Blickryh suprać ilhot pravaliŭsia
Ciapier šukajuć strełačnika. I chto ž heta zavaryŭ kašu? :) Piša ŭ svaim błohu Alaksandar Kłaskoŭski.
Deputat Čursin zaklikaŭ pryciahnuć da adkaznaści čynoŭnikaŭ, što raspracoŭvali našumieły zakonaprajekt pra lhoty (dakładniej kažučy, pra ich amal tatalnaje skasavańnie).
Deputackaje abureńnie skiravanaje na ŭrad, i najpierš na Ministerstva pracy i sacyjalnaj abarony. Heta nahadvaje pošuk strełačnika. Vožyku zrazumieła: biez admaški źvierchu nijakaje viedamstva i navat dziesiać Sidorskich nie mahli b zavaryć hetkuju kašu, inicyjavać navacyi padobnaha maštabu z takim kalasalnym palityčnym składnikam.
Letaś uviesnu hałoŭnym ńjusmejkieram što da prablemy skasavańnia lhotaŭ była spn. Piatkievič. Mienavita namieśnica kiraŭnika Administracyi pierakonvała deputataŭ, što ŭ hetym pytańni nastaŭ čas bury dy nacisku. Maŭlaŭ, na dobry ład uvohule varta było b "pierasilić siabie i pajści radykalna — admianić ilhoty ŭsim da adzinaha".
Što ž da vytokaŭ i aŭtarstva idei, to voś vam letašniaje reziume aficyjnaha kiraŭnika: "Na vybarach usie nahami tupali dy lamantavali: prybrać ilhoty! Ja ich prybraŭ".
Ale blickryh pravaliŭsia. Ciškom, "biaz hvałtu" sytuacyju pačali adkručvać nazad. Dali zahad u VNU, kab tam šukali mahčymaść kampensavać prajezd studentam. Znajšli varyjanty dać palohku siłavikam. Ciapier voś viarnuli, pakul što na ciopły sezon, tańniejšy prajezd pensyjaneram. Abiacajuć z novaha hodu adnavić asobnyja lhoty čarnobylcam.
Zvyš usiaho, vyhladaje na toje, što raschvalenaja systema adrasnaj padtrymki akazałasia elementarna nie praličanaj. Kažuć, u šerahu rehijonaŭ vybrali ŭžo hadavy resurs na hetyja mety. "My čakali 162 miljardy rubloŭ ekanomii, u vyniku my atrymali dadatkovyja vydatki na hetyja mety ŭ try z pałovaj razy bolšyja, čyhunka paniesła straty", — paviedamiŭ deputat Čursin.
Karaciej, tatalnaja kanfuzija i retyrada. Davodzicca ŭličvać i pieradvybarčy aspekt, zdymać syndrom niezadavolenaści paspalitaha ludu pierad čarhovym rytuałam la vybarčych skryniaŭ. Pryčym usio heta znoŭ padajecca jak prajava mudraści dy čułaści najvyšejšaha kiraŭnika. Samaje ž admietnaje, što masavaja śviadomaść lohka viadziecca na takija pijaraŭskija rečy, i niezaležnaja sacyjalohija paćviardžaje: pierad kožnymi vybarami rejtynhi ŭłady i jaje hałoŭnaj persanalii znoŭ lezuć uhoru.
Darečy, u apazycyi z nahody admieny lhotaŭ šmat chto ciškom paciraŭ ruki. Maŭlaŭ, chaj lepiej Jon robić toje, što paśla prychodu da ŭłady musili b choćki-niachoćki rabić my :) Nie pašenciła! Pa-pieršaje, ekanomija na lhotach akazałasia pšykam. Pa-druhoje, nadta ž vialikija imidžavyja vydatki. Choć vybary ŭ nas jość praceduraj nadzvyčaj ŭmoŭnaj, ale ž złavać elektarat usio adno nia chočacca. Tym bolej što jon tak udziačna reahuje na lubuju cukierku!
Kamientary