22 ліпеня пасля працяглай хваробы на 91-м годзе жыцьця памерла Эльвіра Герасімовіч, вядомая тэатральная і грамадская дзяячка Беларусі.
Пастаўлены па яе сцэнары 3-серыйны тэлеспектакль «Людзі на балоце» быў ганараваны Дзяржпрэміяй БССР, сучаснікі называлі яго культавым. Герасімовіч працавала над шматлікімі тэле-і і радыёпастаноўкамі па творах майстроў беларускай літаратуры — Васіля Быкава, Івана Мележа, Міхася Лынькова і Івана Шамякіна.
Заслужаная дзяячка мастацтваў Беларусі, яна была сярод студэнтаў і выпускнікоў першага набору Беларускага тэатральнага інстытута. У пачатку 50-х працавала актрысай драмтэатра пры Белдзяржэстрадзе, а пазней вучылася ў аспірантуры Маскоўскага дзяржаўнага інстытута тэатральнага мастацтва ім. А.В. Луначарскага.
З 1956 года Герасімовіч некаторы час працавала старшым выкладчыкам майстэрства акцёра ў Беларускім дзяржаўным тэатральна-мастацкім інстытуце, а потым яшчэ каля дзесяці гадоў у якасці адказнага работніка ЦК КПБ. У 1968 Эльвіра Герасімовіч стала рэктаркай Беларускага дзяржаўнага тэатральна-мастацкага інстытута. Дарэчы, яна была першай жанчынай у нашай краіне, якая заняла такі пост. І на гэтай пасадзе прапрацавала 16 гадоў, пасля працягнула займацца выкладаннем у родным ВНУ.
Паводле яе сцэнарыяў на Рэспубліканскай студыі тэлебачання была створаная тэлепастаноўка «Людзі на балоце» па творы Івана Мележа, на Беларускім радыё — радыёпастаноўкі па творах Івана Шамякіна «Сэрца на далоні», Сяргея Грахоўскага «Рудабельская рэспубліка», Васіля Быкава «Сляды на асфальце» і іншыя.
Аўтарка шматлікіх публікацый па гісторыі развіцця савецкага тэатральнага мастацтва, майстэрства акцёра і рэжысуры, яна таксама ўдзельнічала ў напісанні 3-томніка «Гісторыі беларускага тэатра».
«З'яўляючыся рэктаркай інстытута, яна працягвала займацца педагагічнай і навуковай дзейнасцю. Шэраг маладых акцёраў, што паспяхова працуюць у тэатрах Беларусі, тэатразнаўцаў з'яўляюцца яе непасрэднымі вучнямі», — адзначаецца ў біяграфіі прафесара, кандыдата мастацтвазнаўства, на сайце Беларускай дзяржаўнай акадэміі мастацтваў.
Эльвіра Герасімовіч раней была ганараваная шэрагам узнагарод, сярод якіх ордэн «Знак пашаны», «За доблесную працу ў гады Вялікай Айчыннай вайны 1941-1945 г.г.», «За працоўную доблесць».
Развітанне з Эльвірай Герасімовіч пройдзе ў пятніцу, 24 ліпеня, з 11.00 да 13.00 у Палацы мастацтваў Мінска (вуліца Казлова, 3).
-
У Гомельскім драматычным тэатры — кадравыя чысткі. Зноў праз «палітыку»
-
«Будзе смешна і балюча»: «Купалаўцы» прэзентуюць заўтра новы спектакль. У галоўных ролях — Манаеў, Белахвосцік, Гарцуева
-
«Рашэнне прыйшло звонку». Што адбываецца ў віцебскім тэатры, дзе ў спектаклі прагучала «Жыве Фландрыя!» і пачалася чарада звальненняў?
Галоўны ідэолаг Беларусі знайшоў у краіне «псеўдапатрыятычныя ячэйкі» і заклікаў да змагання з імі «адзіным баявым кулаком»23
Каментары