Mužčyna, znojdzieny 18 lutaha zabitym u bahažniku aŭtamabila pradstaŭničaha kłasa na vulicy Karła Libkniechta ŭ Minsku, apaznany adnym sa svajakoŭ jak Ałmambiet Anapijajeŭ.
Ab hetym paviedamiŭ načalnik adździeła infarmacyi i suviazi z hramadskaściu Śledčaha kamiteta Biełarusi Siarhiej Kabakovič.
Pavodle jaho słoŭ, pracedura identyfikacyi praciahvajecca. Dla vyklučeńnia pamyłki i kančatkovaha ŭstanaŭleńnia asoby, a taksama pryniaćcia rašeńnia ab pieradačy cieła mužčyny svajakam nieabchodna zaklučeńnie hienatypaskapičnaj ekśpiertyzy, jakaja pakul nie zavieršana.
Nahadajem, 24 lutaha infarmahienctva 24.kg sa spasyłkaj na advakata Danijara Mamanava paviedamiła, što ŭ Minsku zatrymany i dapytvajecca nabližany Ałmambieta Anapijajeva, zabitaha lidara arhanizavanaj złačynnaj hrupy, Hulžyhit A. 1989 hoda naradžeńnia.
Pavodle słoŭ advakata, Hulžyhit prylacieŭ razam z Anapijajevym u Minsk napiaredadni zabojstva. Adrazu paśla zdareńnia jon źnik.
«Jaho znajšli i ciapier dapytvajuć. Jon paćvierdziŭ, što prylacieŭ u Biełaruś razam z Anapijajevym. U Minsku ciapier znachodziacca žonka i brat majho padabaronnaha. Jany, jak paviedamlałasia raniej, apaznali trup. Ale infarmacyja ab tym, što siońnia cieła dastaviać u Kyrhyzstan, dačasnaja, bo jašče nie hatova zaklučeńnie ekśpiertaŭ. Tolki paśla praviadzieńnia ŭsich nieabchodnych ekśpiertyz cieła vydaduć svajakam, jakija dastaviać jaho ŭ KR», — skazaŭ Mamanaŭ.
Jon adznačyŭ, što śledstva maje namier vyśvietlić, dla čaho Anapijajeŭ prybyŭ u Minsk. «Pakul hety momant zastajecca niezrazumiełym dla rodnych i mianie, jaho advakata», — skazaŭ juryst.
Kali byŭ znojdzieny trup, milicyja kanfiskavała pašpart hramadzianina Rasijskaj Fiederacyi, vydadzieny na imia Ałmaźbieka Šakirava. Data naradžeńnia — 24 krasavika 1974 hoda, uradženiec Kyrhyzstana. Data vydačy pašparta — 27 lipienia 2010 hoda. Ustanoŭlena, što pašpart falšyvy: fota ŭ dakumiencie zamieniena fotazdymkam Anapijajeva.
Ciapier čytajuć
Siłaviki śćviardžajuć, što zatrymali dvuch mužčyn za hałasavańnie na vybarach u KR. Ale ci možna hetamu vieryć?7
Kamientary