Łukašenki stali źmieny, jakija, jak čakajecca, buduć u lipieni ŭniesienyja ŭ zakanadaŭstva ab adukacyi ŭ Biełarusi. Kieŭlak kaža, što baćki dzietak, jakija navučajucca ŭ dźviuch polskich škołach, u Horadni i Vaŭkavysku, ustryvožylisia navinoj i pačali pisać listy ŭ roznyja instancyi.

— Nakolki my razumiejem, źmieny abaviažuć usich vučniaŭ Biełarusi zdavać vypusknyja ispyty abaviazkova na adnoj ź dziaržaŭnych movaŭ. I tady ŭ našych škołach hublajecca sens vykładańnia asnoŭnych pradmietaŭ: matematyki, fizyki, chimii, inšych na polskaj movie, kali dzieci pavinny buduć abaviazkova zdavać vypuskny ekzamen, jak my miarkujem, pa-rasiejsku.

Spadar Kieŭlak raspaviadaje, što i jon, i inšyja baćki, čyje dzieci navučajucca ŭ polskich škołach, nie razumiejuć lohiki ŭładaŭ, bo, maŭlaŭ, adukacyja ŭ hetych škołach na davoli vysokim uzroŭni, achvotnikaŭ navučacca tam šmat, bolšaść vypusknikoŭ škołaŭ pastupajuć u vyšejšyja navučalnyja ustanovy, pryčym pieravažna ŭ Polščy.

— My ŭsie viedajem, što škoły zbudavanyja na hrošy polskich padatkapłacielščykaŭ. Dzieci z zadavalnieńniem tam navučajucca, i navošta rabić dla ich taki stres? Niadaŭna ŭ polskaj škole ŭ Horadni z baćkami sustrakałasia pradstaŭnica Ministerstva adukacyi Biełarusi Iryna Karžova. Dyk jana nam prosta zajaviła, što ŭ Biełarusi ŭsie dzieci buduć zdavać vypusknyja ekzameny na adnoj ź dziaržaŭnych movaŭ, choć papraŭki ŭ zakanadaŭstva jašče nie pryniatyja.

Staršynia niepryznanaha biełaruskimi ŭładami Sajuza palakaŭ Anžalika Borys sama nasiła na poštu adsyłać Łukašenku podpisy ludziej z patrabavańniem abaranić polskija škoły ŭ Horadni i Vaŭkavysku. Jana kaža, što podpisy źbirali na praciahu paŭtara miesiaca.

Pavodle jaje, biełaruskija ŭłady ŭ 1996 hodzie, kali adkryvałasia pieršaja polskaja škoła ŭ Horadni, zbudavanaja za hrošy polskaha ŭradu, abiacali zbudavać druhuju polskuju škołu ŭ Zaniomanskaj častcy horadu za hrošy biełaruskaj dziaržavy, ale ciapier, maŭlaŭ, isnuje pahroza, što naahuł nie zastaniecca nivodnaj polskaj škoły. Pavodle Borys, rašeńnie ab statusie polskich škołaŭ šmat u čym budzie zaležać ad palityčnaj kańjunktury.

— Vidavočna, što papraŭki ŭ zakanadaŭstva ab adukacyi skasujuć polskija škoły. Ludziej heta vielmi chvaluje, i my za davoli karotki termin sabrali amal 6 tysiač podpisaŭ. Mahli b sabrać i bolej, ale śpiašalisia dasłać ich Łukašenku, kab jon adčuŭ reakcyju miascovych ludziej na heta. Ale my ŭ toj samy čas nie sumniavajemsia, što rašeńnie ab statusie našych škołaŭ budzie zaležać ad mnohich palityčnych čyńnikaŭ.

U Haradzienskim abłasnym Upraŭleńni adukacyi namieśnica načalnika Halina Kurhanskaja skazała Svabodzie, što pakul ničoha kankretnaha nia moža patłumačyć nakont taho, jakim budzie status polskich škołaŭ u Horadni i Vaŭkavysku.

— My viedajem, što baćki dasyłali listy i ŭ Ministerstva adukacyi, i ŭ Administracyju prezydenta. I jany majuć prava na heta. Ale ŭsio budzie vyrašać parlament.

Škoły z polskaj movaj navučańnia ŭ Horadni i Vaŭkavysku isnujuć bolš za 20 hadoŭ.

• 0
• 0
• 0
• 0
• 0
• 0
• 0
• 0