«Halijafy» i Arche voźmuć udzieł u Minskaj knižnaj vystavie, «Łohvinava» nie budzie
Adkryćcio Mižnarodnaj knižnaj vystavy adbudziecca 10 lutaha a 12-j hadzinie.
XXIII Minskaja mižnarodnaja knižnaja vystava-kirmaš projdzie z 10 pa 14 lutaha ŭ paviljonie «Biełekspa». U joj voźmuć udzieł dziaržaŭnyja vydaviectvy i niekatoryja niezaležnyja, taksama svaje stendy vystaviać ambasady. Udzieł u joj niatanny. Dla vydaŭca adzin kvadratny mietr kaštuje 100 jeŭra.
«Halijafy» arandujuć pad knižnyja navinki čatyry kvadraty za 400 jeŭra. Heta jak 36 knih nobieleŭskaj łaŭreatki Śviatłany Aleksijevič «Čas sekand-chend».
«My sioleta vyrašyli nie rabić niejkuju prahramu na stendzie, tam naohuł niazručna, tym bolš u nas ciapier jość svaja placoŭka ŭ Trajeckim pradmieści. My prosta pradstavim svaje navinki, moža, toje, što vychodziła raniej. Heta knihi Alhierda Bachareviča «Biełaja mucha — zabojca mužčyn», Juryja Stankieviča «Paŭnočny viecier dla śpiełych pładoŭ», Siarhieja Abłamiejki «Dom litaratara» dy inšyja», — raskazvaje dyrektar «Halijafaŭ» Źmicier Višnioŭ.
Ź ciažkaściami padčas rehistracyi na vystavie «Halijafy» nie sutyknulisia.
Kniharni «Łohvinaŭ» na vystavie, jak i letaś, nie budzie. Letaś im prosta admovili va ŭdziele, a sioleta jany zajaŭki navat nie padavali.
«My prosta nie padavali zajaŭki na ŭdzieł, bo ŭžo try hady nas nie rehistravali biez usialakich tłumačeńniaŭ», — kaža art-dyrektar kniharni «Łohvinaŭ» Pavieł Kaściukievič.
Ścipły stend na dva kvadratnyja mietry sioleta budzie ŭ časopisa «Arche». Vydaŭcy taksama nie buduć ładzić kulturnaj prahramy — tolki knižnyja navinki.
«U nas buduć usie apošnija navinki, budzie apošniaja naša kniha na ruskaj movie, pryśviečanaja abaronie Bresckaj krepaści ŭ červieni 1941 hoda, jana całkam zasnavanaja na niamieckich krynicach, aryhinalnych dakumientach i ŭspaminach», — raskazvaje hałoŭny redaktar «Arche» Valer Bułhakaŭ.
Dva kvadraty na vystavie zojmie vydaviectva «Technałohija». Abiacajuć konkursy i viktaryny z padarunkami, a taksama navinku — «Etnaastranomiju» Cimafieja Avilina.
«Heta adna z najlepšych knih hoda ŭ našym vydaviectvie i pieršaja kniha ŭ hetaj tematycy. Jašče novaja kniha Alesia Zajki», — dzielacca płanami ŭ vydaviectvie.
Tradycyjna svaje stendy na vystavie pradstaviać i ambasady. U minułym hodzie najbolš papularnym u padletkaŭ staŭ stend amierykanskaha pasolstva dziakujučy interaktyŭnym hulniam. Sioleta dypłamaty znoŭ pradstaviać raźvivalnyja hulni, a taksama kamandnyja viktaryny na temu vynachodnictva.
Adkryćcio Mižnarodnaj knižnaj vystavy adbudziecca 10 lutaha a 12-j hadzinie.
Ciapier čytajuć
Jak skłaŭsia los Jany Pačyckaj — dziaŭčyny, jakuju zatrymlivali razam z Kanavałavym i Kavalovym pa spravie ab terakcie ŭ mietro7
Kamientary