Ministerstva zamiežnych spraŭ Kyrhyzstana ličyć zajavu biełaruskaha MZS ad 27 lutaha čarhovym «paćviardžeńniem namieru» aficyjnych orhanaŭ Biełarusi «lubymi srodkami vyharadzić i abaranić złačyncaŭ, asudžanych u Kyrhyzstanie za ŭčynieńnie asabliva ciažkich złačynstvaŭ, u tym liku Žanybieka Bakijeva».
«MZS Kyrhyzstana vymušany znoŭ padkreślić, što aficyjny Minsk nie pavinien zahavorvać prablemu ŭkryvalnictva kyrhyzskaha kryminału na terytoryi Biełarusi», — havorycca ŭ zajavie kirhizskaha źniešniepalityčnaha viedamstva.
«Zusim niedarečna hučać taksama spasyłki biełaruskaha boku na paniaćci «cyvilizavanaści dziaržavy», «vykanańnia pravoŭ svaich hramadzian», «spraviadlivaj sudovaj abarony» i «śpiecyfičnaha padychodu da pravasudździa», — adznačyli ŭ MZS Kyrhyzstana. —
Tym bolš, u śviatle viadomych suśvietnaj supolnaści faktaŭ, jakija stvaryli ŭstojany imidž adpaviednych orhanaŭ Respubliki Biełaruś, u vyniku čaho ich kiraŭnikoŭ nie prymajuć u bolšaści cyvilizavanych krain śvietu».
U viedamstvie taksama adznačyli, što ŭ zajavie prezidenta Kyrhyzstana Ałmaźbieka Atambajeva ad 26 lutaha vykazvajecca «zakłapočanaść u suviazi ź nievykanańniem biełaruskim bokam mižnarodnych abaviazacielstvaŭ» i nie ŭtrymlivaje źniavažlivych vykazvańniaŭ u adras Biełarusi, a naadvarot, praniknuta pavahaj da biełaruskaha naroda i jaho historyi, nadziejaj na razumieńnie prablemy i pierachod da kanstruktyŭnaha supracoŭnictva ŭ častcy vydačy i kryminalnaha pieraśledu złačyncaŭ, inšych asob, jakija adšukvajucca».
«Ministerstva zamiežnych spraŭ Kyrhyzskaj Respubliki padkreślivaje, što Respublika Biełaruś pavinna vykonvać pryniatyja na siabie mižnarodnyja abaviazacielstvy, i znoŭ zaklikaje biełaruski bok da kanstruktyŭnaha dyjałohu ŭ imia intaresaŭ družalubnych narodaŭ našych krain», — havorycca ŭ zajavie.
Nahadajem, 26 lutaha prezident Kyrhyzstana Ałmaźbiek Atambajeŭ adreahavaŭ na infarmacyju ab zabojstvie kryminalnaha aŭtaryteta z Kyrhyzstana Ałmambieta Anapijajeva (pracedura identyfikacyi asoby praciahvajecca), trup jakoha byŭ znojdzieny ŭ Minsku 18 lutaha. Na dumku Atambajeva, za hetym zabojstvam staić Žanybiek Bakijeŭ — brat byłoha kiraŭnika Kyrhyzstana Kurmanbieka Bakijeva.
«Kryvavyja kryminalnyja razborki» ŭ Minsku «nie pakidajuć sumnieńniaŭ u tym, što členy siamji Bakijevych adčuli ŭ Biełarusi poŭnuju biespakaranaść i razam sa svaimi hałavarezami praciahvajuć zabivać», havaryłasia ŭ zavie Atambajeva. «Kaho jašče pavinny zabić Bakijevy, kab ułady Biełarusi ŭbačyli narešcie źviarynuju i ludajedskuju sutnaść hetaj kryminalnaj siamji? Hetyja vyludki buduć pralivać kroŭ usiudy, dzie b ni apynulisia, u tym liku ŭ Biełarusi, jakaja ich prytuliła!» — zajaviŭ prezident Kyrhyzstana.
Jon nahadaŭ, što Kyrhyzstan dabivajecca vydačy bratoŭ Bakijevych užo amal piać hadoŭ, aficyjny ž Minsk kožny raz nie tolki «ličyŭ za lepšaje admaŭlać Biškieku ŭ zakonnych patrabavańniach», ale i zaachvočvaŭ prysutnaść Bakijevych u Biełarusi, «uručaŭ im nacyjanalnyja pašparty, dziaržaŭnyja ŭznaharody i vinšavaŭ ź jubilejami».
U adkaz MZS Biełarusi 27 lutaha vystupiła z zajavaj, u jakoj nazvała vykazvańni prezidenta Kyrhyzstana «pierahretymi emacyjanalnymi zajavami», niemahčymymi «na ŭzroŭni lidara cyvilizavanaj dziaržavy».
«Ale navat kali pakinuć za dužkami ich praduziataść, to ahučanyja na vyšejšym uzroŭni abvinavačańni va ŭčynieńni ciažkaha złačynstva iduć urazrez z ahulnapryniatymi mižnarodnymi normami kryminalnaj sudavytvorčaści», — zajaviła biełaruskaje MZS.
U zajavie taksama padkreślivałasia: «U luboj sučasnaj krainie Kanstytucyja i zakony ŭstanaŭlivajuć, što nichto nie moža być pryznany vinavatym va ŭčynieńni złačynstva, pakul jaho vinavataść nie budzie dakazana pryhavoram suda, jaki nabyŭ zakonnuju moc». «Adnak, miarkujučy pa šerahu zavočnych kryminalnych pracesaŭ, što prajšli ŭ Kyrhyzstanie, heta kraina ŭ cełym maje svoj, śpiecyfičny padychod da pravasudździa. Heta vyklikaje sumnieńnie ŭ zdolnaści kyrhyzskaj dziaržavy zabiaśpiečvać vykanańnie pravoŭ svaich hramadzian, u tym liku i prava na spraviadlivuju sudovuju abaronu», — zajaviła MZS Biełarusi.
Kurmanbiek Bakijeŭ, zrynuty z pasady prezidenta ŭ krasaviku 2010 hoda paśla dziaržaŭnaha pieravarotu ŭ Kyrhyzstanie, pryjechaŭ u Biełaruś ź nieaficyjnaj žonkaj i dvuma dziećmi pa asabistym zaprašeńni Alaksandra Łukašenki. Pavodle nieaficyjnaj infarmacyi, u žniŭni taho ž hoda jon atrymaŭ biełaruskaje hramadzianstva. U lipieni 2014 hoda Kurmanbiek Bakijeŭ i jaho brat Žanybiek, jaki ŭznačalvaŭ Słužbu dziaržaŭnaj achovy, byli pryhavoranyja ŭ siabie na radzimie da pažyćciovaha źniavoleńnia z kanfiskacyjaj majomaści. Jany pryznanyja vinavatymi ŭ saŭdziele ŭ arhanizacyi zabojstva, zamachu na zabojstva, pieravyšeńni słužbovych paŭnamoctvaŭ.
Ciapier čytajuć
Kupla kvatery praz kaapieratyŭ zamiest ipateki: jak pracuje sistema, padobnaja da piramidy, i što kažuć udzielniki i ekśpiert1
Kamientary