U Rasii adbyłasia historyja jak u filmie «Adzin doma-2»: 11-hadovaja školnica ź lohkaściu pranikła ŭ samalot biez kvitka i adpraviłasia ŭ padarožža z maskoŭskaha aeraporta Unukava ŭ pieciarburhskaje Pułkava. Užo na borcie samalota bieźbiletnicu vyjavili, ale razvaročvać samalot nie stali. U vyniku ŭ situacyju ŭmiašalisia supracoŭniki MUS, upaŭnavažany pa pravach dziaciej Pavieł Astachaŭ i mnohija inšyja, a dziaŭčynku — užo ŭ supravadžeńni darosłych — adpravili nazad. «Mieduza» koratka pierakazvaje hetuju historyju.
Palacieć u Pieciarburh dziaŭčyncy dapamahła chitraść.
11-hadovaja Kacia zdoleła palacieć u Sankt-Pieciarburh biez baćkoŭ i bieź bileta, tamu što rabiła vyhlad, byccam u aeraporcie i na borcie samalota jana nie adna. Kantrol biaśpieki piacikłaśnica prajšła, «prybiŭšysia da šmatdzietnaj siamji», zatym nieŭzamietku praskočyła paŭz supracoŭnikaŭ naziemnych słužbaŭ Unukava i patrapiła na bort, jaki lacieŭ u Pułkava, piša FrequentFlyers.ru. Pa słovach členaŭ ekipaža, u sałonie samalota było niekalki pustych miescaŭ, z-za čaho dziaŭčynku pryniali za adnaho sa spoźnienych pasažyraŭ. Paźniej ściuardesa udakładniła ŭ darosłaj žančyny, jakaja siadzieła pobač ź dziaŭčynkaj, ci jaje heta dzicia. Pakolki žančyna lacieła ŭ Pieciarburh sa svaim synam, jana padumała, što jaje pytajuć pra jaho, i adkazała śćviardžalna, paviedamlaje Life.
Toje, što na borcie samalota jość niepaŭnahadovaja pasažyrka biez kvitka, vyśvietliłasia tolki paśla ŭźlotu. Na dziaŭčynku źviarnuli ŭvahu tamu, što jana była adna, ale pierad palotam nichto nie zamaŭlaŭ pasłuhu «niesupravadžalnyja dzieci». Tady dziaŭčynka pryznałasia, što vyrašyła «prakacicca na samalocie».
Mama nie śpiašałasia zabirać dziaŭčynku ź Pieciarburha.
Paśla pryziamleńnia ŭ Pułkava dziaŭčynku źmiaścili ŭ prytułak, dzie jana pavinna była znachodzicca da taho času, pakul jaje nie zabiaruć baćki. Tut adbyłosia samaje niečakanaje: maci dziaŭčynki admoviłasia pryjechać za joj z Maskvy; jana taksama zajaviła pra namier zapatrabavać kampiensacyi ad aeraporta i kampanii-pieravozčyka. Tady — sa słovami «treba žyć doma, a nie biehać!» — advieźci dziaŭčynku ŭ Maskvu prapanavaŭ upaŭnavažany pa pravach dziciaci Pavieł Astachaŭ.
Dziaŭčynku ŭžo źbiralisia adpraŭlać u Maskvu siłami MUS u supravadžeńni namieśnika kiraŭnika Centra časovaha ŭtrymańnia niepaŭnaletnich pravaparušalnikaŭ, kali jaje maci pieradumała i ŭsio ž kupiła kvitok u Pieciarburh. Pa słovach Astachava, 28 krasavika Kaciu zabrali z prytułku. Sustreča dziaŭčynki z mamaj «prajšła dobra». «Kacia ŭ chutkim časie adpravicca ŭ dziciačy łahier, dzie i budzie realizoŭvać svaju ramantyčnuju ciahu da vandravańniaŭ i pryhodaŭ», - raspavioŭ Astachaŭ.
Vinavatyja pierakładajuć adkaznaść adzin na adnaho.
Avijakampanija «Rasija» pravodzić słužbovuju pravierku incydentu. Pry hetym u pres-słužbie kampanii padkreślivajuć, što da taho, jak pasažyry traplajuć u samalot, adkaznaść za ich niasie apieratar pa naziemnym absłuhoŭvańni pieravozak i słužby biaśpieki (u vypadku z rejsam, jaki lacieŭ u Pieciarburh, heta apieratar UTG). Tym nie mienš, «Rasija» ŭviadzie dadatkovuju pravierku pasadačnych tałonaŭ u pasažyraŭ na ŭvachodzie ŭ samalot.
U baćkoŭ dziaŭčynki ciapier taksama niepryjemnaści. Palicyja zaviała suprać ich administracyjnuju spravu pa artykule «nievykanańnie baćkami abaviazkaŭ pa vychavańni dziciaci», a ŭpaŭnavažany pa pravach dziciaci Astachaŭ paabiacaŭ pastavić siamju školnicy na asablivy kantrol.
Kamientary