34-hadovy sieryjny zabojca z Homiela prysudžany da rasstrełu
Jašče adzin śmiarotny prysud vyniesieny ŭ Biełarusi. 19 maja Homielski abłasny sud prysudziŭ da vyklučnaj miery pakarańnia — rasstrełu — žychara Homiela Siarhieja Vostrykava.
Mužčyna 1982 hoda naradžeńnia abvinavačvaŭsia adrazu pa niekalkich artykułach Kryminalnaha kodeksa: čč. 1, 2 art. 166 (zhvałtavańnie), č. 2 art. 167 (hvałtoŭnyja dziejańni sieksualnaha charaktaru), č. 1 art. 182 (vykradańnie čałavieka), pp. 6, 8, 16 č. 2 art. 139 (zabojstva, ździejśnienaje z asablivaj žorstkaściu z metaj schavać inšaje złačynstva asobaj, jakaja raniej učyniła zabojstva), čč. 1, 2 art. 205 (kradziež).
Słuchańnie rezanansnaj spravy prachodziła ŭ zakrytym režymie.
Vostrykaŭ padmannym šlacham zavablivaŭ achviar u svoj aŭtamabil, advoziŭ u haraž, hvałtavaŭ i zabivaŭ. Cieły žančyn jon vyvoziŭ u les i zakopvaŭ.
Pieršaj achviaraj mańjaka stała jaho kaleha, 25-hadovaja Alesia Pancialejeva, jana była zabitaja ŭ lipieni 2014 hoda. Amal praz hod pry takich ža abstavinach źnikła 27-hadovaja Alaŭcina Mašurykava. Jana taksama pracavała na adnym pradpryjemstvie z abvinavačanym. Žančyna ŭ šeść ranicy vyjechała na pracu i źnikła. Jaje telefon byŭ niedastupny, i muž źviarnuŭsia ŭ milicyju.
Pravaachoŭnyja orhany vyznačyli aŭtamabil, na jakim pierasoŭvałasia Mašurykava. Padazravanym akazaŭsia sudzimy za razboj i vyzvaleny daterminova 33-hadovy hamialčuk. Žančyn-kaleh jon prapanoŭvaŭ padvieźci na pracu na asabistym aŭtamabili.
U Siarhieja Vostrykava jość žonka i trochhadovaje dzicia.
Abarona prysudžanaha da rasstrełu hamielčuka maje namier abskardzić rašeńnie suda, paviedamiŭ advakat Viktar Šłandykaŭ.
Advakat paviedamiŭ žurnalistam, što prasiŭ dla padabaronnaha 25 hadoŭ pazbaŭleńnia voli. Pry hetym jon adznačyŭ, što nie razumieje matyvy zabojstvaŭ:
«Nie mahu zrazumieć, čamu heta adbyłosia. Moj padabaronny na sudzie prosta razvodziŭ rukami. U jaho ŭsiudy stanoŭčyja charaktarystyki. Ekśpiertyza pryznała jaho zdarovym i adekvatnym. Na sudzie ŭ jakaści śviedki vystupiŭ psichołah, jaki ličyć, što moj padabaronny raskajaŭsia. Abvinavačvańni jon pryznaŭ, prabačeńnia prasiŭ uvieś čas».
Baćka Alaŭciny Mašurykavaj ličyć prysud spraviadlivym. «Vyradak atrymaŭ svajo. Bolš mnie skazać niama čaho, kampiensacyi materyjalnaj škody ja nie prasiŭ. Dzicia nie viernieš», — skazaŭ jon žurnalistam paśla abviaščeńnia prysudu.
Jaje babula taksama ličyć, što abvinavačany zasłužyŭ śmiarotnaje pakarańnie: «Jon parušyŭ usie artykuły, usie zakony — i čałaviečyja, i Božyja: nie skradzi, nie zabi, nie pažadaj čužoha. Jon pavinien być rasstralany. Inšaha jon nie zasłuhoŭvaje».
Muž zabitaj taksama zhodzien z prysudam. Pavodle jaho słoŭ, abvinavačany na sudzie «pavodziŭ siabie spakojna i adekvatna». U apošnim słovie paprasiŭ prabačeńnia ŭ svajakoŭ zabitych.
«Za što? Voś na hetaje pytańnie jon nie daŭ adkazu nikomu. Z majoj žonkaj jon pracavaŭ na pradpryjemstvie razam čatyry hady. I kalehi taksama nie mahli pavieryć, što jon takoje ździejśniŭ», — skazaŭ muž zahinułaj.
Baćki Alesi Pancialejevaj ad razmovaŭ z presaj admovilisia.
Heta ŭžo treci śmiarotny prysud, vyniesieny ŭ Biełarusi ad pačatku 2016 hoda. U studzieni da vyšejšaj miery pakarańnia byŭ prysudžany žychar Vilejki Hienadź Jakavicki, pryznany vinavatym u zabojstvie z asablivaj žorstkaściu, u lutym — žychar Minskaha rajona Siarhiej Chmialeŭski, abvinavačany ŭ zabojstvie troch čałaviek.
Ciapier čytajuć
Vialikaja hutarka z Franakam Viačorkam — pra kruhły stoł z Łukašenkam, pamyłki, chejtaraŭ i hałoŭnaje dasiahnieńnie38
Kamientary