Vajna ŭ dzień Alimpijady

Unačy z čaćviarha na piatnicu hruzinskija vojski ŭvajšli na terytoryi, što ad 1992 hodu nie padparadkoŭvalisia Tbilisi. Hetamu papiaredničaŭ tydzień uzajemnych abstrełaŭ i abvinavačvańniaŭ.

Napiaredadni aperacyi prezydent Hruzii Michaeł Saakašvili vystupiŭ z poŭnym dramatyzmu zaklikam da spynieńnia kanfliktu i adnaŭleńnia cełasnaści Hruzii.

U telezvarocie jon prapanavaŭ lideram Paŭdniovaj Asiecii «nieadkładna spynić ahoń i raspačać pieramovy». Jon paabiacaŭ im aŭtanomiju ŭ składzie Hruzii i skazaŭ, što Rasieja mahła b vystupić harantam takoj aŭtanomii.

Nijakaha adkazu z Cchinvali, viadoma, nie było — asiaciny ŭžo 16 hadoŭ nastojvajuć na adździaleńni ad Hruzii i pierachodzie ŭ skład Rasiei.

Za niekalki chvilinaŭ da poŭnačy Hruzinskaje TV abvieściła ab pačatku «aperacyi pa adnaŭleńni kanstytucyjnaha paradku».

Pavodle źviestak hruzinskaha telebačańnia, vojski Hruzii ryŭkom zaniali 11 siołaŭ i vyšyni nad Cchinvali.

Asiacinskija pazycyi byli źmiatyja. Zaciaty boj razhareŭsia tolki ŭ paŭdniovaj častcy horadu, dzie suprać hruzinskich vojskaŭ adkryta vystupili rasiejskija miratvorcy. Užyvalisia tanki i artyleryja.

Infarmacyja z pola bajoŭ dachodziła supiarečlivaja. Miarkujučy pa ŭsim, hruzinskija vajskoŭcy svaim ahniom całkam źniščyli abarončuju infrastrukturu Paŭdniovaj Asiecii. Hruzinskija vojski pakazali, što ich bajazdolnaść rezka vyrasła za apošnija hady.

U Cchinvali žyvie kala 30 tysiač čałaviek — prykładna jak u rajcentry pamieram z našu Biarozu.

U cełym padajecca, što hruzinski rejd zastaŭ Kreml źnianacku.

Pad abied z boku miažy da Cchinvali rušyła kalona rasiejskaj braniatechniki ŭ składzie sta adzinak. Spačatku Pucinym było zajaŭlena, što na tankach i broniemašynach na padmohu asiacinam ruchajucca «dobraachvotniki». Adnak paśla Paŭnočnakaŭkaskaja vajskovaja akruha abvieściła, što heta hrupiroŭka rasiejskich vojskaŭ, vypraŭlenaja na padmacavańnie miratvorčych siłaŭ.

Pry nabližeńni rasiejskaje kalony hruzinskija častki adyšli ad Cchinvali.

Pierad budynkam štabu rasiejskich miratvorcaŭ zastalisia daharać dva hruzinskija tanki, padbityja zranku rasijskimi čaściami, što pastajanna dyślakavalisia ŭ Asiecii, majučy status miratvorcaŭ. Viadoma, što siarod rasiejskich vajskoŭcaŭ taksama jość zabityja i paranienyja.

Sam horad pałychaje, pažary nichto nia hasić. U žorstkich bajach razburanaja bolšaja častka žyłoha fondu. Kolkaść achviaraŭ nieviadomaja, ale peŭna, što havorka idzie pra dziasiatki čałaviek.

Hruzija taksama źvinavaciła Rasieju ŭ parušeńni pavietranaje prastory. Pavodle źviestak Hruzinskaha TV, rasiejskija samaloty bambili pazycyi hruzinskich vojskaŭ u Hory i vajskovuju bazu Vazijani pad Tbilisi — na jakoj bazujucca taksama amerykanskija vajskovyja instruktary. Hruzija zajaviła ab źbićci dvuch rasiejskich samalotaŭ, adnak infarmacyja nie była paćvierdžanaja dakumentalna. Pad viečar źjaviłasia infarmacyja, što

rasiejskija samaloty nanieśli novy ŭdar pa vajskovaj bazie ŭ horadzie Marneuli na poŭdzień ad Tbilisi. 4 čałavieki zahinuli.

Sa słovaŭ Saakašvili, achviary jość i ŭ Hory, dzie rasiejskija samaloty nanieśli ŭdar pa žyłych kvartałach i rynku.

Rasija pajšła na biesprecedentny krok — pasłała vojski ŭ susiedniuju krainu, paśla taho jak dyplamatyčnyja kroki Kramla sustreli chałodnuju reakcyju Zachadu. Rada biaśpieki AAN nie pryniała nijakaha rašeńnia pa sytuacyi ŭ Paŭdniovaj Asiecii. Terminovaje pasiedžańnie było sklikanaje siońnia ŭnačy na prośbu Rasiei, ale inšyja siabry Rady nie padtrymali rasiejskich prapanovaŭ.

Na pasiedžańni Hruzija całkam uskłała vinu za abstreły na paŭdniovaasiacinski bok. Heta zajaviŭ na Radzie Biaśpieki AAN stały pradstaŭnik Hruzii pry AAN Irakli Ałasanija. «My zaklikajem lideraŭ separatystaŭ spynić vajennyja dziejańni», — zajaviŭ jon. Jon taksama zaklikaŭ Rasieju spynić pravakacyi i ŭmiašańnie va ŭnutranyja spravy Hruzii.

Asiacinskaja armija składajecca ź miascovych ludziej, ale taksama z dobraachvotnikaŭ z Rasiei. U Cchinvali prybyŭ taksama kiraŭnik rasiejskaj aŭtanomii Paŭnočnaja Asiecija Tajmuraz Mamsuraŭ.

Pradstaŭnik Paŭdniovaj Asiecii ŭ Maskvie zaprasiŭ siońnia ŭ Rasiei terminovaj vajskovaj dapamohi. Paśla hetaha Pucin u Pekinie zajaviŭ: «pačałasia vajna».

Jak viadoma, Asiecija raniej prasiłasia ŭ skład Rasiei. Heta dało Tbilisi dadatkovyja padstavy ličyć, što jano maje spravu nie z aŭtanamisckim rucham, a z zakamuflavanym rasiejskim umiašańniem.

ZŠA i Eŭrasajuz zaklikali nieadkładna spynić bajavyja dziejańni.

Sproba Tbilisi adnavić svoj kantrol nad Paŭdniovaj Asiecijaj stała pieršym značnym vyprabavańniem dla novaha prezydenta Rasiei Dźmitryja Miadźviedzieva. I, treba skazać, što ad zajavaŭ jon uchilaŭsia, hałoŭnym hołasam Rasii zastavaŭsia Pucin.

Pa atrymańni naviny ab bambiožcy bazy Vazijani i ŭstupleńni rasiejskaj braniatankavaje kalony ŭ Asieciju Michaeł Saakašvili źviarnuŭsia da ZŠA z prośbaj ab padtrymcy.

«Chaču źviarnucca da mižnarodnaj supolnaści i da Rasijskaj Federacyi z zaklikam — nieadkładna spynić bambiožku Hruzii. Hruzija nie była inicyjataram hetaj kanfrantacyi, ale Hruzija nie adstupicca svajoj terytoryi, — zajaviŭ u čarhovym telezvarocie Saakašvili. Jon abjaviŭ taksama mabilizacyju rezervistaŭ. — My baronim Hruziju i našu budučyniu», — zajaviŭ jon. «Toje, što adbyłosia, heta vynik histeryčnaje militarysckaje prapahandy, razhornutaje rasiejskimi telekanałami», — zajaviŭ prezydent Hruzii, zaklikaŭšy Rasieju «supolnymi namahańniami spynić hetaje šalenstva».

Pamočnik kamandujučaha suchaputnymi vojskami Rasiei pałkoŭnik Kanašankoŭ, jaki znachodzicca ŭ Paŭdniovaj Asiecii, zajaviŭ uviečary, što «hruzinskija vojski znachodziacca ŭ zonie paražeńnia ahniavych srodkaŭ 58-j armii».

Uviečary Hruzija abvieściła, što adklikaje svaje častki ź Iraku ŭ suviazi z vajennaj pahrozaj krainie.

ŚMI Rasii i Hruzii poŭniacca prapahandysckimi materyjałami na temu kanfliktu.

Tak na našych vačach jašče adzin rehijon spoŭz da kryvavaha kanfliktu.

Biełaruś zachoŭvaje nejtralitet u acenkach sytuacyi. Staršynia kamisii pa mižnarodnych spravach savietu respubliki nacyjanalnaha schodu Mikałaj Čarhiniec siońnia zajaviŭ, što kanflikt moža być vyrašany tolki praz sklikańnie samitu SND. Jon nia staŭ uskładać adkaznaść za pralićcio kryvi na jakiści adzin bok. MZS Biełarusi zaklikaŭ da nieadkładnaha spynieńnia ahniu.

• 0
• 0
• 0
• 0
• 0
• 0
• 0
• 0