U vydaviectvie Vesna Books vyjšli dźvie (z čatyroch) pieršyja knihi histaryčnaha ramana Silva Rerum Kryściny Sabalaŭskajcie (Kristina Sabaliauskaitė) u pierakładzie Siarhieja Šupy. Tvor litoŭskaj piśmieńnicy — heta vialiki, zachaplalny, poŭny intryh i pryhodaŭ, panaramny raman pra našu historyju, piša bellit.info.
Silva Rerum — pa-łacinsku «les rečaŭ», papularny ŭ XVI—XVIII stahodździach siarod litoŭskaj šlachty žanr, «siamiejnaja kniha», jakaja pieradavałasia z pakaleńnia ŭ pakaleńnie, dzie zapisvalisia važnyja žyćciovyja padziei. Dzieja pieršaj častki adbyvajecca ŭ 1659—1667 hadach u Vilni i ŭ dalokim žamojckim dvary, siadzibie šlachieckaha rodu Narvojšaŭ.
Padziei Silva rerum II adbyvajucca ŭ 1707—1710 hadach. Paŭnočnaja vajna, čuma, raskoša i haleča, šviedskija i rasijskija sałdaty, jaŭrejskija lekary, upartyja žamojty i iraničnyja vilenčuki i, viadoma, nastupnaje pakaleńnie šlachieckaha rodu Narvojšaŭ.
Cykł histaryčnych ramanaŭ Silva rerum doktara mastactvaznaŭstva Kryściny Sabalaŭskajcie — adna z samych značnych padziejaŭ u litoŭskaj litaratury apošnich dziesiacihodździaŭ, jakaja atrymała ŭvahu i pryznańnie ŭ Litvie i za miažoj.
U Łatvii ramany Silva rerum byli abranyja ŭ śpis 100 samych lubimych knih łatyšoŭ usich časoŭ.
Paśla publikacyi ŭ Polščy pieršy raman cykłu staŭ biestseleram, a ŭ 2016 hodzie vyjšaŭ u finał prestyžnaj centralnaeŭrapiejskaj litaraturnaj premii Angelus.
Litoŭskija čytačy, vybirajučy ŭ 2018 hodzie sto knih stahodździa, prysudzili ramannamu cykłu Silva rerum treciaje miesca.
«Vydatna napisany, markiesaŭski raman, dzieja jakoha adbyvajecca ŭ Litvie XVII stahodździa i jaki razam z tym nahadvaje, što historyja Centralnaj Eŭropy — heta naš supolny naratyŭ», — tak vykazvałasia pra knihu polskaja piśmieńnica, łaŭreatka Nobieleŭskaj premii pa litaratury Volha Takarčuk.
Z nahody vychadu pieršych dźviuch knih cykłu ŭ biełaruskim pierakładzie razhornuta vykazaŭsia Alhierd Bacharevič:
«…Pieršyja dva tamy Silva rerum u Siarhiejevym pierakładzie ja pračytaŭ jak niešta vielmi blizkaje, vielmi svajo. Heta sapraŭdy vialikaja kniha pra našu Jeŭropu, Jeŭropu biaskoncych šera-zialonych lasoŭ, tajamničych rek i hłybokich azioraŭ, raskidanych miž hetaha markotnaha abšaru kamiennych majontkaŭ i haradoŭ, što chutčej baroniacca svajoj jeŭrapiejskaściu ad navakolla, čym jaho dapaŭniajuć. Kniha pra Jeŭropu, jakuju na Zachadzie dahetul usprymajuć jak terra incognita. Pra inšuju Jeŭropu. Kniha pra tuju Litvu, jakoj biełarusy zbolšaha nie viedajuć, choć jana niejmavierna blizka — značna bližej, čym zdajecca. Kniha pra toje minułaje, kali miž Litvoj i Biełaruśsiu nie było miežaŭ u sučasnym sensie słova. Kniha pra toje samaje lehiendarnaje VKŁ časoŭ pavolnaha (a mo imklivaha: chutkaść i chod historyi zaležać ad taho, chto, kali i, hałoŭnaje, kamu jaje čytaje) zaniapadu — ale ź inšaha boku i inšaj movaj».
«Vojny i intryhi. Kachańnie i śmierć. Krajavidy i karty losu. Vilnia i zmovy. Vulicy i vierabji. Ludzi i ich mary, ich honar. Pra takija knihi kažuć: sieryjał zdymać. I choć knihi mnie milejšyja — ja b niešta takoje pavodle SR pahladzieŭ… Mo i źniali ŭžo?» — dadaje Alhierd Bacharevič.
Treciaja kniha cykła ŭžo pierakładzienaja i redahujecca, Siarhiej Šupa pracuje nad pierakładam zaklučnaj častki.
Vydaviectva Vesna Books płanuje sieryju prezientacyj u roznych krainach i haradach, ale ciapier knihu ŭžo možna kupić i voś dzie:
Silva rerum — knihauka.com i allegro.pl
Silva rerum II — knihauka.com i allegro.pl
A taksama možna zamović niepasredna ŭ vydaviectvie [email protected].
Kačanava: Z zadavalnieńniem pačytała Zachara Prylepina. A ź lubimaha — Puškin, Tałstoj i pravasłaŭnaja litaratura
Ci možna viarnuć razburanaje 100 hod tamu? Dubaviec — pra «Dom» Horvata
Hiendyrektar «Biełknihi»: Absalutny bestseler — kniha «Naš prezident»
«Nie adpaviadaje novaj kancepcyi». U Vilni z muzieja prybrali ekspazicyju, pryśviečanuju Jakubu Kołasu
Ciapier čytajuć
Vajb-prahramavańnie źmienić rolu raspracoŭščyka, RLVR, i kali łopnie burbałka. Biełarus-inžynier u halinie ŠI, jaki pracuje ŭ ZŠA, raskazaŭ, što nas čakaje ŭ 20263
Kamientary