Šunievič: Udzielniki vajny na Danbasie mohuć praniknuć praz rasijskuju miažu

Vyjavić biełarusaŭ, jakija vajavali va Ukrainie i viartajucca ŭ Biełaruś praz rasijska-biełaruskuju miažu, praktyčna niemahčyma. Najpierš tamu, što nijakaha pamiežnaha kantrolu na hetym kirunku niama. Pra heta zajaviŭ ministr unutranych spraŭ Biełarusi Ihar Šunievič.

Pavialičyć

«Z terytoryi Rasii całkam mohuć da nas pranikać hetyja asoby. I pytańnie tolki ŭ apieratyŭnym vyjaŭleńni ich tut, identyfikacyi i zbory materyjałaŭ. My hetym taksama zajmajemsia. Chacia jość ciažkaści, bo ŭliku pamiežnaha niama, i my nie možam ažyćciavić poŭny kantrol za ŭsimi, chto siudy prybyvaje. Jość taki instrumient, jak z dapamohaj sistemy nabyćcia kvitkoŭ. Ale ž jość darohi, mašyny lehkavyja i tut», — skazaŭ jon.

Ministr pryznajecca: kali taki čałaviek trapiŭ u našu krainu i nijak siabie i svoj udzieł u bajavych dziejańniach sam nie vydaje, to vyjavić jaho praktyčna niemahčyma.

«Jak takich ludziej vyjavić? Vy zadajacie pravilnaje pytańnie, ale adkazu na jaho vy nie atrymajecie. Bo tut reč takaja situatyŭnaja šmat u čym. Kali ŭ nas niama infarmacyi, to vidavočna, što my nie reahujem. Ja nie adkažu vam na pytańnie «Jak jaho vyjavić?», ja nie viedaju, jak jaho vyličvać. Univiersalnaha miechanizmu niama. Jość apieratyŭnyja srodki i mietady, jakija my vykarystoŭvajem, ale harantavać, što 100% hetych ludziej my zmožam vyjavić, ja vam nie mahu. My starajemsia heta rabić, my imkniemsia achavać našych hramadzian, našu dziaržavu ad lubych pahroz, u tym liku i ad hetych asobaŭ, što vajavali. Kali jany jość, hetyja pahrozy. Ale vy sami razumiejecie, što 100% harantyju nichto vam nie daść», — padkreśliŭ jon. 

Pa słovach Šunieviča, kab vyjaŭlać takich hramadzian, biełaruskija pravaachoŭniki karystajucca infarmacyjaj Jeŭrapoła i Interpoła, kalehaŭ z Ukrainy, «inšymi krynicami infarmacyi». Praŭda, pa słovach ministra, mahčymaść atrymlivać infarmacyju z rehijonaŭ, zaniatych bajevikami tak zvanych DNR/ŁNR, «biezumoŭna ŭskładnienaja». I tamu milicyjaniery raźličvajuć na pilnaść biełarusaŭ.

Nahadajem, dniami Ihar Šunievič paviedamiŭ, što ŭ Śledčy kamitet byli pieradadzienyja sabranyja materyjały pa 12 biełaruskich hramadzianach, jakija brali ŭdzieł u bajavych dziejańniach na Danbasie. Pa słovach ministra, śledčyja pavinnyja vyznačyć, ci jość u sabranych materyjałach padstavy dla taho, kab raspačać kryminalnuju spravu pa artykule «Najomnictva».

• 0
• 0
• 0
• 0
• 0
• 0
• 0
• 0