Sieciŭnaja volnica moža skončycca voś-voś
Ułada farsuje źmieny ŭ zakon ab ŚMI. Ź vialikaj dolaj imaviernaści možna prahnazavać, što naveli buduć skiravanyja na rehlamentacyju Sieciva. Piša ŭ svaim błohu Alaksandar Kłaskoŭski.
Ułada farsuje źmieny ŭ zakon ab ŚMI. Ź vialikaj dolaj imaviernaści možna prahnazavać, što naveli buduć skiravanyja na rehlamentacyju Sieciva.
Siońnia jak śnieh na hałavu zvaliłasia navina, što adpaviedny zakonaprajekt ułučany ŭ paradak dnia ciapierašniaj sesii Pałaty. Kankretyzavać źmiest dakumentu tam nie harać žadańniem. Niezaležnaja medyjnaja supolnaść apynułasia ŭbaku ad abmierkavańnia. Raniejšyja zapyty BAŽu ŭ instancyi nakont mierkavanych navacyj akazalisia harocham ab ścienku.
Zrešty, lohika čynavienstva, datyčnaha da raspracoŭki navelaŭ, prasočvajecca lohka. Nieadnojčy ahučvalisia idei ŭvieści rehistracyju sieciŭnych resursaŭ, uzdymaŭsia na ščyt kitajski dośvied. U ajčynnym Siecivie ŭžo źjaviŭsia kryłaty vyraz: "bulbiany fajrvoł" :)
Nieŭzabavie sieciŭnaj publicy moža stać nie da śmiechu. Eksperty BAŽ źviartajuć uvahu na paśpiešlivaść, ź jakoj prajekt prakručvajuć cieraz parlament. Mahčyma, zacuhlać internet chočuć užo da vosieńskich vybaraŭ. Darečy, chto jaho viedaje, ci takim užo rachmanym akažacca novy deputacki korpus, zaznačaje chto-kolviek z ekspertaŭ . Tak što naviersie, badaj, paličyli: za źmieny ŭ zakon ab ŚMI chaj lepiej hałasujuć pravieranyja kadry!
Inšaje pytańnie, nakolki pašencić uziać internet pad kaŭpak. Kaniečnie, hałaŭnoha bolu ŭeb-žurnalistam dadasca, ale całkam zahłušyć kramołu nierealna. Naadvarot, možna spravakavać virtualnuju partyzanku.
ZY. 11 červienia staršynia parlamenckaj kamisii sp. Kułakoŭski zajaviŭ: pra internet u prajekcie tolki adna fraza — što hetaja sfera rehulujecca dziejnym zakanadaŭstvam. Kali sapraŭdy tak, to ŭźnikajuć novyja pytańni: 1) ci nie čakać nakont Sieciva ŭkazu (što moža być jašče horaj) 2) čaho tady tak śpiašajucca, jaki djabał moža być schavany ŭ detalach zakonaprajektu?
ZYY. Niejki minimum infarmacyi pra zakonaprajekt źjaviŭsia na sajcie pałaty. U pryvatnaści, majecca na mecie "ŭparadkavać praceduru zasnavańnia i rehistracyi" medyjaŭ, uzmacnić adkaznaść zasnavalnikaŭ, "vyznačyć efektyŭny mechanizm užyvańnia mieraŭ adkaznaści da subjektaŭ pravadačynieńniaŭ ŭ sfery ŚMI". Nakolki možna mierkavać, inicyjatary zakłapočany zusim nie liberalizacyjaj medyjaŭ.
Ciapier čytajuć
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii11
Kamientary