Vyras blizu Lidskaha zamku, a jahony syn pracavaŭ barmienam: piać faktaŭ pra v.a. kiraŭnika Administracyi Valeryja Mickieviča
Alaksandr Łukašenka 5 śniežnia zvolniŭ kiraŭnictva Administracyi prezidenta. U adstaŭku byli adpraŭlenyja Alaksandr Kosiniec i jahony pieršy namieśnik Kanstancin Martyniecki. V.a. kiraŭnika Administracyi pryznačany juryst Valeryj Mickievič.
Naradziŭsia i vyras u Lidzie
Naradziŭsia Valeryj Vacłavavič Mickievič u 1964 hodzie ŭ Lidzie. Dziacinstva prajšło na vulicy Revalucyjnaj, u 2013 hodzie jaje pieraimienavali ŭ bulvar Vialikaha Kniazia Hiedymina. Da Lidskaha zamka było zusim rukoj padać, usiaho niejkich piać chvilin niaśpiešnaj chady.
Chłopiec chadziŭ u blizkuju ad domu siaredniuju škołu №11. Dyrektarami navučalnaj ustanovy pry im byli Arkadź Mazoŭka i Tadevuš Andrukievič. Admietna, što pišuć, nibyta heta samuju škołu skončyŭ ciapierašni kiraŭnik spraŭ prezidenta, a taksama były kiraŭnik Administracyi Viktar Šejman. Ale heta nie tak, Šejman vučyŭsia ŭ Trakielach Voranaŭskaha rajona. Nastaŭnicaj matematyki ŭ jaho była Volha Jaŭhienaŭna Kačan, jakaja paśla pierajšła ŭ škołu №11 Lidy. Jana vielmi hanaryłasia svaim vypusknikom.
Cikava, što ŭ Administracyi prezidenta pracavaŭ jašče adzin vychadziec z SŠ №11 Lidy — Mikałaj Bystrycki, jaki prajšoŭ praz afhanskuju vajnu. Jany ź Mickievičam akurat adnahodki.
Sudździa Zasłaŭja
Pa skančeńni škoły ŭ rodnyja miaściny Valeryj Mickievič tak i nie viarnuŭsia. U 25 hadoŭ jon skončyŭ jurydyčny fakultet BDU. Čamu tak pozna? Bo akurat u toj čas studentaŭ pryzyvali na słužbu ŭ vojska. Vidać, Mickievič jakraz addavaŭ daninu Radzimie. Jaho raźmierkavali stažoram sudździ ŭ Zasłaŭje Minskaha rajona. Ad 1991 hoda, pieršaha hoda niezaležnaści, da 2001 Valeryj Mickievič źjaŭlaŭsia sudździom Minskaha rajona i Zasłaŭja.
U toj čas ź im niaredka pierasiakaŭsia viadomy pravaabaronca Hary Pahaniajła. «Mickievič — heta juryst vysokaha kłasa, dobry prafiesijanał i, pa-mojmu, prytrymlivajecca całkam demakratyčnych pohladaŭ. Mnie zdajecca, što ź Mickievičam možna mieć spravy», — kazaŭ pra jaho spadar Pahaniajła.
Pryznačeniec Makieja
Niejki čas Valeryj Mickievič papracavaŭ namieśnikam ministra justycyi, a taksama členam CVK. Heta akurat prypała na čas praviadzieńnia refierendumu pa źniaćciu abmiežavańniaŭ terminaŭ na znachodžańnie na pasadzie prezidenta, a taksama parłamienckich vybaraŭ 2004 hoda. Paśla hetaha syšoŭ pracavać dyrektaram Nacyjanalny centr zakonaprajektnaj dziejnaści pry prezidencie.
U Administracyi prezidenta Valeryj Mickievič, možna skazać, užo doŭhažychar. Jon byŭ pryznačany ŭ 2009 hodzie. Heta akurat pačatak tam pracy Uładzimira Makieja. Pieršyja sproby naładžvańnia adnosin z Zachadam i ŭnutranaj adlihi.
Čym zapomniŭsia ŭ Administracyi?
Tam Mickievič zajmaŭsia dastatkova vuzkaj jurydyčnaj śfieraj. Pieršaj jahonaj zajavaj było abnadziejvańnie, što maratoryj na śmiarotnaje pakarańnie moža być uviedzieny ŭ Biełarusi. Admietna, što spadar Mickievič adnačasova zajmaŭ pasadu staršyni kamisii pa pytańniach pamiłavańnia. Mienavita tudy źviartalisia svajaki asudžanych za vybuch u 2011 hodzie Dźmitryja Kanavałava i Uładzisłava Kavalova. «Za toj čas, što ja pracuju ŭ kamisii, usie śmiarotnyja prysudy byli vykananyja absalutna spraviadliva», — zapeŭnivaŭ Mickievič.
Spatkańnie z Valeryjem Mickievičam i Alaksandram Kosincam mieŭ hałoŭny redaktar sajta ej.by Siarhiej Sacuk, u jakoha byli fakty karupcyi na dastatkova vysokim uzroŭni. Pa słovach Sacuka, Kosiniec i tahačasny kiraŭnik Śledčaha kamiteta Valancin Šajeŭ zaniali pazicyju «Ja načalnik — ty durań» i ničoha nie chacieli słuchać. Adziny čałaviek, ź jakim byŭ mahčymy dyjałoh — heta byŭ Valeryj Mickievič. «Ź Mickievičam možna było kanstruktyŭna abmiarkoŭvać», — kazaŭ redaktar ej.by.
Syn — barmen i muzykant
Žonku Valeryja Mickieviča zavuć Śviatłana, u siamji dvoje synoŭ. Starejšy — Jahor — skončyŭ taksama jurydyčny fakultet BDU, ale nie pajšoŭ pa śladach baćki.
U 2010 hodzie Jahora Mickieviča navat pryznali «Mistaram jurfak». U karotkaj ankiecie było šmat cikavych pytańniaŭ. Naprykład, Jeŭropa ci Amieryka? «Jeŭropa — heta estetyka i kulturnaja raznastajnaść. ZŠA — heta svaboda. Tak što i toje, i toje badaj». Aŭtobus ci tramvaj? «Tramvaj — u im jość peŭnaja dola ramantyki».
Cikava, što Jahor pracuje… barmienam. Jon pracavaŭ u takich minskich ustanovach, jak Malt&Hops Pub i Cafe Feelini.
Taksama jon źjaŭlajecca vakalistam u hurcie Dead Stars Avenue, śpiavajuć chłopcy pa-anhlijsku.
U kamientary dla «Našaj Nivy» Jahor Mickievič skazaŭ, što heta chobi, jakoje nie prynosić prybytkaŭ.
U sacyjalnych sietkach Jahor Mickievič padpisany na takija supołki jak «Sposaby padarožničać amal zadarma», iraničnuju supołku «Typovaja DNR», «Budźma biełarusami» i inšyja.
«Mis Biełaruś» usio bolš nahadvaje konkurs pryhažości ŭ haremie23
Kamientary