Pamierła Elvira Hierasimovič, aŭtarka kultavaj pastanoŭki «Ludzi na bałocie» 

22 lipienia paśla praciahłaj chvaroby na 91-m hodzie žyćcia pamierła Elvira Hierasimovič, viadomaja teatralnaja i hramadskaja dziajačka Biełarusi.

Pavialičyć

Pastaŭleny pa jaje scenary 3-sieryjny teleśpiektakl «Ludzi na bałocie» byŭ hanaravany Dziaržpremijaj BSSR, sučaśniki nazyvali jaho kultavym. Hierasimovič pracavała nad šmatlikimi tele-i i radyjopastanoŭkami pa tvorach majstroŭ biełaruskaj litaratury — Vasila Bykava, Ivana Mieleža, Michasia Łyńkova i Ivana Šamiakina.

Zasłužanaja dziajačka mastactvaŭ Biełarusi, jana była siarod studentaŭ i vypusknikoŭ pieršaha naboru Biełaruskaha teatralnaha instytuta. U pačatku 50-ch pracavała aktrysaj dramteatra pry Biełdziaržestradzie, a paźniej vučyłasia ŭ aśpirantury Maskoŭskaha dziaržaŭnaha instytuta teatralnaha mastactva im. A.V. Łunačarskaha.

Z 1956 hoda Hierasimovič niekatory čas pracavała staršym vykładčykam majsterstva akciora ŭ Biełaruskim dziaržaŭnym teatralna-mastackim instytucie, a potym jašče kala dziesiaci hadoŭ u jakaści adkaznaha rabotnika CK KPB. U 1968 Elvira Hierasimovič stała rektarkaj Biełaruskaha dziaržaŭnaha teatralna-mastackaha instytuta. Darečy, jana była pieršaj žančynaj u našaj krainie, jakaja zaniała taki post. I na hetaj pasadzie prapracavała 16 hadoŭ, paśla praciahnuła zajmacca vykładańniem u rodnym VNU.

Pavodle jaje scenaryjaŭ na Respublikanskaj studyi telebačańnia była stvoranaja telepastanoŭka «Ludzi na bałocie» pa tvory Ivana Mieleža, na Biełaruskim radyjo — radyjopastanoŭki pa tvorach Ivana Šamiakina «Serca na dałoni», Siarhieja Hrachoŭskaha «Rudabielskaja respublika», Vasila Bykava «Ślady na asfalcie» i inšyja.

Aŭtarka šmatlikich publikacyj pa historyi raźvićcia savieckaha teatralnaha mastactva, majsterstva akciora i režysury, jana taksama ŭdzielničała ŭ napisańni 3-tomnika «Historyi biełaruskaha teatra».

«Źjaŭlajučysia rektarkaj instytuta, jana praciahvała zajmacca piedahahičnaj i navukovaj dziejnaściu. Šerah maładych akcioraŭ, što paśpiachova pracujuć u teatrach Biełarusi, teatraznaŭcaŭ źjaŭlajucca jaje niepasrednymi vučniami», — adznačajecca ŭ bijahrafii prafiesara, kandydata mastactvaznaŭstva, na sajcie Biełaruskaj dziaržaŭnaj akademii mastactvaŭ.

Elvira Hierasimovič raniej była hanaravanaja šeraham uznaharod, siarod jakich orden «Znak pašany», «Za doblesnuju pracu ŭ hady Vialikaj Ajčynnaj vajny 1941-1945 h.h.», «Za pracoŭnuju dobleść».

Raźvitańnie z Elviraj Hierasimovič projdzie ŭ piatnicu, 24 lipienia, z 11.00 da 13.00 u Pałacy mastactvaŭ Minska (vulica Kazłova, 3).

• 0
• 0
• 0
• 0
• 0
• 0
• 0
• 0