U čym sustrakać viasnu: parady biełaruskich dyzajnieraŭ
Chutka možna budzie skinuć ź plačej abjomnyja puchaviki, zabycca pra šapki i ŭvohule pierastać napaminać svaim vyhladam šmatpłastovuju kapustu. Z hetaj nahody ajčynnyja dyzajniery taksama napahatovie: adšyvajuć novyja kalekcyi, abapirajučysia na ŭnutrany niuch i suśvietnyja pavievy. Dyk jak nas buduć imknucca apranuć viasnoj-letam? Adkazvajuć zakanadaŭcy biełaruskaj mody.
FAINY.BY: «Śvitšot na ŭsie vypadki žyćcia»
Kali vy fanat vyšyŭki, to ŭžo, mabyć, čuli niešta pra brend FAINY.BY, jaki vyrablaje adzieńnie i pryhožyja rečy nakštałt natatnikaŭ z rukadzielnym arnamientam. Ich pasłuhami užo skarystałasia šmat inšych biełaruskich dyzajnieraŭ i znakamitych ludziej: niadaŭna FAINY.BY na zakaz rabili padarunak Siarhieju Łazaravu, paru hadoŭ tamu vyšyvali formu dla Maksima Mirnaha.
Darečy, klijent sam moža prapanavać vytvorcam niejki siužet, jaki potym źjavicca na adzieńni.
Svaim jarkim dyzajnam kamanda brenda nabližaje nadychod viasny ŭžo daŭno. «Usim biełaruskim modnicam raju ŭ hetym siezonie źviarnuć uvahu na našy śvitšoty, univiersalnuju reč, jakuju pry žadańni možna nadzieć i ŭ ofis, i na spatkańnie. Paśla doŭhaj zimy ŭsim chočacca koleru. Vybirajcie jarkija farby: niabiesny błakitny, hłyboki zialony, soniečny žoŭty, nasyčany fijaletavy. Usie hetyja kolery vy znojdziecie ŭ našaj novaj kalekcyi. A jašče — dalikatnyja tony dla prynces: kremavy, ružovy i błakitny, pastelny bezavy», — kaža dyzajnier Kaciaryna Kuźmič.
Chutka ŭ prodaž pastupiać spartyŭnyja štany, ich možna budzie nasić u kamplekcie sa śvitšotami. Nie za harami kalekcyja sukienak i kašulaŭ z kvietkavaj vyšyŭkaj.
Bolš madelaŭ možna znajści na sajcie, a taksama ŭ sacsietkach:
Swan: «Ramantyčnaść i krychu chulihanstva»
U nadychodziačym siezonie Halina Burak raić źviarnuć uvahu na dvuchbortnyja palito, kaściumy mužčynskaha kroju, štany z łampasami, byccam pazyčanyja ŭ taty, i sukienki z vałanami i rušami. Što datyčycca koleraŭ, to asabisty top dyzajniera — heta adcieńni pudry i zielaniny (tak zvany koler kučaravaj kapusty), spałučeńnie čyrvonaha i fuksii.
LSD Clothing: «Čas aśviažycca»
Naturalnyja tkaniny i niebanalnyja rasfarboŭki — voś što budzie modna, na dumku hetaha brenda. Naprykład, piersikavy i aŭtarski vinny. Asistent dyzajniera Hanna taksama raskazała, jakuju reč na vulicach horada varta čakać dakładna: štany-kiułoty.
MURMUR: niasumny ofis
Dyzajniery Kaciaryna Łatyšava i Śviatłana Kamarova ŭ pieršuju čarhu pracujuć z adzieńniem dla ofisa, imknučysia, kab navat u čatyroch ścienkach žančyny adčuvali siabie kamfortna i stylova. Viasna dadaść u ich tvorčaść novuju palitru farbaŭ: ultratrendavyja rečy ružovaha koleru, sukienki z ustaŭkaj-sietkaj i aŭtarski prynt z kaktusami.
LIMITEDMINSK: ź luboŭju da radzimy
Niekatoryja ŭsprymajuć hety brend jak padletkavy, ale heta zusim nie tak. Ich adzieńnie vielmi pasuje dziełavym ludziam, jakija viedajuć, čaho chočuć ad žyćcia i lubiać rodny kraj. Liniejka z vyjavami konikaŭ i zubroŭ stvarałasia, kab raskazać pra našu krainu z novaha boku, i dyzajnier Natalla Žuk upeŭniena, što jany z naparnikam i dalej buduć čerpać natchnieńnie ŭ biełaruskaj historyi. Sapraŭdnyja chity siezona — palito z aŭtarskimi broškami ŭ vyhladzie chmarak z podpisam «Daždžliva», nie straciŭšyja aktualnaść bombiery i kiułoty, charastvo jakich pastupova asensoŭvajuć i ŭ nas. Asobnaja kalekcyja «Sinoptyk» budzie pryśviečana niepastajannamu biełaruskamu nadvorju: tut vam i prykolnyja daždžaviki, i viatroŭki, jakija padymajuć nastroj.
HEARTINESS — nie tolki šali i pałantyny
Hety brend ručnoha tkactva viadomy ŭsim, chto doka ŭ detalach i šanuje ŭtulnaść (mužčynam taksama!). Aksana Vinahradava pačała z vyrabu ślinhaŭ, a ciapier pryjšła da pracesu stvareńnia paŭnavartasnaha adzieńnia. Kamanda «Chartnes» robić sukienki na zakaz, a viasnoj płanuje pačać tkać palito «oversize». Da 8 sakavika budzie hatova kalekcyja šalaŭ sa staadsotkavaha eŭkalipta. Niahledziačy na toje, što chitom siezona stanie koler «hryn», dyzajnier nie źbirajecca adchodzić ad svaich lubych, byccam «zapylenych», składanych adcieńniaŭ.
Historia Naturalis: kali ty nie takaja, jak usie
U fanataŭ hetaha brenda svoj śviet: niezvyčajny, krychu frykavaty i pry hetym vielmi naturalny. Dyzajniery imknucca aktyŭna vykarystoŭvać lon, ale nie dla etničnaj tematyki, jak heta ŭsprymajecca tradycyjna, a dla futurystyčnych i kanceptualnych matyvaŭ: prynty z trusikami, klaksami, animalistyka. Sapraŭdny chit dueta dvuch dyzajnieraŭ hetaha brenda — doŭhi śvitšot (nasamreč sukienka), jaki budzie niezamiennym dla chałodnaha nadvorja sakavika. U novaj kalekcyi čakajecca troški ad anime i hrafiki. Karaciej, kali vy lubicie vyłučacca z natoŭpu — vam siudy.
The Young Clothes: maładość i piaščota
Z nabližeńniem viasny siostry Levaniuk zakupili dalikatna-ružovyja, mientołavyja i kvietkavyja tkaniny. Z hetaha ŭsiaho zrobiacca kaściumy, kašuli, palito i kamizelki. Aktualnymi dla novaj pary hoda buduć i sarafany z karunkami, a taksama spadnicy-plise. Pryjdziecca daspadoby jak junym studentkam, tak i kabietam bolš salidnaha ŭzrostu. Praŭda, kali jany nosiać pamiery nie bolš za 46-y.
Kamientary