A Jarmošyna tut ni pry čym
Bolš za 80 % delehataŭ źjezdu AHP prahałasavali za pieraabrańnie Anatola Labiedźki lideram AHP, čarhovy źjezd jakoj prajšoŭ u niadzielu.
Ułady tak i nia vydzielili vialikaj zali dla praviadzieńnia čarhovaha spravazdačna-vybarčaha źjezdu AHP. Partyjcy źviartalisia ŭ niekalki dziesiatkaŭ ustanovaŭ, ale sutyknulisia z admovami. Najbolš haračyja hałovy navat prapanoŭvali pravieści źjezd pad ścienami Administracyi prezydenta, ale pastanavili spynicca na zvykłym alternatyŭnym varyjancie – Siadzibie Partyi BNF. Zala ŭpravy nie takaja ŭžo vialikaja, tamu siadziačyja miescy byli harantavanyja tolki žančynam, a taksama pensijaneram. Inšym delehatam rychtavalisia adoleć šmathadzinny zadušlivy źjezdaŭski maraton na svaich nahach.
Miesca ŭ prezydyjumie zaniali juryst partyi Siarhiej Alfier i pradprymalnik z Barysava Leŭ Marholin. Mienavita jany, imknučysia razmaŭlać pa-biełarusku, i viali pracu CHI źjezdu.
Va ŭstupnym słovie staršynia AHP Anatol Labiedźka skancentravaŭsia na troch asnoŭnych pałažeńniach: udzieł u vybarach u pałatu pradstaŭnikoŭ adzinym śpisam demakratyčnych siłaŭ, raspracoŭcy pracedury vyłučeńnia adzinaha kandydata ad apazycyi na nastupnyja prezydenckija vybary, a taksama inicyjavańnia praviadzieńnia čarhovaha Kanhresu demsiłaŭ.
Da apošniaha nie vyklučałasia, što vybary novaha staršyni AHP mohuć prajści na biezalternatyŭnaj asnovie. Tolki za paru tydniaŭ da samoha mierapryjemstva kankurencyju dziejsnamu staršyniu vyrašyŭ skłaści małaviadomy fermer ź Lelčycaŭ Mikałaj Haŭrylenka. Były likvidatar katastrofy na Čarnobylskaj AES sprabavaŭ hulać na niezadavolenaści rehijanalnych aktyvistaŭ partyjnaj viarchoŭkaj. Abureńnie ŭ Haŭrylenki vyklikaŭ choć by toj fakt, što kiraŭnictva AHP tak ni razu i nie pabyvała ŭ jahonych rodnych Lelčycach, nie dachodziać da paleskaha horadu i partyjnaja drukavanaja pradukcyja. «Viarchi partyja žyvuć sami pa sabie, rehijony – sami pa sabie», – skazaŭ Haŭrylenka.
Uvohule, kiraŭnictva AHP i samoha Anatola Labiedźku padčas vystupaŭ partyjcaŭ krytykavali dosyć časta. Žodziniec Alaksandar Vaŭčanin pačaŭ vystup z charakternych słovaŭ: «I choć na hetym źjeździe chvalić kiraŭnictva nie pryniata...».
Namieśnik staršyni «Maładych demakrataŭ» Michaił Paškievič u svaim vystupie adznačyŭ, što AHP treba «raźvivać partyjny nacyjanalizm». «Bo što takoje ADS?» – zadaŭsia pytańnie maładzion. Jahonyja słovy sarvali dobryja apladysmenty ŭ zali. Zrešty, Paškieviča chvalavała jašče adno pytańnie. Fihurant «pracesu 14-i» rabiŭ usio, kab u skład Palitrady partyi nia trapiŭ staršynia «Maładych demakrataŭ» Alaksandar Šumkievič. Zabiahajučy napierad adznačym, što heta Paškieviču ŭdałosia. U vyniku rejtynhavaha hałasavańnia Šumkievič i ekscentryčnaja Kryścina Šacikava akazalisia lišnimi, i ŭ Palitradu nie ŭvajšli.
Aktyvista Ruchu «Za Svabodu» Viktara Karniajenku chvalavała toje, što AHP nia jość samadastatkovaj partyjaj, a apazycyja stračvaje svaju subjektnaść. Leŭ Marholin zasiarodziŭsia na tym, što AHP pavinna rabić staŭku na pradprymalnikaŭ i moładź, što pakul nia robicca.
Ihar Šynkaryk i Ŭładzimier Čyrvonienka dobraachvotna skłali ź siabie paŭnamoctvy namieśnikaŭ staršyni AHP. Čyrvonienka taksama adznačyŭ u svaim vystupie, što z partyi raźbiahajucca ludzi. «Mnohija maładyja ludzi prychodziać u partyju, kab pakaŭbasicca niekalki hadoŭ, a paśla źjechać na Zachad. Što da partyjnych spravaŭ, to nam treba bolš aktyŭna raźvivać mižnarodnyja adnosiny pa vektary Berlin – Miensk – Maskva», – skazaŭ były namieśnik staršyni pa mižnarodnych pytańniach. Pry hetym jon rezka krytykavaŭ palityku A. Labiedźki.
Padčas vyłučeńnia pretendentaŭ na staršynstva sensacyjaŭ nie adbyłosia – Anatol Labiedźka i Mikałaj Haŭrylenka. Vyłučali taksama i Lva Marholina ź Ludmiłaj Hraznovaj, ale jany sami ŭziali samaadvod.
Vyniki hałasavańnia znoŭ ža całkam pradkazalnyja: za Labiedźku – 127 delehataŭ (82 %), za Haŭrylenku – 22 delehaty (14 %), čatyry čałavieki suprać usich, a dva biuleteni paličyli niesapraŭdnymi. Staršynia padlikovaj kamisii Alaksandar Cacura, kali abviaščaŭ kančatkovyja vyniki krychu pabłytaŭ ličby, skazaŭšy, što za Labiedźku prahałasavali 83%, što vyklikała družny śmiech u zali. Mahija ličby.
Nanoŭ abrany staršynia AHP skazaŭ, što praciahvaje zastavacca aptymistam. «Ja ŭznačalvaju partyju ŭ samyja ciažkija dla Biełarusi časy», – skazaŭ Labiedźka. Jon adznačyŭ, što na siońniašni dzień prachodzić amaładžeńnie kadraŭ partyi. U Palitradu abranyja 13 novych asobaŭ.
Labiedźka adrazu adznačyŭ, što chacieŭ by bačyć u partyi tolki dvuch namieśnikaŭ, jakija b pracavali bolš efektyŭna, i prapanavaŭ Jarasłava Ramančuka i Lava Marholina, delehaty vyłučyli jašče Ludmiłu Hraznovu, ale jejnyja šancy ad pačatku razhladalisia jak minimalnyja. Tak i vyjšła, što namieśnickija fateli zaniali ŭ čarhovy raz Ramančuk i ŭpieršyniu Marholin. Hraznovaj, mabyć, tak i nie prabačyli aktyŭnaha supracoŭnictva ź Milinkievičam i Rucham «Za Svabodu». Zrešty, kiraŭnictvu AHP usio ž chapiła rozumu, kab nie pravodzić čystki šerahaŭ.
Byli taksama jašče pryniatyja zvarot da hramadzianaŭ Biełarusi, stratehija partyi, a taksama rezalucyja suprać budaŭnictva ŭ krainie atamnaj AES.
Ciapier partyjcy pavinny zasiarodzicca na padrychtoŭcy i ŭdziełu ŭ parlamenckich vybarach. Pa ahulnym śpisie kandydataŭ ADS liberałam vydzielili ažno 30 miescaŭ.
Kamientary