Minčuk vyroščvaŭ u kvatery kanopli, kab lačycca ad bolu ŭ sustavach
U sud nakiravali kryminalnuju spravu suprać 35‑hadovaha žychara Minska, jaki vyraściŭ u svajoj kvatery dva kusty kanoplaŭ i zachoŭvaŭ marychuanu, piša ahienctva «Minsk-Naviny».
Mužčyna žyŭ adzin u kvatery na vulicy Maksima Hareckaha. Pavodle materyjałaŭ spravy, doŭhi čas jon ciarpieŭ ad bolaŭ u sustavach. Na adnym ź internet-sajtaŭ pračytaŭ, što palehčyć bol moža marychuana. Paśla hetaha jon pačaŭ vyvučać, jak vyroščvać raśliny rodu Cannabis u chatnich umovach.
U šafie ŭ piarednim pakoi minčuk zrabiŭ tak zvany hroŭboks — śpiecyjalnuju kanstrukcyju dla vyroščvańnia raślin. Jon abstalavaŭ jaje aśviatleńniem, vientylacyjaj i pryborami dla kantrolu tempieratury. Usio nieabchodnaje kupiŭ praz markietpłejs. Nasieńnie kanoplaŭ u jaho ŭžo było — pavodle jaho słoŭ, niechta pieradaŭ jaho na adnym z rok-fiestyvalaŭ.
Mužčyna pasadziŭ dva ziarniatki, jakija paźniej praraśli. Jon dahladaŭ raśliny, paśla zrazaŭ liście, sušyŭ jaho i zdrabniaŭ, atrymlivajučy marychuanu.
Praź niekatory čas u kvateru pryjšli supracoŭniki narkakantrolu. Jany kanfiskavali raśliny, hroŭboks, prystasavańni dla kureńnia, a taksama znajšli ŭ kuchonnaj šafie jomistaść z 5,93 hrama hatovaj da ŭžyvańnia marychuany.
Mužčynu zatrymali i zaviali kryminalnuju spravu.
Pavodle prakuratury, jon chałasty, pracuje tavaraznaŭcam u pryvatnaj kampanii i raniej nie byŭ sudzimy. Jamu vystaŭlenyja abvinavačańni ŭ niezakonnym abarocie narkatyčnych srodkaŭ, a taksama ŭ niezakonnym pasievie i vyroščvańni raślin, jakija ŭtrymlivajuć narkatyčnyja rečyvy.
Svaju vinu minčanin całkam pryznaŭ. U dačynieńni da jaho abranaja miera strymańnia ŭ vyhladzie asabistaha paručalnictva.
Kamientary
A jaho što, złavili padčas prodažu?..