Vyrazanaja na kamieni prykładna 13800 hadoŭ tamu schiema siami chacin, znojdzienaja ŭ Ispanii, źjaŭlajecca najstaražytnaj vyjavaj čałaviečaha žylla.
Pra znachodku paviedamlajecca ŭ časopisie PLoS One. Koratka pra heta raspavioŭ New Scientist.
Na kamieni, jak ličać navukoŭcy, namalavanaje štodzionnaje žyćcio stajanki palaŭničych-źbiralnikaŭ. Najstaražytnyja tvory mastactva Homo sapiens byli stvoranyja kala 40 tysiač hadoŭ tamu, adnak jany byli pryśviečany vyklučna źviaram i ludziam, jakija na ich palavali.
Ispanskija navukoŭcy znajšli kamień z vysiečanaj na im vyjavaj na terytoryi archieałahičnaha kompleksu Mali del Salt, u 50 km na zachad ad Barsiełony. Ludzi žyli tam u pramiežku pamiž 13 i 7 tysiačahodździami da našaj ery: zachavalisia ślady chacin, kości žyvioł i inšyja prykmiety žylla.
«My ŭpieršyniu daviedalisia, što pieršabytny čałaviek byŭ zdolny adlustroŭvać hramadstva, u jakim jon žyvie. Taksama ŭpieršyniu my sustrelisia z vobrazam palealityčnaj vioski», — zajaviŭ Markas Harsija-Dyjes.
Ispanskija navukoŭcy ličać, što chaciny na kamieni vysiek pieršabytny mastak-avanhardyst, jaki parvaŭ z tradycyjaj adlustroŭvać tolki žyvioł. Kontury malunka supadajuć z praporcyjami chacin sučasnych plamionaŭ palaŭničych-źbiralnikaŭ, adznačajecca ŭ artykule.
Zrešty, nie ŭsie zhodnyja z takoj interpretacyjaj: brytanski archieołah Poł Pietyt zajaviŭ, što abstraktnaja maniera mastactva kamiennaha stahodździa dapuskaje i inšyja traktoŭki — mahčyma, na kamieni nie chaciny, a žyvioły.
Ciapier čytajuć
Ministr kultury vyciahnuŭ u efir čarhovaha Astapa Bendara. I heta stała apošniaj kroplaj: suprać hetaha fiermiera-chvalka vystupiła siamja5
Kamientary