U 97 hadoŭ pamior Mikoła Aŭramčyk, suaŭtar «Skaza pra Łysuju haru»

8 maja ŭ Minsku paśla ciažkaj praciahłaj chvaroby pamior najstarejšy siabra Sajuza biełaruskich piśmieńnikaŭ, paet Mikoła Aŭramčyk. Jamu było 97 hadoŭ. Pra heta paviedamiŭ sajt piśmieńnickaj arhanizacyi. 

Pavialičyć

Mikoła Aŭramčyk naradziŭsia 14 studzienia 1920 hoda ŭ Plosach Babrujskaha rajona Mahiloŭskaj vobłaści ŭ sialanskaj siamji.

Skončyŭ škoły ŭ Plosach i Ciałušy. U 1938 hodzie pastupiŭ na fiłałahičny fakultet Minskaha piedahahičnaha instytuta, adnačasova pracavaŭ u redakcyi haziety «Pijanier Biełarusi», paznajomiŭsia ź Jankam Kupałam, Kuźmoj Čornym, Alesiem Sałaŭjom, pra jakich pakinuŭ uspaminy.

Mikoła Aŭramčyk byŭ vieteranam Druhoj suśvietnaj, udzielničaŭ u bajach na Paŭnočna-Zachodnim i Vołchaŭskim frantach. U červieni 1942 hoda trapiŭ u akružeńnie i ŭ pałon da ispancaŭ, paśla niemcami byŭ vyviezieny ŭ Rur na kamiennavuhalnyja šachty. U krasaviku 1945 hoda vyzvaleny anhličanami.

Paśla vajny pracavaŭ na adnaŭleńni Danbasa. Skončyŭ fiłałahičny fakultet BDU (1949). Pracavaŭ u redakcyjach haziet «Čyrvonaja źmiena», «Litaratura i mastactva», u časopisie «Połymia», u 1953—1980 — redaktar adździełu paezii časopisa «Maładość». Člen Sajuza piśmieńnikaŭ z 1947 hoda.

Debiutavaŭ vieršami ŭ 1937 h. u babrujskaj haziecie «Kamunist». Aŭtar knih paezii «Piaredni kraj» (1949), «Šlachami družby» (1952), «Klučy žuraŭlinyja» (1960), «Sustreča byłych kanahonaŭ» (1963), «Univiersitecki haradok» (1967), «Ahledziny» (1969), «Jak na dałoni» (1970), «Dreva družby» (1973), «Vadovišča» (1976), «U padziamielli» (raman, 1986), «Ankieta: Vybranaje» (1990), zbornika vieršaŭ dla dziaciej «Družba» (1950). 

Aŭtar knihi uspaminaŭ «Znajomyja postaci» (2004), pryśviečanaj biełaruskim dziejačam.

Tolki ŭ apošnija hady stała viadoma, što heta Mikoła Aŭramčyk razam ź Niłam Hilevičam skłaŭ «Skaz pra Łysuju haru» — kultavuju ananimnuju paemu 1980-ch.

Pierakłaŭ na biełaruskuju movu paasobnyja tvory Dž. Bajrana, A. Mickieviča, Ł. Ukrainki, I. Franko, M. Džalila, H. Emina, I. Kuratava, S. Jasienina, Ja. Śmialakova.

Mikoła Jakaŭlevič byŭ uznaharodžany ordenami «Znak Pašany», Ajčynnaj vajny II stupieni i miedalami. Łaŭreat Litaraturnaj premii imia Janki Kupały (1964) za zbornik «Sustreča byłych kanahonaŭ».

Raźvitańnie ź Mikołam Jakaŭlevičam adbudziecca 10 maja ŭ 10.30, u raźvitalnaj zali Lečkamisii (Minsk, vulica Čyrvonaarmiejskaja 10).

Redakcyja «Našaj Nivy» dałučajecca da ščyrych spačuvańniaŭ rodnym Mikoły Aŭramčyka.

• 0
• 0
• 0
• 0
• 0
• 0
• 0
• 0