Haradzieniec choča prajści pieššu 30 tysiač kiłamietraŭ i paznajomicca z Ramzanam Kadyravym
Z 1 sakavika haradzieniec Siarhiej Maroz adpravicca pieššu ŭ čatyrochhadovaje padarožža na Uschod. Były spartoviec, jaki ŭ svoj čas adsłužyŭ u vajskovym śpiecnazie, maje namier prajści hety šlach, kab pakinuć svoj śled u historyi, a taksama być hodnym prykładam dla svajho syna.
Siarhiej ź dziacinstva maryŭ zastacca ŭ historyi i kožny dzień dumaŭ pra toje, što b takoha dobraha zrabić, kab pra jaho pamiatali zaŭsiody. Zaraz jon vybraŭ sabie šlach praz šeść krain: Biełaruś, Rasiju, Manholiju, Kazachstan, Uźbiekistan i Kirhiziju. Jon kaža, što jašče nichto nie prachodziŭ taki šlach pieššu.
«Vyrašyŭsia na padarožža, bo chaču realizavać siabie ŭ žyćci. Vielmi chaču pakinuć paśla siabie pazityŭny i, spadziajusia, karysny dla hramadstva śled. Majo padarožža pačniecca z Połacka. Mienavita adtul ja pajdu ŭ kirunku Murmanska».
Pa darozie Siarhiej płanuje ŭbačyć histaryčnyja słavutaści, pryhožyja vidy i piejzažy, nacyjanalnyja parki, naviedać ekałahična čystyja miaściny, spaznać kulturu narodaŭ i pa vynikach pachodu zmantavać film.
«Vielmi chaču patrapić u samuju krajniuju kropku Rasii, na paŭvostraŭ Kamčatka. Kali budzie mahčymaść, pasprabuju prajści pieššu — tudy iści prykładna 15 000 kiłamietraŭ, heta pałova ŭsiaho šlachu».
U zvarotny šlach Siarhiej vypravicca praź Jakuck, Ałdan, u bok Manholii. Kali nie atrymajecca prajści praz hetuju krainu, to šlach projdzie praź Irkuck, Krasnajarsk, Novasibirsk, Barnauł u bok Kazachstana.
«Abaviazkova chaču patrapić u horad-hieroj Hrozny i paznajomicca z Ramzanam Kadyrovym. Mnie jon vielmi padabajecca jak kiraŭnik. Ja b z zadavalnieńniem sustreŭsia i z Alaksandram Łukašenkam, i z Uładzimiram Pucinym, i Dźmitryjem Miadźviedzievym, ale razumieju, što jany vielmi zaniatyja. Spadziajusia, kali ažyćciaŭlu padarožža, mnie ŭdasca ź imi sustrecca».
Vypravicca ŭ šlach Siarhiej płanuje 1 sakavika 2016 hoda i ciapier aktyŭna šukaje sponsara dla ekipiroŭki — jamu treba 4500 dołaraŭ.
«Kali navat nie atrymajecca naźbirać takuju sumu, to ŭsio roŭna pajdu ŭ darohu. Ja viedaju i adčuvaju, što niahledziačy ni na što, mnie ŭdasca ažyćciavić maju maru».
Ciapier čytajuć
Na poŭnačy Biełarusi isnavała vielizarnaje voziera — u 150 razoŭ bolšaje za Narač. Jano źnikła ŭ vyniku pryrodnaj katastrofy, ale ślady zaŭvažnyja i siońnia77
Kamientary