Čatyry rakietnyja karabli rasijskaha VMF nanieśli ŭdary pa pazicyjach «Isłamskaj dziaržavy» ŭ Siryi z užyvańniem vysokadakładnaj zbroi. Ab hetym kiraŭnik Minabarony Siarhiej Šajhu dałažyŭ na sustrečy z prezidentam Rasii Uładzimiram Pucinym, frahmient jakoj pakazaŭ telekanał «Rasija 24».
«Za apošnija dvoje sutak intensiŭnaj pracy roznych vidaŭ raźviedak vyjaŭlenaja vialikaja kolkaść roznych abjektaŭ ID. Heta punkty kiravańnia, składy bojeprypasaŭ, bajavoj techniki, trenirovačnyja łahiery bajevikoŭ. Da ich paražeńnia akramia avijacyi siońnia ranicaj pryciahnuli karabli Kaśpijskaj fłatylii», — paviedamiŭ Šajhu.
«Čatyry rakietnych karabli zrabili 26 puskaŭ kryłatych rakiet marskoha bazavańnia pa 11 celach. Pavodle dadzienych abjektyŭnaha kantrolu, usie celi źniščanyja», — dadaŭ ministr. Pucin adznačyŭ, što naniasieńnie udaraŭ «z akvatoryi Kaśpijskaha mora na adlehłaść 1500 km» i paražeńnie ŭsich celaŭ kaža pra «dobruju padrychtoŭku pradpryjemstvaŭ abaronna-pramysłovaha kompleksu i dobruju vyvučku asabovaha składu».
U skład Kaśpijskaj fłatylii VMF Rasii ŭvachodziać rakietnyja karabli «Tatarstan» i «Dahiestan», małyja rakietnyja karabli «Śvijažsk», «Uhlič» i «Vialiki Uściuh», a taksama małyja artyleryjskija karabli, artyleryjskija katery, desantnyja katery.
Pucin stanoŭča acaniŭ dziejańni rasijskich vajskoŭcaŭ. «My viedajem, nakolki składanyja apieracyi padobnaha rodu, antyterarystyčnyja. I, viadoma, padvodzić vyniki jašče rana, ale toje, što zroblena da hetaha času, biezumoŭna, zasłuhoŭvaje vysokaj stanoŭčaj acenki», — skazaŭ jon i daručyŭ Šajhu praciahnuć uzajemadziejańnie pa Siryi z ZŠA, Turcyjaj, Saudaŭskaj Aravijaj, Iranam i Irakam. Jon vykazaŭ mierkavańnie, što biez udziełu hetych dziaržaŭ «pracu naležnym čynam naŭrad ci atrymajecca arhanizavać».
Šajhu paviedamiŭ, što z 30 vieraśnia, kali Saviet Fiederacyi daŭ Uładzimiru Pucinu dazvoł na vykarystańnie US za miažoj, rasijskija vajennyja nanieśli ŭdary pa 112 abjektach ID. Kiraŭnik Minabarony adznačyŭ, što «intensiŭnaść udaraŭ narastaje». «Za hety čas, z 30 čysła, źniščana 19 punktaŭ kiravańnia, 12 składoŭ bojeprypasaŭ, 71 adzinka bronietechniki, 6 zavodaŭ i majsterniaŭ pa vytvorčaści vybuchovych pryład», — paviedamiŭ kiraŭnik Minabarony.
Ciapier čytajuć
Što viadoma pra eks-aficera Słužby biaśpieki Łukašenki Andreja Spasava, jakoha pasadzili za palityku1
Kamientary